الموضوع: عايز اركب الوميتال

المشاركة الأصلية كتبت بواسطة شريف

السلام عليكم

عايز اركب الوميتال للبلكونه و الشبابيك بس مش عارف ايه اللي الواحد ممكن ياخد باله منه
انا فاهم ان في انواع كتيرة سعد و بي اي و جامبو و فروقات اسعار كتيرة بس هو في منطقه معينه مشهورة يالالوميتال و الاكسسوارات من السبليونه و السكاك و انواع كتير منها الجيد و الردي و الزجاج كمان العاكس و الفاميه
انا عايز اشوف الحاجات الاكسسوارات دي بتركب فين

معلهش طولت عليكم

افيد حضرتك بالتالى :-
1 - قياس الالوميتال بالمتر المربع .
2- انواع الالوميتال كثيره تبدا من 250 الى 1000 جم حسب اختيار حضرتك - يعنى عاوز عازل للصوت و الاتربه بشكل فعال - قطاع خفيف او ثقيل - الوان و الا لون خشبى ..........و اخيرا نوع ضلفه السللك بتاع الناموس و الذباب اللى بتركب براه.
3 - يوجد صديق لى عنده ورشتين بجسر السويس و اسعاره و جودته مناسبه جدا . اذا حبيت ابعتلك تليفونه و قارن اسعاره و اتاكد انك هتحصل على نفس نوع الاككسسوارات ( الالوميتال واحد - اللعب و الفرق فى الاككسسوار - جوده الدهان - سمك الزجاج..
4- انصحك لما تعمل الوميتال البلكونه راعى الاتى :-
- اذا كان البحر كبير اكبر من 4 متر مثلايستحسن تبنى طوبه يمين و طوبه شمال علشان الحلق يتثبت كويس.
- لو مافيش كمره علويه يتثبت عليها الحلق - يتم تثبيت الحلق بمسامير فيشر 10 ملم على الاقل كل 50 سم علشان الحلق ميريحش و تلاقى الضلفه بتفتح بصعوبه.
- البند السابق لو الماليات متوفره انصحك بوضع كمره اسمنتيه ( بتتباع فى حدود 100 جم ) على الكتفين اليمين و الشمال و دى بتدى صلابه و عزم للحلق العلوى عند التثبيت و اذا قدر الله و السيوله موش كافيه - يبقى كما البند السابق كل 50 سم على الاقل مسمار 10 ملم.
- الحلق الخشب حتما و لابد ما يقلش عن 2 بوصه - و الخشب لابد يكون درجه اولى.
- تركب المنشر بشكل مائل للاعلى لسهوله نشر و لم الغسيل بطول ظاهر 60 سم 5فتحه حبل و ده جيد جدا .
- لو الغرفه اللى هتركب لبلكونتها اضاءتها ضعيفه - يبقى الزجاج ابيض و تركب تنده لون فاتح علشان تدخل الاضاءه و العكس صحيح.
- متنساش تركب كوابيل الستائر مع تركيب الحلق علشان كله يبقى ماشى مع بعضه .
-البلكونه لو المحاره بتاعتها موش مضبوطه و فيها شطرات كتيره يبقى الاحسن ليك قطاع الالوميل علشان فيه رجلاش للضبط .
- متوسط اسعار :-
قطاع bs المتر بزجاج فيميه و اككسسوار زى الكتاب مابيقول بسعر 550 جم
قطاع tango 550 جم
الوميل صغير 600 جم
الوميل كبير 750 جم
جامبو 750 جم

و لو نويت ان شاء الله تكرم
دمت بود[/QUOTE]

المشاركة الأصلية كتبت بواسطة شريف

شكرا علي المعلومات القيمه

العفو يا افندم