مطلوب ملمع لخدوش السيارات

**a7mednour** · 03-07-2011 09:58 PM

انا عربيتي لسة جايبها من حوالي شهر وماشاء الله الناس كلها بتباركلي عليها اي واحد ماشي بيحطلي توقيقعه اما بقلم او مسمار او مرايا العربية من الاخر اصبح شكلها شاذ مش عارف اعمل ايه ا
اكتر من واحد نصحني اجيبلها بوليش بس قالولي انها عاوزة متخصص في تلقيطها بحيث انه ياخدها كلها مش مكان الخدش بس ... ايه الحل انا حاولت اجيبلها قلم دوكو بس للاسف طلع لونه سيلفر ومعرفتش اظبط اللون انا عربيتي فيراني ميتالك ...

حاجة تانية في اماكن من البيبان محكوكة حكة صغيرة وداخلة لجوة هل دي عاوزة سمكري او هتترش ولا ايه حلها ..من الاخر انا عاوز اظبط العربية بحيث انها تكون لسة عروسة جديدة ايه الحل افيدوني افادكم الله

**spiderloking** · 03-07-2011 10:06 PM

بالنسبه للقلم الدوكو مشروع فاشل و بلاش منوا لأنو مجرب

بالنسبه للخدوش انواع في خدوش سطحيه نتيجه غطاء العربيه او التراب اللي بيجي في العربيه و انت ماشي و ديه بتكون خدوش خفيفه جدا و ديه بتتشال بالبوليش عادي جدا

النوع التاني من الخدوش و هوه لما تحك في عربيه تانيه او عربيه تحك فيك فاللون بتاع العربيه التانيه بيطلع عندك و ده بردوا بيتشال بالبوليش و سهل بردوا

النوع التالت و ده الصعب شويه لما حد يحك فيك او حد يحكلك العربيه بمسمار او اي حاجه و الدهان عندك انت اللي يطلع و تحس ان الخدش كدا داخل لجوه شويه مش سطحي يعني و ده علاجو الوحيد انك تجيب دهان بنفس لون العربيه بالظبط و ده بيتعمل عند اي حد بتاع دوكو بيعمل الدهان ده بالكمبيوتر بياخد رقم الدهان بتاعك من اللوحه اللي موجوده لما بتفتح كبوت العربيه هتلاقي لوحه عندك ايما في الكبوت او في صدر العربيه من جوه هتلاقي عليها رقم هوه بقي بياخد الرقم ده و يعملك تمن كيلوا دهان تاخد قطنه و تعمل انت بنفسك الخدوش ديه بس تحاول تمشي علي الخدش بس و بكدا ترجع العربيه زي الاول

في حل كمان بس غالي شويه و هو انك تودي العربيه كار كير نضيفه شويه في بنزينات بتعمل الخدمه ديه بحوالي 150 جنيه تقريبا ممكن اقل شويه و بيرجعلك العربيه زيرو زي ما كانت هوه بيعملها بالصاروخ الاسفنجي و البوليش بس كدا يا رب اكون فدتك بحاجه

**a7mednour** · 03-07-2011 10:17 PM

تسلم يا باشا على سرعة الرد وانا هحاول اظبط موضوع الدوكو ده عند اي حد ... بس استفسار صغير معلش ..لاني اناشغلي في المنصورة وما اقدرش اروح القاهرة هل في فرع لكار كير في المنصورة ؟؟؟ تقبل تحياتي

**spiderloking** · 03-07-2011 10:41 PM

انا مليش في المنصوره اووي بس هسألك ناس في المنصوره ان شاء الله و ارد عليك او نشوف لو في حد هنا في المنصوره ان شاء الله الاستاذ احمد غنيم يدخل يرد علي حضرتك هوه من المنصوره و معانا هنا

