الموضوع: بيان المجلس الاعلى : حدث ما توقعته

اولا ده نص البيان

<A href="https://%3cobject%20width=/" 425? height="350">

ثانيا البيان ده صدر بعد يوم من بيان الدكتور عصام شرف



و الذي كان الرد علي ما فيه صدمه لي و لملايين الشعب المصري

المتظاهرين او المعتصمين قاموا برفع الاحذية!!!! و اعتبروا كلام الدكتور عصام اهانة لهم!!!!!!!!!!!!!!!!!!!!!!!!!!!!!!!

انا مش عايز اشتم او اغلط لكن رد المعتصمين كانت اكبر صدمة ليا في جميع احداث الثورة المصرية

الدكتور عصام اصدر قرار بتلبيه مطالب المعتصمين راحوا اتريقوا عليه و قالوا عايزين جدول زمني
راح اصدر بيان واضح فيه جدول زمني واضح

3 ايام لاقالة قيادات الداخلية المتهمة بقتل المتظاهرين

اسبوع لتعديل وزاري يطرد فيه جميع وزراء الحزب الوطني و يحيى الجمل

10 ايام تغيير المحافظين الغير مرغوب بهم!!

قرارات تنفذ فوريا: تخصيص محكمة متفرغة لقضايا الفساد و المتهمين بالقتل للثوار - علانية المحاكمات - انشاء صندوق رعاية ضحايا و اسر شهداء الثورة - اصلاح هياكل و المؤسسات الاعلامية و الصحفية

و كان الرد مش عاجب المعتصمين و بيهددوا بالتصعيد!!!


انا كنت متأكد 100% ان قرارات الدكتور عصام كانت بعد مشاورات و فصال عنيف مع المجلس العسكري الذي يرفض تقديم تنازلات لانه يعلم ان مع تقديم تنازلات الناس سوف تطالب بالمزيد و سندور في حلقة مفرغة
لكن لان المطالب كانت في غلاف انساني و شرعي اصر الدكتور عصام على تنفيذها و اخيرا وافق المجلس عليها

لكن رد الفعل فعلا فاق الحد - انا مصدوم - و رد فعل المجلس العسكري انا كنت متوقعة و متوقع اكثر منه كمان للاسف - زي الاب لما يقعد يدادي في ابنه و يطبطب عليه و اخر ما يزهق يقوم يضربه - انا كان نفسي ما نوصلش للمرحلة دي - لان لو مدوا ايديهم علينا مش حيبطلوا ضرب و حتبقى دي الوسيله الافضل لهم - و حنرجع لزمن كان نفسي ننساه و نتجاوزه
امتى حنعقل ؟؟؟؟

اي حد مؤيد للاعتصام او معارض لكلمة الدكتور عصام شرف يا ريت وضح لي سبب اعتراضك و ما هي المطالب الغير مشموله في الخطاب و هل ما تم اغفاله يستحق التصعيد و الاهانات من المعتصمين تجاه الدكتور عصام و المجلس؟


ارجو الرد

المشاركة الأصلية كتبت بواسطة mmffor

اولا ده نص البيان..................

انا كنت متأكد 100% ان قرارات الدكتور عصام كانت بعد مشاورات و فصال عنيف مع المجلس العسكري الذي يرفض تقديم تنازلات لانه يعلم ان مع تقديم تنازلات الناس سوف تطالب بالمزيد و سندور في حلقة مفرغة

..................


ارجو الرد

السلام عليكم و رحمة الله و بركاته

الموضوع ده طبعا من المواضيع الشائكة اللى مستحيل تلاقى كل الناس تتفق فيها على راى واحد.

اللى ممكن يفض الليلة دى كلها, مش أن الحكومة تمشى تسأل كل واحد فى الميدان أنت عاوز ايه و تحققه, لكن مجرد تنفيذ الرغبات الأساسية المشتركة لحوالى 70% من الناس, و التنفيذ لازم يكون تنفيذ فعلى, يعنى مش سوف ... و قد أمرت...., لأ, الكلام لازم يتنفذ, بمعنى, أن الحكومة تقول أنها زودت المرتبات 200% مثلا, يبقى اللى كان بيقبض 2000 جنيه, يروح الخزنة يوم 1-8-2011 , يلاقيهم 4000 جنيه, كده هيصدق الحكومة و يمشى من الميدان و يروح البيت و قس على ذلك فى كل شئ.

اللى أنا شايفه, أن لا المجلس العسكرى و لا الحكومة الحالية نفذت اللى الشعب عايزه.

