طبعا زى ما انتوا شايفين انى عضو جديد ومحدش سمع عنى قبل كدة ولا حتى فى طبق اليوم

كان نفسى نتعرف فى موضوع احسن من كدة بس حظى كدة بقى

المهم عشان ماطولش اكتر من كدة ندخل فى الموضوع

باختصار انا شارى لوجان 2010 مستعملة من واحد حبيبي ولسا مكملتش أسبوع معايا
وكنت فى زيارة عائلية امبارح وللاسف اضطريت أسيب العربية تحت عمارة بتتبنى وللاسف الأكبر سمعت كمان ان فى خناقة قامت فى المكان هناك
والمشكلة الاكبر انى معرفتش بكل دا غير تانى يوم الصبح وانا مروح

اما باتنسبة للخساير بقى (الى انا لحد دلوقت مش عارف هى بسبب مين بالظبط)
فالنتيجة كانت خبطة عجيبة كدة وصلت لحاجة زى قطع فى الكبوت دا بخلاف الفانوس الأمامي الشمال وشرخ خفيف كدة فى الاكصدام

طبعا رحت لسمكري واتنين وكان الرد ان الكبوت دا مش نافع تانى وهى دى المشكلة الى مجننانى وخلتنى أعرف قيمة التأمين الى اتحرمت منه

وقلبت الدنيا على كبوت استيراد عشان يكون نفس اللون لكن مش لاقى
فرجاء خاص لجميع الاخوة الاعضاء والغير أعضاء و أى حد يعرف أى حاجة ياريت لو حد بعرف حد بيبيع كبوت استيراد للوجان يقولى على طول

وبالمناسبة أحب أشارككم بالأسعار الى انا لقيتها لحد دلوقت:
التوكيل : الكبوت 1300 جنيه بدون مصنعية تركيب أو دوكو وبدون ضريبة مبيعات
محلات قطع الغيار الجديدة: سعر الكابوت يتراوح بين 550 و 700 وكل واحد بيديني سعر على كيفه

الفانوس فى التوكيل 600 جنيه وخارج التوكيل من 370لغاية 400 جنيه

ولو تسمحولى بقى اخد رأيكم فى حاجة كمان (وكعادة كل المصريين) عايز منكم تقييم لسعر السيارة دى عشان اعرف تستاهل فلوسها ولا ايه : رينو لوجان 2010 -هاف اوبشنز- عاملة 28000 كيلو - مكانش فيها خربوش للأسف - وكل حاجة فيها تعمل بكفاءة - ومكانتش عايزة مصاريف ولا جنيه واحد


شكرا مقدما لكل الى هيدخل ويدينى رأيه واسف انى طولت عليكم