**ykdl** · 04-07-2011 01:42 AM

طبعا يا باشا فى كار كير فى المنصورة
فى واحد عند مجمع المحاكم
وفى واحد عندنا فى بلقاس لسه فاتح جديد
بيعمل الكار كير كلها ب 125 جنيه بس
وشغله نشيف وابترجع العربية عروسة فعلا
بيعمل فى الاكار كير ده
1 غسيل من برة وجوه وتحت
2 غسيل المكنة بفوم
3 تنضيف سقف العربية من الداخل
4 تنضيف الكراسى والطابلوه(بترجع زى الزيرو)
5 بيلمع الكاوتش والجنوط بمادة معينة بترجعه جديد كانها خارجة من المعرض
6 بينفخلك العجل نيتروجين
7 بيحقن الكراسى بمواد عطرية بتخلى ريحة العربية معطرة حوالى اسبوعين
8 وش بوليش وتلميع وبعيده وش واكس
بس كده وبسسلم العربية زيرو يا باشا
لو حبيت تيجى اللى فى بلقاس ده ابقى عرفنى بس وابقى روح شوف اللى فى مجمع المحاكم برضه
ورقمى 0115271291
وتحت أمر حض

**ykdl** · 04-07-2011 01:43 AM

وتحت أمر حضرتك فى أى وقت
أحمد غنيم

**big_shico** · 04-07-2011 05:27 AM

مين احسن واحد في القاهرة ممكن يعمل الكلام ده كله

**spiderloking** · 04-07-2011 05:40 AM

المشاركة الأصلية كتبت بواسطة big_shico

مين احسن واحد في القاهرة ممكن يعمل الكلام ده كله

في كريزي كار في السلام ورا مستشفي السلام دول نضاف اووي

وفي في الهرم بنزينه موبيل

و في امارات مصر تقريبا برضوا علي مصر اسكندريه

بنزينه الوطنيه الي عند مسجد السلام الي جنب سوق العاشر

ايكسبلوشن كار كير 2 أ ش زكريا عثمان متفرع من ش احمد الزمر - الوفاء والامل
معالم الطريق: امام محطة بنزين الوطنية
مدينة نصر, القاهرة
التليفون:
-012-0139090, 012-2236299

**kamatsho** · 04-07-2011 07:06 AM

طيب بالنسبة للخبطات البسيطه اللى البويه بتاعت العربيه بتتشال منها نظامها ايه بيعملوها برضو ؟؟

انا عندى كام خبطه ورا بسبب الموتيسكلات بتحك الأكصدام وتشل البويه لجزء صغير 7س x س7

وعندى خبطه فى الجنب من ادام من ورا الاكصدام الامامى على طول

ياترى يعملوا الخبطات وممكن تتكلف كام ؟

**a7mednour** · 04-07-2011 07:38 AM

المشاركة الأصلية كتبت بواسطة ykdl

طبعا يا باشا فى كار كير فى المنصورة
فى واحد عند مجمع المحاكم
وفى واحد عندنا فى بلقاس لسه فاتح جديد
بيعمل الكار كير كلها ب 125 جنيه بس
وشغله نشيف وابترجع العربية عروسة فعلا
بيعمل فى الاكار كير ده
1 غسيل من برة وجوه وتحت
2 غسيل المكنة بفوم
3 تنضيف سقف العربية من الداخل
4 تنضيف الكراسى والطابلوه(بترجع زى الزيرو)
5 بيلمع الكاوتش والجنوط بمادة معينة بترجعه جديد كانها خارجة من المعرض
6 بينفخلك العجل نيتروجين
7 بيحقن الكراسى بمواد عطرية بتخلى ريحة العربية معطرة حوالى اسبوعين
8 وش بوليش وتلميع وبعيده وش واكس
بس كده وبسسلم العربية زيرو يا باشا
لو حبيت تيجى اللى فى بلقاس ده ابقى عرفنى بس وابقى روح شوف اللى فى مجمع المحاكم برضه
ورقمى 0115271291
وتحت أمر حض

متشكر جدا يا استاذ احمد وانا يشرفني اني اجي لحضرتك ...بس والله شيء كويس اللي كار كير بيعمله بس الاستفسار الاهم اللي عاوز اعرفه لو في بعض الحكات ادت ان البيبان او اجزاء من الصاج تدخل لجوة ... خصوصا بحسها لما اقفل الباب او ادوس عليه من النص بحس انه بيطبل هي حكات خفيفة الحمد لله بس برده شكلها مش لائق لو يداويها كار كير يبقى اروحله من النهاردة على طوول ...
وربنا يوفقكم لكل خير