الموضوع: عايز اهاجر لاستراليا او كندا وعايز الماشوره من اصحاب الخبره

المشاركة الأصلية كتبت بواسطة khaled_sabry

و الله اللى انا مقتنع بيه ماحدش عرف فيكم يثنيني عنه
على العموم ياريت كل واحد عاوز يسافر يجاوب على الاسأله دى بينه و بين نفسه

انا لما اسافر هل ده فيه منفعه للبلد و لا منفعه ليا ؟؟
لما اقعد فى مصر هل ده فيه منفعه للبلد و لا منفعه ليا ؟؟؟
انهو ابدى ... مصلحة البلد و لا مصلحتى ؟؟؟ - و لو حتجاوب بمصلحتك امال ازاى بتقول روحى فداها ؟؟
هل انا عندى اسواء ظروف معيشيه فى مصر .. يعنى مافيش حد مر بالظروف بتاعتى دى و ماسفرشى ؟؟؟
و السؤال الاخير - هل انتا تقبل انك تتعامل بنفس معاملتك للسودانيين اللى فى مصر ؟

اللي عايز يسافر يسافر واللي عايز يفضل يفضل
مع احترامي ليك يا بشمهندس كل واحد حر وأدرى بظروفه وعارف ازاي يفيد مصر أينما كان

المشاركة الأصلية كتبت بواسطة khaled_sabry

و الله اللى انا مقتنع بيه ماحدش عرف فيكم يثنيني عنه ..................

السلام عليكم و رحمة الله و بركاته

أنا متهيألى أن اللى بيهاجر, لو حاطط فى دماغه, أنه يفيد مصر, هيقدر يفيدها, أنا على وضعى الحالى ده, مجرد أنى أسافر حتى الخليج مش كندا و أجيب قرشين أحطهم فى بنك فى مصر, بالنسبة لوضعى أنا, أفيد من أنى أفضل فى مصر, لأن بقعدتى فى مصر, لا هجيب القرشين دول و لا هحطهم فى البنك.

واحد زى مجدى يعقوب ده, لو ماكانشى سافر انجلترا من 40 سنة, كان هيبقى ايه حاله, بالكتييييييييييييييييير أوى, كان هيبقى أستاذ جراحة القلب و الصدر فى أى جامعة مصرية -ده لو ماكانشى فيه اضطهاد و كانت الأبواب مفتوحة أودامه- و كان هيبقى كل همه, أنه يمر عالمرضى مع النواب الصبح فى المستشفى و يتمنظر على النواب أودام المرضى, عشان المرضى يعرفوا أن ده الدكتور الكبير وسط العالم دى و لما يخرجوا من المستشفى يقوموا يروحوله العيادة بتاعته يتاتبعوا معاه و لما يخلص المرور و اللستة بتاع العمليات, يجرى عالعيادة الخاصة بتاعته سعيا وراء امتصاص دماء المرضى اللى جايين له العيادة و بعد العيادة ماتخلص آخر الليل, يقوم يقابل مندوبين الدعاية عشان ياخد منهم الهدايا عشان يكتب لهم الأدوية بتاعتهم, أو يظبط مع بتوع الدعاية أنهم يدفعوله تكلفة مؤتمر 3-4 أيام فى شرم و لا برج العرب و لا العين السخنة و خلاص.

أكيد مجدى يعقوب -مثلا- بالمركز بتاع القلب اللى عمله فى أسوان أفاد مصر أكتر مما لو كان فضل فى مصر, و فيه أمثلة غير مجال الأطباء بس أنا اللى أكيد ماعرفش.

أكيد فيه ناس بتهاجر و تقول عدولى و بينسى بلده و خلاص, النموذج ده أكيد موجود كتير, الناس اللى زى دول مش هيفيد بلده, حتى لو فضل فى مصر.

ده لو الطبيب اللى مهاجر و ناجح بره ده, رجع كل سنة مصر شهر أجازة و عالج مرضى مجانا, هينفع بلده و رجل الأعمال اللى مهاجر و ناجح بره لو جه و أخد حته أرض فى مدينة جديدة و بنى عليها اسكان للشباب و باعه ليهم بسعر التكلفة, يبقى خدم مصر و شعب مصر.

عشان كده, أنا مابربطش بين الوطنية و رد الجميل للوطن و بين الالزام بالبقاء جوه مصر.

ده رأيى و طبعا كل واحد حر جدا فى رأيه.

المشاركة الأصلية كتبت بواسطة khaled_sabry

و الله اللى انا مقتنع بيه ماحدش عرف فيكم يثنيني عنه
على العموم ياريت كل واحد عاوز يسافر يجاوب على الاسأله دى بينه و بين نفسه

انا لما اسافر هل ده فيه منفعه للبلد و لا منفعه ليا ؟؟
لما اقعد فى مصر هل ده فيه منفعه للبلد و لا منفعه ليا ؟؟؟
انهو ابدى ... مصلحة البلد و لا مصلحتى ؟؟؟ - و لو حتجاوب بمصلحتك امال ازاى بتقول روحى فداها ؟؟
هل انا عندى اسواء ظروف معيشيه فى مصر .. يعنى مافيش حد مر بالظروف بتاعتى دى و ماسفرشى ؟؟؟
و السؤال الاخير - هل انتا تقبل انك تتعامل بنفس معاملتك للسودانيين اللى فى مصر ؟

رداً على اسئلتك علشان ماكنش رديت على سؤالك بسؤال...

