الموضوع: نصيحه من ساكني مدينه الرحاب

المشاركة الأصلية كتبت بواسطة hisham80

لو سمحتم يا جماعه كنت بفكر اشوف حاجه في الرحاب المراحل الثامنه السابعه السادسه وكنت عايز اسأل عن كام حاجه

هل في مشاكل في ميآه الشرب انها ضعيفه ومبتوصلش للأدوار العليا

هل المراحل دي فيها أي نوع من المشاكل كموقع تصميم

الارض عليها مشكله زي مدينتي ولا لأ
مشكله وديعه الصيانه تم حلها وهل في مشاكل في الصيانه عموما
جهاز المدينه في كلام ان في مشاكل

لو حضرتك مكاني تشوف حاجه بره في التجمع ولا الرحاب افضل خصوصا أن بقلها فتره والخدمات موجوده

الوضع الأمني في المدينه

معلش طولت في الاسئله بس الواحد مش كل يوم هيشتري شقه وشكرا مقدما

توكل على الله ومتخافش
مافيش مشاكل مياه فى الرحاب تحديداً ، عادى الميا بتوصل لجميع الأدوار بدون فرق ولما بتقطع بيكون عادى بنفس معدل القاهرة الجديدة ، الرحاب مالهاش محطات مياه جايبالها من النيل مخصوص مثلاً ، إنما مربوطة على شبكة التجمع الخامس وبالتالى لما بتقطع بتقطع على الكل ، وبشكل عام دى حاجة مش متكررة
المدينة بشكل عام ماحصلش عليها أى كلام بالنسبة للأرض زى مدينتى
الناحية الأمنية هى أكبر ميزة فيها إلى الآن لا تقلق
تقصد إيه بمشكلة وديعة الصيانة ؟ وديعة الصيانة لازم تتدفع وإلا هيصرفوا إزاى على الأمن والتشجير والرصف وطلاء العمارات وغيره ؟! يعنى الطلبات لازم تكون بالعقل ، الناس اللى بتشتكى من الصيانة طمعانين يرجعوا أى قرشين وماسألوش نفسهم طيب لو بطلوا يعملوا الخدمات دى يبقا كان ليه أصلا اشترينا فى الرحاب بأسعار أغلى من برة
جهاز المدينة مش وحش ، فيه ناس دايماً تتحامل عليه لو المياه قطعت بس زى ماقولتلك هم هيعملوا إيه يعنى ؟ هم مش بيجيبوا المياه من النيل للرحاب ، الشبكة دى بتاعت القاهرة الجديدة كلها ، إنما هم ليهم دور وااضح فى الصيانة والأوتوبيس والبوابات وهكذا
بالنسبة للمراحل فى رأيى الشخصى المرحلة الرابعة هى أفضل مرحلة من حيث الشكل الخارجى والتصميم الداخلى للشقق ، مع العلم انا مش ساكن فيها عشان لا أتهم بالتحيز

المشاركة الأصلية كتبت بواسطة محمد الجرجاوي

إتوكل على الله يا باشا وإشترى مافيش اي حاجة وكلوا تمام ولو معاك كاش
خلص في حاجة جنب النادي او منطقة الفود كورت
وفرصة اليومين دول الاسعار مهاوده على الاخر

بلاش جنب الفود كورت أوى عشان مشاكل الدوشة والركنة والروايح اللى طالعة من مداخن المطاعم ، وبشكل عام المرحلة الأولى والتانية هم أقل نسبياً من اللى بعدهم

المشاركة الأصلية كتبت بواسطة honda4ever

تسمحلي أسأل بكام؟

أسعار دلوقتى الكاش بحوالى 5 الاف المتر والتقسيط ال 4 سنوات ب 5 ونص تقريبا ، ال 6 بحوالى ستة ونص ، وال 10 سنين بحوالى 7 ونص ، وطبعاً فيه رينج لكل حاجة حسب المرحلة والدور والفيو ولو فيها تشطيبات إضافية ، ولو فيه حديقة بالنسبة للأرضى متر الحديقة ب الف ونص

