الف سلامه علي حضرتك وان شاء الله ربنا يشفيك
اكيد انا مش هوصل للدرجه دي وهما اصلا عايزيني كام شهر في الأول والمدير بيقولي عايزيني سنه فانا بقول دي تبقي فتره اشوف ايه النظام هناك والموضوع هيبقي مستاهل ولا لآ
بس قلت اشوف رايكم ايه
عرض للطباعة
طبعا القاهره الشغل فيها احسن كتير من اسكندريه بس حط فى دماغك حاجه مبدئيا
السكن هناك غالى فحت يعنى اعفن شقه مش حتقل عن 1200 جنيه ده لو لاقيتها اصلا
عندك استعداد تسافر كل اسبوع مع اسرتك منم القاهره - كفر الدوار بالاضافه للمصاريف
القاهره زحمه فى كل الاوقات طول السنه انما اسكندريه بتتزحم شهلاين الصيف بس وطبعا فى اسوء حالاتها احسن من القاهره
انا اعرف ناس كتير سافرو القاهره عشان شغل ونفسهم يرجعوا اسكندريه حتى لو بنص المرتب
لو عاوز نصيحتى لازم مرتبك يزيد 2500 جنيه على الأقلعشان تعيش كويس وتحس ان البهدله مجزيه معاك غير كده بلدنا اولى بينا
طبعا الاستخارة رقم واحد.
رأيي الشخصى روح طبعا .. القاهرة مركز الشغل كله .. علاقات أكتر و تعامل مع ناس أكتر و خبرة أكتر .. و ممكن تلاقى شغل فى حتة تانية أحسن عن طريق علاقاتك مع العملاء .. أو بسهولة تدور على شغل فى مكان تانى.
و ربنا يوفقك لما فيه الخير.
مبدئيا انا كده عرفت انت في شركة ايه :)
ثانيا احب اقولك ان انا احنا جيران في اسكندرية لاني اصلا من سيدي بشر
و جيران ان شاء الله لو جيت القاهرة لان شركتي برضو موقعها في مبنى كبير في المنطقة الحرة
ده غير اني تقريبا نفس ال title بتاعك (System Analyst )
بس انا الشركة اللي انا فيها ملهاش فروع في اسكندرية
المهم
بما اني اسكندراني و كل اسبوع او اتنين في اسكندرية اقدر اقولك و بكل ثقة تعالى القاهرة
اسكندرية خلاص بقت زحمة جدا و مقفولة اوي
انا اليومين اللي بروحهم ببقى على اعصابي من السواقة
بعكس القاهرة مبحس بالزحمة خالص
طبعا ناس كتير حتستغرب بس السبب اني ساكن في القاهرة الجديدة و دلوقتي انت مش محتاج تخرج براها الا قليل جدا
و كمان المسافة من القاهرة الجديدة الى المنطقة الحرة 15 دقيقة بالعربية
نصيحتي ليك انك تحاول تشوف موضوع بدل السكن ده بحيث مايقلش عن 1500 او 2000 و لو حتأجر شقة يبى في القاهرة الجديدة مش في اي مكان تاني عشان ماتزهقش من الزحمة
واي استفسار انا في الخدمة
حضرتك تقريبا نفس تفكيري
انا اولا مش هسكن علي حسابي يعني الشركه هي اللي هتجيلي شقه والمفروض اني هتكلم معاهم في فلوس ذياده كمان بس في اسوأ الظروف هيبقي السكن والمواصلات عليهم
انا برده لو سكنت هبقي في مكان قريب وسكته سالكه
زميل ليا لسه ناقل هناك وقاعد في الزهور او الزهراء تقريبا وبيقولي انه مش بياخد 10 دقائق ومفيش زحمه ولا حاجه
انا علي فكره شغال في itworx
انا معاكم في موضوع الزحمه لو انا همشي كتيير جوه البلد زي الأسكندريه مثلا انا مشيي كله من علي الدائري مش بروح من لا من ابوقير ولا البحر عشان الزحمه وانا كده كده مش بخرج كتيير
عايزين بقي بقية الناس نشوف راييها ايه
طيب كده اتنين اسكندرانيه في القاهره ومبسوطين
ياتري بتنزلو تشوفو اهلكم كل قد ايه؟
والله حسب الظروف
بنزل اسكندرية كل اسبوعين او ثلاثة و ساعات كل شهر مرة
اكيد زميلك قصده على زهراء العاشر (مدينة نصر ) هيا منطقة كويسة و قريبة جدا من المنطقة الحرة
بس انا فضلت القاهرة الجديدة (التجمع الثالث او الخامس) اسعار الايجارات هناك نفس اسعار الزهراء لكن مع فرق الهدوء و النظام بما انها مدينة جديدة
طبعا التجمع الخامس لو مش عمارات الجهاز حيكون الايجار اعلى كتير
هو فعلا زهراء مدينة نصر