الموضوع: عربيتي إتخبطت جوه التوكيل

النهارده كنت في توكيل العبور بعمل صيانة ال 30 ألف و إللي حصل كالآتي : -
1 ) دخلت الساعة 11 و نص قابلني المهندس بهجت , تقريبا إسمه كده ( صيانة 30 ألف + كشف على التيل )
2 ) الساعة 1 إتصل بيا وأنا قاعد فوق قالي التيل محتاج تغيير و في كوعة في دورة الميه بتسرب هنغيرهالك بس الموضوع هياخذ وقت ولا تحب تيجي في يوم تاني قولتله لأ ماشي خد وقتك .
3 ) الساعة 3 بلغوني إن العربية خلصت , نزلت لقيت العربية مش واقفة قعدت أستنى لقيت كل إللى كانوا بعدية و قاعدين في الإستراحة فوق نزلوا و عربيتهم بتطلع و أنا لسه , قلت بيني و بين نفسي مش مشكلة جايز بيغسلوها غسلة كويسة .
4 ) العربية خرجت الساعة 4 و عشرة و مفيش عميل غيري المهم خدت العربية و كنت مستعجل و طلعت على السوق علشان كنت عايز أجيب قفص مانجة لرمضان .
5 ) و صلت السوق و قعدت أدور على طلبي لغاية لما لقيته و أنا راجع شايف العربية من بعيد و كل لما أقرب ألاقي وش العربية مش مظبوط .
6 )الطامة الكبرى , العربية واخدة خبطة في الإكصدام تحت الفانوس الشمال بطول الإكصدام بالطول من الفانوس لغاية فانوس الشبورة زي ما يكون دخل في عامود و اتعملت و اترشت حاجة أي كلام بس واضحة للي عارف عاربيته و طبعا الإكصدام مفارق و حاجة زفت
7 ) الساعة تقريبا خمسة إلا ربع قلت ألحق أرجع بسرعة .
8 ) وصلت طبعا بتخانق و بزعق ( هو أنا جاي التوكيل و بصرف ألفات في الصيانة علشان العربية تتخبط و كمان تشتغلوني
و تعملوها من وراية و تلبسوني العمة , طبعا المهندس بهجت و المهندس عبد الحليم هدوني و راجعوا الورق و اتأكدوا إني مش بتبلى عليهم و إن فعلا الكلام ده حصل .
9 ) كتبولي تعهد بالإصلاح .
بس أنا مش مطمن فيدوني أعمل شكوي في رينو فرنسا ولا في رينو مصر و لا أعمل إيه برجاء الإفادة يا جماعة .