دلوقتى انتشرت ظاهره جديده فى العربيات بطريقه مرعبه

ظاهره شيل النمر وامشى ومحدش حيعملك حاجه

اه شيل النمر من العربيه خااااااااااااالص وامشى ده محدش حيكلمك

يوميا اشوف من عربيتين ل 5 او 6 عربيات ماشيه من غير نمر

واللذيذ كمان ان الاخوه (مشيها الاخوه ) الليبين كمان ماشين من غير نمر او بالنمر بتاعه ليبيا ومش حطين النمر بتاعه جمرك السلوم وانتو عارفين اللبين منتشرين ازاى فى اسكندريه
وعارفين برضه اخلاق اللببين عامله ازاى يعنى اخبط واجرى اعتدى على واحده او اخطف واحده واجرى ومحدش حيعرف يجيبك

المهم ندخل فى الموضوع



انهارده كالعاده شفت كذا عربيه بس لجل الحظ وانا ماشى باليل وطالع من اشاره بتاعه سيدى بشر على البحر وامامى عربيه تمبرا حاطط استيكر اسود على الكبوت وشايل النمر المهم فضلت ماشى وراه تاتا تاتا و فى التقاطع بتاع الاشاره لقيت عسكرى مرور
طبعا العسكرى ولا ليه دعوه بالدنيا دلوقتى وكتر الف خيره انه واقف فى الاشاره اصلا
بعديه لقيت فى التقاطع ونش المرور واقف وفوقه عسكرى وجنبه ظابط

العسكرى اللى فوق الونش شاف العربيه اللى ادامى اللى من غير نمر وبصلها وداير وشه ولا كأن فيه حاجه ولا قال للظابط اللى واقف

انا قولت لا كده مينفعش ده هبل واستعباط رسمى رحت مطلع راسى من الشباك ومكلم الظابط وقولتله العربيه دى ماشيه من غير نمر وانا مشاور عليها وهى ادامى

راح كتر الف خيره الراجل مشكورا انه بص على العربيه وراح مداير وشه ليا وفاتح ايده هازز راسه معبرا عن جمله وانا مالى حعمل ايه

تخيلو ده الرد بتاع ظابط مرور
تخيلو اننا وصلنا لمرحله ان الظابط يهز راسه انه وانا مالى حعمل ايه ومش هاين عليه حتى يرد عليا رد مقنع

ايه ده هو خلاص حياه الناس بقت رخيصه كده اوى اوى
اه حياه الناس لان لما العربيه دى حتخبط حد من اهلى وتجرى ولا حد حيعرف يجيبها
انتو عارفين كام واحد بيتخبط فى طريق البحر هنا فى اسكندريه فى اليوم الواحد
حد يقوللى لو العربيه دى خبطط او وقفت وخطفت واحده ماشيه ايه اللى حيحصل عادى طبعا ولا حاجه حتحصل

عشان خلاص بقت هى دى مصر

بالله عليكم حد يقوللى الحل ايه عشان خلاص حطق