الموضوع: بفكر جديا انى اسيب الشغل ورزقى على اللة

لأ طبعا و لا تسيب الشغل و لا تهمل فيه.

النقطة الأولى موضوع انك تسيب الشغل عشان مش كويس.
طيب هيبقى ايه البديل.
هتقعد فى البيت...عارف انك هتقول انك هتدور. طب مهو ممكن كنت تدور و أنت شغال. هتقول مش طايقهم هأقولك لو قعدت فى البيت هيجيلك أكتئاب بعد كام يوم و هتبقى مش لاقى حاجة تعملها و أعصابك هتتعب بزيادة أكتر من الأول.
فخليك أحسن خصوصا أن الظروف دلوقتى مش مستقرة. بس دور و أنت شغال كأنك بتدور و أنت فاضي.

بالنسبة للأهمال فالمفروض تحاول تخلص فى شغلك...مش عشان هم مش بيدوك كفاية لكن لأنك انسان جدي فى الشغل.
لما تهمل فى شغلك فبالاضافة الى انك هتعمل سمعة مش كويسة ليك هتكسل و هتتعود عالراحة. هم مش هيخسروا لو مشوك هيجيبوا غيرك تانى يوم لكن انت ممكن متلاقيش شغل تانى يوم دي حاجة علمها عند الله. فكر بعقلك

بص يا اخى هاقولك نصيحة اولا انت بتشتغل و ارتضيت بمبلغ معين هو مرتبك يبقى تشتغل بما يرضى الله مش عاجبك المرتب بتشوف وظيفة تانية و انت قاعد فى شغلك و اصبر حتى تزيد او تلاقى شغلانة احسن و خللى بالك فى ملاحظتين مهمين جدا:

1-شغل و انت قرفان احسن من قعدة البيت فى كل الاحوال
2-لما تعمل شغلك بضمير تبقى ليك سمعة كويسة تسبق لاى مكان تانى هتروحه انما لو بتشتغل بقرف لما تروح مكان تانى ممكن يسالوا عنك يعرفوا انك ماكنتش شغال كويس و ممكن مايسالوش عن سبب ده فيكرهوك بدون ذنب منك

و فى الاخر لو صحيح مظلوم فى مرتب تذكر دايما الاف الناس القاعدة فى البيت من غير و لا مليم و تتمنى مرتبك اللى مش عاجبك و احمد ربنا يقوم ربنا يزيدك و يكرمك

لو سبت شغلك هتندم
البلد كان مفيهاش شغل
بعد 25 يناير ناس كانت شغاله وقعدت
يعنى هتسيب شغل وتقعد فى البيت
على فكره صعب تلاقى حد مستريح فى شغله او راضى عن مرتبه

حضرتك قبلت الشغل بالمرتب ده وربنا كتب لك الرزق ده

ارضى بيه وربنا يبارك لك فيه وتوكل على الله

لكن طبعا وده الشىء الاكيد انك عرفت انك ممكن يكون ليك نصيب فى مكان احسن بمرتب احسن فى وقت معين علمه فى الغيب

استمر فى شغلك واجتهد فيه لحد ما تظهر فرصه احسن ووقتها مش هتتردد

بس اوعى تسيب شغلك وخاصه فى الوقت ده بدون بديل لانك ممكن تضطر للقبول بما هو اقل

المشكلة انى عارف ان مفيش فرص تانية خالص حاليا
عموما انا شاكر ليكم جدا الموضوع انى امبار كنت فى حالة هياج عصبى وكنت بكسر كل حاجة حوليا بسبب الضغط المستمر لفترة طويلة رغم انا هادى جدا وبقابل كل المشاكل مهما كانت ظروفها فعلا بهدوء لاانى مؤمن ان العصبية مش هتفيد وانى طول ما انا هادى هقدر احل المشكلة
لكن مع الضغط على دماغى فى موضوع خاص كدة لااكتر من سنتين وبخلاف الشغل نفس المدة تقريبا
كانت الحاة دة
ربنا يخليكم بجد انا بعتبر كل الاعضاء اخواتى وبحب انى افضفض معاكم
وححاول اجتهد تانى فى الشغل وربنا يوفقنى الى الاصلح

إياك والإهمال في العمل.
وربنا كبير.