+11111111111111111111111111سيدي الفاضل ،
انت حسمت بنفسك المقارنه لصالح التيدا ، انا حاتكلم كلام عن الفيات يمكن ما يعجبش اخواتنا في منتدي فيات .
الفيات شركه عريقه و حاليا امبراطوريه كبيره في أوروبا و هما بدون مبالغه من كبار اسياد العالم في التصميمات و بالذات الداخليه اكتر من الخارجيه ( التابلوه و الصالون ) ثق تماما انه مش حاييجي اشيك من كده .
لكن في المقابل زيها زي معظم الأوروبي بما فيه البيمرز و الفولكس واجن
عربيات مستهلكه لنفسها و محتاجه تصرف عليها علشان تفضل في أوج اناقتها و اداءها .
مستهلكه بمعني اجزاء من العفشه علي السريع ، معدل تآكل تيل و طنابير اسرع من الياباني بكتير و ده علشان فرق الوزن عاده و مش عاوز اقول ان حتي دهاناتهم مش معمره زي الياباني تحت شمسنا الجميله بتلاقيهم كشفوا سوك اسرع.
طبعا دول كلهم مش بتوع الجو المرعب بتاعنا ( حار بشده جدا صيفا - حار فقط شتاءا ) و انك ممكن تفضل واقف من نص ساعه لساعه كامله علي كوبري اكتوبر و مطلوب من نكييف العربيه انه يدي كامل كفاءته ( دي لعبه الياباني كله ) الأوروبي عامه بيتعب بعد 10-15 دقيقه و تلاقي التبريد يظبط تاني لما العربيه تاخد سرعتها .
في المقابل الياباني بوجه عام ممكن تعتبرها ( آسف في التعبير ) جاريتك
و تحت أمرك في أي لحظة 24/7 و يادوب عايشه بلقمتها ( بنزين و زيت في ميعاده ) و اكتر من كده مش عاوزه و تخدمك بعنيها و تبعدك عن الورش و تنسي الموضوع ده خالص يمكن كل سنه تعدي علي الميكانيكي في دخله رمضان زي الأيام دي علشان تقول له كل سنه و انت طيب و حتي لو عندها مشكله فنيه يادوب بتديك انذار و تيجي علي نفسها و توصلك مشاويرك و من النادر جدا انها تعمل دقه نقص معاك لكن الأوروبي لأ لأ لأ .
حتلاقي ناس تقوللك الأمان و الصاج التقيل و الكلام ده ، ممكن يكون فيه شيء من الصحه و من ضمن مميزات الاوروبي زي ما هو عيب انا قلته قبل كده الوزن - لما بيطلعوا علي الطريق ماشيين زي القطر و مافيش شويه هوا يجيبهم يمين و شمال او لوري ولا اوتوبيس يأثر فيها بفرق الهوا.
لكن انت مش كل يوم علي الطريق و مشوارك في عز زحمه قاهره المعز
( ربنا يكون في عونك ) علشان كده اليابانيه سياره المدينه نمره واحد للأسباب السابقه و لسهوله المناوره و مش عاوز اعدد مميزات الياباني الكتير قوي.
يمكن ناس تقول ان قطع الغيار اغلي.
(مثال صغير : احسبها لو قطعه ب 300 جم و قعدت في العربيه كام سنه قصاد نفس القطعه ب 150 جم لكن اتغيرت 3-4 مرات في نفس المده ) .
طبعا مش محتاج اقوللك ان الموضوع مش السعر بس لكن اضف اليه بحثك عن القطعه و وقوفك عند الميكانيكي او في مركز الخدمه كذا مره مقابل مره واحده بس في الياباني .
أنا قلت لك رأيي الشخصي و اتعشم ما حدش يزعل مني بس طبعا انا من انصار التيدا و بشده .
اخوك شريف .
تسمحلي ابدي اعجابي بكلامك الجميل المنسق ده ...... واستفدت منه كتيييييييييييييير وكلام سليم 100%
جزاك الله عني خيرا :))))
المفضلات