الموضوع: عايز اهاجر لاستراليا او كندا وعايز الماشوره من اصحاب الخبره

المشاركة الأصلية كتبت بواسطة أحمد كمال

بتقدم و اما بتسافر بتدور على شغل ..... الحكومة غير مسؤولة عن توظيفك

مفيش معادلة لمهندس البرمجيات لانك مهنة unregulated ...... المعادلة للمهن ال regulated بس او المهن اللي بتحتاج تصريح مزاولة مهنة (محامي طبيب صيدلي مهندس مدني الخ الخ الخ)

الف شكر على سرعة الرد -
طيب لما الحكومه مش مسؤله عن توظيفى ليه بتحدد المهن اللى تهاجر اليها ؟؟ هل من باب انعاش سوق العمل فى المجالات دى فقط ؟؟
انا بفكر بصوت عالى على فكره : طيب هل ممكن اقدم طلب هجره و يتوافق عليه و اسافر و ما الاقيش شغل ؟؟؟ و كده يبقى خسرت شغلى فى مصر على الفاضى
انا اصلى سمعت حاجه من زملائى و عاوز اتأكد منها انى بسافر و اقعد اول 3 شهور على حسابى علشان ادور على شغل و لو مالقتشى الحكومه بتدفعلى معاش "بطاله" و بتوفرلى شغل !!
انا بس عاوز ابقى مطمنى على مستقبلى هناك

المشاركة الأصلية كتبت بواسطة أحمد كمال

بيحدد المهن اللي هو شايف ان فيها نقص في سوق العمل


يعني ممكن تلاقيه رافض دكاترة و مهندسين و طالب عمال و فنيين و حلاقين مثلا


الرزق على الله يا خالد ........

مفيش حاجة اسمها معاش بطالة في اول الهجرة .......


لو هتفكر بالطريقة دي عمرك ما هتهاجر على فكرة

اللى كنت اقصده و لاقيت واحد تانى بيقول الكلام ده و انا عاوز اتأكد بس

المشاركة الأصلية كتبت بواسطة blazer

اللى فهمته كمان انك بعد ما تسافر باذن الله انك لو متزوج وعندك اولاد
لو مقدرتش تعيش هناك بترفع دعوى وينظر فيها وبيتحكم ليك انك تاخد فلوس حوالى 3000 دولار ليك و 3000 لزوجتك
وتقريبا 600 لكل طفل

بص يافندم الموضوع مش سلبيه و لا تردد بس انا طبيعة شغلى بتخليني افكر فى كل السيناريوهات الممكنه
فعلشان كده انا بحب ادرس كل الاحتمالات الممكنه و مزاياها و عيوبها و اخطارها قبل ما اخد اى قرار

المشاركة الأصلية كتبت بواسطة khaled_sabry

اللى كنت اقصده و لاقيت واحد تانى بيقول الكلام ده و انا عاوز اتأكد بس

بص يافندم الموضوع مش سلبيه و لا تردد بس انا طبيعة شغلى بتخليني افكر فى كل السيناريوهات الممكنه
فعلشان كده انا بحب ادرس كل الاحتمالات الممكنه و مزاياها و عيوبها و اخطارها قبل ما اخد اى قرار

بص لو قررت تهاجر اعرف انك حتتفحت تلت اربع سنين علشان بالكاد تقف علي رجلك ، مفيش بلد في العالم حتستقبلك في المطار وتقولك " ايه ده ؟ انت جيت عندنا ؟ اتفضل فلوس وسكن وعلاج وتعليم ، انت فينك يا راجل من زمان ؟ " دي احلام كل اللي في مصر وبيفكر يهاجر

عاوز شغل وفلوس وسكن من اول شهر ، شوفلك عقد عمل في السعودية ، عاوز تهاجر حتشوف ايام اسود من احمد زكي في فيلم النمر الاسود بكتيير
لازم تبقى فاهم ان مفيش بره مصر حنان ولا طيبة ولا معلش عنده عيال ولا قطع الارزاق وحش ، مفيش بره رحمة!

عاوز تسافر واقف علي رجلك ، يبقي تطلع من مصر بمبلغ كبير يسندك ، ولازم يكون ليك حد في بلد المهجر يوريك السكك ويكشفلك غموض البلد ويقلل فترة تواهانك هناك ، لو مالكش يبقي فلوسك حتخلص قبل ما تعرف المفروض تعمل ايه ونرجع لاحمد زكي في النمر الاسود

بتفكر في علاقات في ابناء البلد انت واهم او بتخاطر ، اولا احنا شعب مش محبوب قوي في البلاد دي ، ثانيا الشريحة اللي واصلة في المجتمع اللي تنفعك صعبة المنال جدا ( انت شرق اوسطي ومهاجر يعني ضاربك السلك في بلدك ) هما شايفينك كده انت مش مستثمر ولا راجل اعمال جاي تفتح مشروعات!
انت لما بتسافر حتتعامل مع الشريحة الخدمية اللي بيتعملوا معاك مباشرة ، ودول لو بيفهموا كانوا نفعوا نفسهم

علشان كده سافر البلد اللي ليك فيها صاحب او اخ او خال ، عايش هناك بقاله زمان ، ويكون جايب في البلد دي جول مش فاتح مطعم بيتزا!!


معلش انا سودتها شوية بس الهجرة مش سهلة خالص خالص اوعى تفتكر المصري اول ما بيسافر بيعيش في مسلسل friends ده وهم الحالم بالسفر وغير صحيح علي الاطلاق

إذا لا تزال ترغب فى الهجرة يسرنى مساعدتك

https://www.facebook.com/pages/%D9%8...95616070450326

المشاركة الأصلية كتبت بواسطة khaled_sabry

ايه ده
فعلا ادايقت .... انا قريت معظم المشاركات و مافيهومشى و الا مشاركه واحده بس بتنتقد فكرة الهجره
غير كده الكل مشجعها
انا كان ممكن استوعب الكلام ده قبل الثوره لما الواحد كان مخنوق من الفاسد اللى فى البلد و كان حاسس ان البلد مش بلدنا اصلا
لكن دلوقتى اتعملت ثوره و البلد بتتبنى من اول وجديد
يبقى المفروض نقعد و نبنيها ... مش اهاجر و ابنى بلد تانيه
حتقولى "ياعم يعنى هى فرقت عليا " حقولك اه تفرق ولو كل واحد عمل زيك كده تبقى البلد حتخرب
لأ و الغريب ان معظم الاعضاء اللى بسألو عن تفاصيل الهجره هما برضه اللى بلاقيهم بيتناقشو فى مستجدات الثوره و تفاصيل الاعتصامات فى مواضيع تانيه ... طيب انتى حتشغلو بالكم ليه ما انتو سايبينها اهه تولع بقى و لا ماتولعشى مش حيأثر عليكم فى حاجه
فعلا انا صدمت فيكم

سبحان الله
انا كنت بعمل سيرش على المواضيع المكتوبه فى الهجره لكندا و لاقيت الموضوع ده و لاقيت مشاركتى !!!!!!!!!
حتقولى انتا بتعمل سيرش ليه - حقولك لإنى عاوز اهاجر كنداااااااااااااا
سبحان الله - شايفين وقتها كنت بقول ايه و دلوقتى انا عاوز اهاجر باى شكل حتى لو قدمت تنازل عن جنسيتى اللى "كنت" بعتز بيها

نكمل الموضوع - حد عارف معلومات عن الشروط الجديده اللى حتضاف للهجره الفيدرال بتاعت كندا فى 2015 (Express Entry) ؟؟؟