أنا ملاحظ أنه كل اللى فى الميدان عاوزين كام مطلب محدودين و مشتركين و هما:

1 - اعادة هيكلة و تغيير فكر ظباط الشرطة فعلا, مش كلام اعلام لأن بكل بساطة و بكل سهولة, أن كل الموظفين اللى فى وزارة الداخلية بيقبضوا مرتباتهم من الضرايب اللى أنا و غيرى بندفعها و بالتالى, من الغباء و السذاجة و الحماقة, أنى أدفع فلوس لواحد يتعامل معايا على أنه السيد و أنا العبد أو لحد يدينى على قفايا لما أخش أى قسم شرطة و عشان نبقى محقين, الكلام ده لا زال موجود حتى الآن و لو كان فيه ظابط شرطة واحد لا زالت عنده الاحساس بالأنا و بالعلو و الغرور و أن اللى ماسكين الوزارة سايبينه فى مكانه, يبقى كده, أنا فلوس الضرايب بتاعتى بتضيع عالأرض.

2 - المحاكمة العلنية و العادلة و السريعة لكل -مش هنقول رموز الفساد- لكن عشان يبقى كلامنا محدد, لكل اللى اتقبض عليهم من النظام السابق و المحاكمة العادلة دى مش معناها محاكمة و السلام, معناها, أن لو حبيب العادلى مثلا ثبت أنه تسبب عمدا فى قتل متظاهر واحد فقط, يبقى يعدم و يعدم هنا معناها, أنه بكل بساطة يتشنق بحبل المشنقة و هناك فرق بين اللى بيتشنق و اللى مابيتشنقش, الأولانى بيموت و التانى بيفضل عايش يطلع لسانه للناس و قس على ذلك من الأحكام.

3 - انتهاج سياسة مالية سليمة يشعر الناس بالعائد بتاعها و على فكرة الموضوع مش بالصعوبة دى, السياسة المالية السليمة دى لو كانت اتعملت من 4 شهور مثلا, كانت الناس النهاردة حست بالعائد بيها.

4 - الاعتماد على أساليب و نظم اختيار منطقية فى اختيار المسؤولين اللى لسه بيتعينوا فى البلد و اللى كل همهم أنهم يشتغلوا بنفس الأسلوب بتاع أى مسؤول من اللى كانوا بيتعينوا أيام -الله يجحمه- حسنى مبارك.

أنا متأكد انه فيه مطالب تانية كتير غير دى, بس لو بس الشوية دول اتعملوا بشكل مرضى للناس, يعنى اتعملوا بالشكل السليم, الناس هتروح بيوتها.

هل تعتقد أن ولاد مبارك الاتنين و غيرهم من كلاب النظام السابق, عندهم تكييفات فى السجون و لا لأ, لو آه, يبقى ليه و لا لأ, يبقى لا أعتقد أنهم هيقعدوا فى الحر ده من غير تكييفات, معنى أن الناس دى يتركبلهم تكييفات دونا عن كوووووووووووول مساجين مصر, يبقى لازال هناك احساس عند أولى الأمر فى البلد دى أن الكلاب دول أفضل من باقى عموم المصريين و للأسف مع وجود هذا المعتقد, يبقى اللى قاعدين فى التحرير عندهم حق أنهم يفضلوا قاعدين.

و قس فى كوووووووووووول أمور الحياة على المثال السابق.

الحكومة مش مطلوب منها أنها تربى الشعب, لكن المطلوب منها أنها تحقق كل الرغبات و الأمانى المشروعة لكل أفراد الشعب بشكل مرضى للشعب و لو فشلت فى ده, يبقى تمشى و ييجى غيرها و هكذا لحااااااااااد ماتيجى الحكومة اللى تنجح فى ده و دى أكيد موجودة و الا ماكانتش الدول المتقدمة اتقدمت.

للأسف أن أولى الأمر فى البلد لحد النهاردة, بيتصرفوا كما لو لأنهم مستخسرين النعمة و الراحة و الرخاء و الاستقرار فى الناس, يمكن لأن الناس دول شكلهم وحش و لا لابسين هدوم مبهدلة, أو مثلا ريحتهم عرق, مش عارف بالظبط, و بعدين تلاقى المسؤولين لحد النهاردة, عارفين المشكلة فين و شايفينها كويس أوى لأنها بتبقى باينة أوى و الأعمى يشوفها, الا أنهم لا زالوا بيتفننوا فى أنهم يلفوا و يدوروا و يتفننوا فى ارهاق المواطن و عدم تلبية رغباته, كما لو أنهم لو لبوا رغباته, الناس هتقول عليهم هبل و لا خايبين !!!!!!!

أنا عارف أن كلامى مش هيعجب سيادتك و كتير أوى من الأخوة الأفاضل, لكن ده رأيى و لكم جزيل الشكر و آسف للاطالة.