الناس مالها بتضايق ليه من الحوار ، الموضوع مش عافية ومصر مش ملك حد لوحده ، ولو مليون بني ادم عملوا ثورة مش معني ذلك ان البلد بلدهم
والا بالمنطق ده يبقي من حق اي اقلية انها تفرض رايها علي الاغلبية وتسفه من رايهم علشان عملوا اعتصام ولا اتنين وقطعوا الطريق علي الناس يبقوا قوة ومن عاداهم حزب الكنبة وبيخاف من خياله الخ...
حزب الكنبة الي حضرتك بتسفه منه لو هما الاغلبية ولهم راي يجب انك تحترمه ، ولو هنمشي بمبدأ الصوت العالي والتسفيه من الاخرين والحط من قدراتهم علي فهم الحرية وخلافه من الشعارات التي قد يستخدمها البعض كالببغاوات بدون ادني فهم لمعناها فلن نصل لحل
حزب الكنبة برغم اعتراضي علي عدم مشاركته الفعالة للثورة في بداياتها فهو الذي انجحها بنزولة الشارع ولا احد ينكر ذلك ، فهم ليس لهم سوي توجه واحد وهو العدل وازالة الظلم ، وليس له اي توجهات اخري ولا مطامع سياسية ومش شايف نفسه مثقف والباقي ما بيفهمش.
قام حزب الكنبة قام بدوره وازاح الرئيس ، ثم اراد الاستقرار والعمل (حقه ولا دي حاجة وحشة) ولما بينضحك عليه بيتحرك ، مش قارف الجميع عمال علي بطال بالصوت العالي وادعاء الفهم
يا سادة يا محترمين الهدف يجب ان يكون مصلحة مصر ومصلحة الامة واعادة العدل والحق لمصر ولشعبها ، والا بالمنطق الاخر لو اسرائيل عملت مظاهرة لتحرير شعب مصر من مبارك يبقي هما اولي بالحكم لانهم فاهمين احسن مننا ومثقفين ومتعلمين احسن من شعب مصر بحاله (حقيقة واقعة انظر لترتيب جامعاتهم دوليا)
انا مع الثورة ومع تحقيق مطالب الشعب العادلة ، بس مش مع الزج بالمطالب الشخصية والاهواء السياسية في وسط الزحمة .
اه قبل ما انسي ، اللبرالين مش ملحدين ولا كفره ، دول فئة من البشر تنادي بفصل الدين عن الدولة وهم من كافة الاديان والطوائف وقد يوجد بينهم من يدعي انه لبرالي كراهة للاسلام وحكمه ولكنه لا يستطيع ان يبوح بذلك حتي لا يلفظ من المجتمع ، وسرعان ما تكشفهم اصواتهم الغاضبة التي اصبحت الان لا ترغب في الحورا (شوفوا برامج التوك شو) ، وده طبيعي لان اللبرالية تلفظ انفاسها الاخيرة عالميا ومحليا لانها لم تحقق مصلحة لشعب او لامة ولكن لفئة منتفعة ( اظن النظام السابق كان بيشغي لبرالين)
عموما تصاعد حدة الحوار من فرد يدل علي ضعف الحيلة (مزنوق يعني) ، وكلنا عارفين ان الي بيتكلم ما بيعملش والي بيعمل ما بيتكلمش
وارجو من الجميع النقاش بصدر رحب مع تبادل الافكار والرؤي بدون هجوم او تسفيه للراي المخالف ما دام الهدف هو المصلحة الجماعية لمصر الحبيبة ، ويجب الا ننسي ان مصر بلد عظيم وكبير ومهم وعلي قدر ذلك يكون اعداؤه ، فلا يجب ان ننساق وراء عواطفنا ورغباتنا بدون تفكير سليم وعقل ... وشكرا
المفضلات