- انا لما اسافر هل ده فيه منفعه للبلد و لا منفعه ليا ؟؟

لما اسافر اقدر انفع نفسي و البلد و اشغل اكتر من شخص هنا في مصر بأكتر من طريقة

- لما اقعد فى مصر هل ده فيه منفعه للبلد و لا منفعه ليا ؟؟؟

احتمال ابقى منفعة للبلد, و احتمال ابقى زي غيري مش قادر احرك ساكن في البلد
و ده متوقف على (اللي ماسكين البلد) عايزيين ايه و هيدوا الفرصة لمين... انت و حظك
بس الأكيد اني مستحيل اكون بنفع نفسي ابداااااااااااااا لمليووووووون سبب مش سبب واحد

- انهو ابدى ... مصلحة البلد و لا مصلحتى ؟؟؟
- و لو حتجاوب بمصلحتك امال ازاى بتقول روحى فداها ؟

الابدى مصلحة البلد و مصلحتي سواء, مش مصلحة البلد بس و انا مش مهم... لأ طبعاً
و لو البلد مش خايفة على ولادها و على الكفاءات اللي فيها في كل المجالات, ماتنتظرش
انهم يفضلوا فيها لانهم مش هيفضلوا طووول عمرهم صابرين على البلد تحن عليهم
و تديهم فرصة شغل, او شقة كويسة, او دخل آدمي, او معاملة محترمة في المصالح الحكومية,
او شارع متسفلت و مافيهوش بلاعات مفتوحه و نقر كل يوم عربية تتقلب عليه, و غيره و غيره...
انا لو فضلت فيها, يبقى بضيع مستقبلي و عمري و مش هوصل لاي هدف او طموح
من اللي بتمناهم طووول عمري, و لا هاخد على صبري على البلد و قعادي فيها ثواب
من ربنا علشان ينفعني في آخرتي... يعني بالبلدي كده, لا دنيا و لا آخرة !!!!!
يبقى اقعد فيها لييييه لو مش مقدراني و لا مقدرة حد, و لا مستحملانا اصلاً كما لو اننا عبئ !!؟؟؟
لأ اسافر بره, و اعيش كويس, و احاول افيدها بأكتر من طريقة, و بردو تبقى روحي فداها...

- هل انا عندى اسواء ظروف معيشيه فى مصر..
يعنى مافيش حد مر بالظروف بتاعتى دى و ماسفرشى ؟؟؟

لأ... في ملاااااااااايين بيمروا بالظروف دي, و الشعور ده بردو, بس 75% منهم
مايقدروش يسافروا, لان عمرهم اصلاً ماشافوا الهرم ولا البرج علشان يفكروا يطلعوا بره مصر,
و الـ 25% التانيين منهم اللي بيحاول يوهم نفسه انه كده كويس و ده آخره, هو هينهب !!
و منهم اللي بلا طموح و مش عايز اصلاً حاجة غير انه يقبض اي مرتب و اهي ماشية !!!
للأسف انا مش واحد من الاثنين دول... ولله الحمد اقدر اسافر و عندي طموح و نفسي
اعيش في مجتمع راقي, اشم هواء نظيف, اعلم ولادي احسن تعليم, اتعامل كبني آدم...
دول اصلاً اقل ما يذكر من حقوقك كبني آدم لازم تاخدهم عادي جداا, مش تشحتهم, و بردو مش هتاخدهم !!!!!!!

- هل انتا تقبل انك تتعامل بنفس معاملتك للسودانيين اللى فى مصر ؟ (تقصد درجة تانية)

هرد عليك تاني... عمري في اي بلد من اللي بنتكلم عليهم دول ما حد هيعاملك انك
درجة تانيه, او باكستاني في الخليج !!! دي مجتمعات متحضرة و راقية و مش بتفكر
التفكير ده خااااااااالص, و اي شخص معاه الجنسية, فهو مواطن ليه كل المميزات و الحقوق
و الواجبات بتاعة كل المواطنيين في البلد دي, و ماحدش احسن من حد...

في المقابل بقى... اسمحلي اقولك اننا عايشين في البلد دي درجة تااااااااسعة, مش تانية حتى, يعني لو
هنفترض ان في حد هيسافر برة و يعيش درجة تانيه على حد تعبيرك, يبقى اكيد احسن من هنا بردو !!!

بكدة ابقى رديت على اسئلتك, و مش بيني و بين نفسي علشان يبقى الكل عرف الرد...