الموضوع: تجربتي مع شحن التكييف لكوردوبا 2002

السلام عليكم ورحمة الله وبركاته

بداية انا أمتلك حاليا سيات كوردوبا 2002 من حوالي شهرين و دي اول مرة أركب عربية مكيفة وكان التكييف معقول بالنسبالي وكنت حاسس انه التكييف كده زي الفل ومافيش فيه مشكلة ولكن لما كنت أسافر في الحر ومعايا عدد كبير في العربية ولا اكنه فيه تكييف ولما اكون لوحدي برضه وقت الظهر اكنه مروحة فقط
المهم لما سافرت المنصورة اليومين اللي فاتو اخي الأكبر ركب معي لأول مرة في عربيتي دي بعد شرائها وكنا ليلا وقلي شغل التكييف كده نجربه عشان يقارنه بعربيته المهم قلي انه ده ضعيف لكن ايه العيب هو ميعرفش لأنه مش شاغل دماغه بالعربيات قد كده (عربيته لانوس 2001)

تاني يوم بدأت ابحث فيما أملك من مواد تخص السيارات و علي الانترنت لحد موصلت الي ضغط الفريون وبيكون كام عند درجة حرارة ايه و بيتشحن منين ويعني ايه منطقة الضغط المرتفع و المنخفض المهم عرفت ان العربيات بتتشحن من البلف اللي في الماسورة الباردة (منطقة الضغط المنخفض ) واللي خارجه من الكمبوريسور وداخلة علي الثلاجة الداخلية بالتابلوه

وكانت طريقة الشحن كالتالي :-
1- شراء 1 كيلو فريون ب 95 جنيه
2- شراء وصلة نحاس كده بتتركب في علبة الفريون بينها وبين خرطوم جهاز الشحن
3- فك غطاء البلف اللي ذكرته فوق واللي بتتشحن منه العربية
4- تركيب جهاز الشحن و توصيلة بين السيارة و علبة الفريون وطبعا الكلام ده كان عند فني شحن موجود عند اخي في الشركة بالمنصورة (ولو حد عايزه يقلي وانا اديله رقم تليفونه )
5- اختبار ضغط الفريون بالدائرة قبل الشحن و طلع قليل قوي وكنت بحس ان الماسورة اللي خارجه من الكمبوريسور و اللي المفروض تكون درجة حرارتها صفر دي باردة اكنك درجة حرارتها مثلا 10 او 15 درجة
6- شحن دائرة التكييف بالكمية و الضغط المطلوب وهو 27 psi حتي وجدت الماسورة الواصلة بين الكمبوريسور و الثلاجة بدأت تتلج
7- فك كل القصة اللي ركبناها فوق و تجربة التكييف

وهنا كانت المفاجئة دخلت العربية اكني فعلا داخل فريزر و الحمد لله لقيت كفاءة التكييف رائعه بل أعلي من كفاءة تكييف عربية اخي اللانوس

تجربة التكييف وانا راجع امس شغلته طول الطريق علي درجة حرارة 20 (لأن الناس معايا ميقدروش علي أقل من كده )و ظبطته يشتغل اوتوماتيك (عندي التكييف تاتش بكنترول) وخلال 5 دقايق كانت المروحة نزلت لسرعه 2 (عندي 6 سرعات)و ده مع عربية فيها 6 أفراد بيتنفسو طول الطريق

والحمد لله بقي أكثر من رائع
اللهم بارك لنا فيما رزقتنا و قنا عذاب النار و احفظنا من كل شر و سوء

المشاركة الأصلية كتبت بواسطة amma

السلام عليكم

مبروك يا استاذ ايهاب وربنا يبارك لك

وعليكم السلام
ربنا يكرمك
ماشي النهارده عشان عايزك ضروري وفيه ضيف عزيز هتشوفه النهارده ان شاء الله