تويو ولا بريدجستون؟؟

**Ralliart** · 18-07-2011 11:06 PM

أنا كنت عايز اغير فردتين للبومة مقاس 15 195\60 والانواع اللي لقيتها كانت بريدجستون ياباني gr90 بـ600 وتويو ب475 وبريدجستون اندونيسي sports tourer هيكون سعره في نفس حدود التويو
طبعاً سعر البريدجستون الياباني حرام خصوصاً ان اللي راكبين في العربية فيهم فردة عملت بلونة بعد 25 الف كم بس

والفردتين التانيين اللي هيركبو معاهم بريدجستون ياباني gr-80 ودول ناعمين جداً فخايف اركب معاهم sports tourer لانهم ناشفين
يا ريت المجربين يقولو علشان عايز اجيبهم بكرة

**JapRuleZ** · 19-07-2011 03:13 AM

متركب 195/55/15
بدل ال 60 ؟
من تجاربى السابقة ال ناشف يلائم الطرق المصرية
الناعم ده عاوز واحد ماشى فى سويسرا طريق حرير
دور على ميشلان - جوديير- بريدجستون - هانكوك
غير ال 4 مع بعض
الا الكاوتش ......

**Ralliart** · 19-07-2011 08:10 AM

شكراً لردك بس ليه اجيب 55 مش 60 ؟ انا اعرف ان البروفايل لما يقل بحس بالطريق اكتر والجنط بيتأثر من المطبات أكتر
والهانكوك انا كنت مجربه طلع عين أهلي تصفير في الارض وكمان بقى غالي مش عارف ليه

بالنسبة لموضوع 4 مع بعض انا طول عمري بغيرهم مع بعض بس المرادي الـgr80 مكملوش 25 الف كم وفردة عملت بلونة فقولت اغيرها هي والاستبن علشان زمان سلوكه صدت (بتاع الفابريكة) وارفع واحدة قديمة مكان الاستبن وانا مستخسر اغير الاتنين التانيين في نص عمرهم
وباين فعلاً ان الطري مش بيعيش في مصر

**أبو_حمزة** · 19-07-2011 10:38 AM

25 ألف قليل قوى و الكاوتش ان شاء الله يكون لسه كويس
موضوع البالونة ده ممكن يكون بسبب مطب أو بسبب عيب تصنيع و ده وارد يحصل مع اى ماركة
رأيي لو الكاوتش لسه ما عداش عليه 6 سنين يبقى اعمل زى ما انت قلت و هات فردتين
بريدجستون gr محترم جدا و لو جبت أقل منه مش ها تبقى مبسوط وصوت الكاوتش ها يضايقك

**Ralliart** · 19-07-2011 02:07 PM

انا جبت فردتين بريدجستون تايلاندي my-01 sports tourer وظبت كله نايتروجين وترصيص
ودفعت 1080 جنيه
ولحد دلوقتي عادي شغال لانهم محطوطين ورا فمش حاسس بفرق في الصوت او النعومة
كدة مش هعمل فيهم حاجة ولا هعمل روتيشين غير كمان 25 الف كم يكون اللي قدام كملو 50 الف هغيرهم وارجعهم ورا
والبالونة الله اعلم جت منين هو اكيد انا كلت مطبات كتير قبل كدة بس مش للدرجة اللي تخليه يعمل بالونة

**prisoner** · 19-07-2011 03:16 PM

البريدجيستون احسن كتير حتى لو اندونيسى وتوكل على الله وهتنساه ان شاء الله

**JapRuleZ** · 20-07-2011 02:21 AM

المشاركة الأصلية كتبت بواسطة Ralliart

شكراً لردك بس ليه اجيب 55 مش 60 ؟ انا اعرف ان البروفايل لما يقل بحس بالطريق اكتر والجنط بيتأثر من المطبات أكتر
والهانكوك انا كنت مجربه طلع عين أهلي تصفير في الارض

الصفارة موجودة مع الاطار الاندونيسى ال bridgestone
انا سألت الشركة ان من اول 50 بتحس جامد بال مطبات 55 مش ملحوظ معاية والله
فى عربيات 35 و مش بتحس مطبات بس الحاجات العالية
فى واحد بقى انا عارفعه 70 ال profile بحس انه ماشى على بلالين بس شكلها و حش

**devilishtigers** · 20-07-2011 06:44 AM

هي ماركة بريلي حلوة ولا وحشة
انا ناوي ان شاء الله اغير الاربعة ومش عارف اختار ماركة ايه علشان من الماركة دي اختار النوع انا حدودي من 2000 الى 2500

**Ralliart** · 20-07-2011 08:31 AM

المشاركة الأصلية كتبت بواسطة JapRuleZ

الصفارة موجودة مع الاطار الاندونيسى ال bridgestone
انا سألت الشركة ان من اول 50 بتحس جامد بال مطبات 55 مش ملحوظ معاية والله
فى عربيات 35 و مش بتحس مطبات بس الحاجات العالية
فى واحد بقى انا عارفعه 70 ال profile بحس انه ماشى على بلالين بس شكلها و حش

طيب ايه الحكمة من موضوع البروفايل الأقل؟
انا جبت تايلاندي مش اندونيسي وربنا يستر في موضوع الصفارة ده علشان بيجنني والـgr-80 بصراحة كان ممتاز بالنسبة للصوت والمفروض من الريفيوهات على النت انه مبيصفرش لان دي اهم حاجة عندي لاني باخد الملفات بسرعة لدرجة ان الاسبوع اللي فات كنت بشد مع واحد مجنون خليت الـgr80 يصفر ولما بيبقى راكب معايا حد وبيسمع صفارة بيجيله هستيريا وممكن الاقيه في الدواسة

المشاركة الأصلية كتبت بواسطة devilishtigers

هي ماركة بريلي حلوة ولا وحشة
انا ناوي ان شاء الله اغير الاربعة ومش عارف اختار ماركة ايه علشان من الماركة دي اختار النوع انا حدودي من 2000 الى 2500

اللي اعرفه انها حلوة بس ناشفة جداً وغالية عن تجربة في سيفيك بتاعت واحد صاحبي
وبالنسبة لحدودك اعتقد ان انسبلك bridgestone gr-90 ياباني الفردة بـ600

**samirsaid1** · 20-07-2011 10:24 AM

هو موضوع حلو وجاى فى وقتة

انا عندى كاوتش كومهو مشيت حوالى 25 الف بس بسمع الاحتكاك مع الارض واحيانا دبدبة
وبسمع صرخة أحيانا لما بدوس فرامل ساعات على سرعة قليلة وساعات على السرعات العالية فهل السبب الكاوتش ولا الفرامل مع انى مغير التيل والصرخة موجودة قبل وبعد تغيير التيل

فكنت بفكر اغير الكاوتش واركب جنوط 15 بدل 14 وفى نفس الوقت مش عاوز العربية تبقى ناشفة

فلو ممكن التكلفة تعمل كام وايه الانواع المحترمة المرنة واللى تعيش وتتحمل التجنيط من ( الكاوتش و الجنوط )

العربية نيو اكسنت

وشكرا