المشاركة الأصلية كتبت بواسطة sakrouz

يا باشا الرحاب ذى الفل وكل مخاوفك مش موجوده بس انا مع راى الاخ انك تحاول تاخد حاجة فى مرحلة من الى ساكنه وفى ناس بتبيع وبيكون عليها اقساط فبتاخد جزء كاش + اوفر وانتا تكمل الاقساط وفى مكاتب سماسره كتير جدا فى السوق داخل الرحاب ممكن يجبولك حاجة على اد الفلوس الى معاك

ده حل ممتاز وموجود منه كتير ، بس ماتنساش إنك هتنقل الملكية بمصاريف 8% من ثمن الشقة الأصلى ، يا إما لو مش هتنقل هتفضل تدفع باسمك المالك القديم (البايع) وده مش امان اوى من الناحية القانونية (برغم التوكيل الغير قابل للإلغاء وكل الكلام ده)

المشاركة الأصلية كتبت بواسطة hoska99

معلش يعنى ايه اوفر

يعنى واحد دفع فى الشقة 100 وهى النهاردة تسوى 150 مثلا بس استلام بعد كام سنة فيقولك هاخد اللى دفعته واوفر 30 فوقهم مثلا وتستلم دلوقتى

المشاركة الأصلية كتبت بواسطة hoska99

ياريت لو حد ساكن فى التجمع - رحاب - مدينتى - شروق يقولى خبرته فى الموضوع ده
http://www.nilemotors.net/nile/231419-a.html

الموضوع ده حضرتك بتاخد شقتين عبارة عن ربع فيلا ، يا ارضى وبدروم يا اول وروف ، مساحة الوحدة بتبقا 180 متر ما عدا الروف بيبقا اقل حاجة بسيطة ، والتسليم بيبقا على المحارة فى احسن الاحوال والدفع 40٪ مقدم والباقى على سنتين ، ده النظام اللى ماشى ، والاسعار تتراوح من 550 الى 700 على المحارة ، وطبعا مفهوم عشان تشطب شقتين مساحتهم حوالى 300 متر محتاج على الاقل 150 الف

المشاركة الأصلية كتبت بواسطة honda4ever

شكرًا جزيلا يا أفندم وبارك الله فيك :)

ربنا يبارك فيك

المشاركة الأصلية كتبت بواسطة hisham80

شكرا لرد حضرتك الوافي طيب ينفع اشتري في لمرحله الرابعه وقسط ولا القسط للمراحل الجديده

طبعا ممكن كل حاجة ، ماهو اللى شارى فى المرحلة الرابعة من 4 سنين مثلا وكان شارى على نظام 6 او 10 سنوات يبقا لسة ماخلصش ثمن الشقة ولسة باقى اقساط ، بس هيبقا مطلوب نسبة كبير كاش والقسط اللى فاضل غالبا مش هيبقا كبير ، غير الخامسة مثلا ممكن يبقا دافع جزء بسيط عشان لسة جديدة ومعظم المبلغ على اقساط

المشاركة الأصلية كتبت بواسطة evo

الرحاب منطقة راقيه ومميزة عن باقي القاهرة وأنا شخصيا امتلك فيها لكن في رأيي لو مش ناوي على حاجة مميزة جدا تخليك في التجمع

فبجانب إنك ممكن تجيب شقة شبه معقولة في الرحاب(المتر بـ 5500 جنيه و 6000 جنيه في بعض الاماكن) إنت ممكن بنفس التمن تجيب دوبلكس في التجمع دورين ومنفصل مع حديقة خاصة وبردو تقسيط

والفرق بين الاتنين شارع تقريبا صحيح مازلت الرحاب مميزة ككمباوند مقفول لكن ليك حرية الإختيار

فيلا دبلكس بحديقة خاصة في التجمع
ولا شقة في الرحاب بنفس التمن !

فعلا شقة فى الرحاب 160 - 180 متر تساوى ثمن شقتين فى التجمع كل واحدة 180 متر بس على المحارة ، ارجع لردى على العضو السابق لمعرفة نظامهم ايه

المشاركة الأصلية كتبت بواسطة hisham80

شكرا على رد حضرتك هيا الرحاب انسب لاني مسافر بره مصر ومعنديش وقت ادور على حاجه في التجمع طيب حضرتك عندك فكره 3ن كمبوند عمله البنك الاهلي اسمه the square في التجمع

الرحاب احسن فعلا الا لو عيلة كبيرة زى زوجة واولاد والوالدة مثلا يبقا تاخد شقتين دوبلكس برة