اهم الاعطال والمشاكل و حلولها عن خبرة 10 سنين مع الصني

انا جديد في المنتدى ده و بصراحة لقيت روح التعاون هنا جميلة جدا و حبيت هنا اضيف بعض المعلومات يمكن تكون مفيدة لحد
العربية اللي معايا موديل 2001 اوتوماتيك

لو العربية اوتوماتيك و تبطل لما تكون واقفة على وضع D او R
غالبا تنضيف بوابة الهواء و ارجوكم بلاش تنضفوها باسبراي WD 40 لانه فيه زيوت و هيوسخها اكتر بعد فترة، يا اما تنضفها باسبراي الخاص بالبوابة الهوا و ده فرقه انه بيسيح الاوساخ بس مش بيسيب زيوت.

خشونة الموتور و زيادة استهلاك البنزين
يا اما فلتر البنزين و ده موجود في التنك.. و ده يتغير و سعره 170 جنيه تقريبا
او ان الرشاشات تكون محتاجة تنضيف و انصحكم تنضفوا الرشاشات كل سنة مثلا لان البنزين بتاعنا بيقبقى فيه طين،، ايوة طين بدون مبالغة كان على الرشاشات اول مرة نضفتها

لو العربية في الحفر تخبط جامد كانها بترزع حديد
بيكون جلبة المقص ، ارفع العربية و اكشف عليها و لو لقيت الجلبة مشقوقة غير المقص، التايواني 180 جنيه و مانصحكوش بيه لان اخره معاك 6 شهمور، او الاصلي 750 جنيه و ده على الاقل يعيش 4 سنين و اكتر. طبعا بافتراض ان المساعدين كويسة

الموتور المفروض يقرا 750 على عداد RPM بالمسطرة لا اكتر ولا اقل لو مش مشغل التكييف ، لو الموتور مش مضبوط اوعى تخلي الميكانيكي يعلي الموتور من المسمار اللي في نهاية سلك البنزين فوق الموتور و ده كلام كتالوج الصيانة، لو الموتور محتاج ضبط بتعمل حاجة اسمها idle volume learn عن طريق كمبيوتر الاعطال و دي يعملهالك اي حد عنده كمبيوتر بس يكون بيفهم،

سبب تاني لاستهلاك البنزين هو فلتر الهواء، لو احتاج تغيير انصحكم بالاصلي بتاع نيسان لان الياباني اللي موجود في السوق نوعيته بتخنق الهواء شوية.

لو العربية بتعوم على السرعات العالية و الزوايا مضبوطة و العفشة تمام اهتم بضغط الكاوتش جدا، لانه قدام يبقى 33 وورا 30 يشرط الكاوتش يكون بارد ممشيش كتير.. على عكس عربيات كتير ورا بيكون اعلى من قدام، متستسهلش و تقول كله 30 صدقني بتفرق عالسرعات العالية. لو شاكك في محل الكاوتش اللي بيضبط لك الهوا ممكن تشتري لنفسك عداد او تشوف حد عنده عداد ديجيتال زي بنزينات موبيل اون ذا ران.

تيل الفرامل الاصلي هو ارخص حاجة لانه بيقعد معايا لحد 35 الف كيلو و سعره 350 جنيه ، الياباني العادي و الماليزي سعره 90 جنيه و بيقعد 10 الالف كيلو بس هيصفر و يقلل عمر الطنابير بشكل سريع، التركي ماركة فرابيه احسن حاجة لو مش هتشتري الاصلي. سعره 90 او 100 جنيه.

احذر من انك تركب جنوط 17 بوصة هتتخربلك العفشة في مدة قصيرة جدا.

ده بصراحة كل اللي جاي على بالي و لو افتكرت حاجة هاحدث الموضوع اول باول

فعلا برنسسسسسسسسسس والله
ايه الجمال والحلاوة دى
تسلم الايادى يا باشا ع المعلومات القيمة دى
كلامك فى الصميم وجبت من الاخر
على فكرة انا لسه ما غيرتش تيل الفرامل الاصلى والعربية عاملة معايا 42000 كم

اقتباس:

---

المشاركة الأصلية كتبت بواسطة airprince

خشونة الموتور و زيادة استهلاك البنزين

خشونة ازاى يعني ...؟ ياريت مثال
طيب سؤال بالنسبة لإستهلاك البنزين
انا كنت مفول العربية لحد الزور بتاع التانك و سافرت بيها لمسافة 200 ك سرعة 100 - 110 - 120
تشغيل التكييف + حمولة العربية كاملة + الشنطة + وقوف في الطريق لمدة 15 ساعة
و بالظبط بعد المشوار ده لقيت المؤشر قرب للنص بحاجة بسيطة

ده يبقي استهلاك عالي ؟

الموتور المفروض يقرا 750 على عداد RPM بالمسطرة لا اكتر ولا اقل
يعني ايه مش فاهم و فين 750 دي في العداد


احذر من انك تركب جنوط 17 بوصة طيب لو جنط 16 يبقي كويس

---

اولا اهلا بك بين اخوانك
وشكرا علي الروح الجميله والمعلومات المفيده
وفي انتظار الجديد دائما

ما شاء الله

انا استفدت جدا جدا من هذه النصائح الهامه

شكرا لك

تسلم ايدك على النصائح الجميلة دى وعلى روحك الاجمل

ومتشكرين على الهدية الجميلة دى وتقديرك لينا كمان

تحياتى ليك .. واهلا بيك معانا

خشونة يعني الموتور لما تفتح الكبوت تلاقيه ثابت في مكانه مش بيعمل اهتزازات او رجة

الاستهلاك اللي انت قلت عليه ده انا شابفه مثالي، يعني لو قبل النص بشوية يبقى 20 لتر في 200 كيلو مع الحمولة دي والقفة يبقى كويس جدا.

بالنسبة لعداد الموتور الرقم 1 يعني 1000 لفة في الدقيقة، يبقى 750 بين ال 1 و شرطة 0.5

بالنسبة للجنط ال 17 كان بشع و العربية تحدف و حاجات غريبة حصلت غير ان كل زلطة بحس بيها هتكسر العربية
عموما العربية بتنزل 14 او 15 من المصنع، لكن مجربتش اركب 16 بس عموما بلاش ارتفاع الكاوتش عن الارض يكون واطي
خلي اقل حاجة 60 ملم يعني مثلا 185/60

افتكرت حاجة، من اسباب عدم انتظام الموتور حساس Throttle Position Sensor و اختصاره TPS و ده ليه رجلاش، الصح بتاعه في الضبط انك توصل كمبيوتر الاعطال و تقرا الحساس ده بيدي كام فولت وانت مش دايس بنزين ، المفروض تكون من ٠.٤٥ الى ٠.٥٥ فولت. لو اعلى او اقل فك مسمار الرجلاش و حركه وانت ععالكمبيوتر لحد ما توصل للقيمة دي.

بالنسبة لتيل الفرامل لو العربية فيها ABS فده سبب اساسي انك متستعملش غير الاصلي لانك ممكن تلاقي اداء غريب مع التيل التاني.و دايما قوة الفرملة مختلفة التيل اللي مش اصلي بيخلي العجل يقفش بسرعة يا اما تحس الفرامل اضعف شوية.

بمناسبة قطع الغيار التايواني كنت عايز اقول ان الفوانيس التايواني بتصفر بعد سنة او اتنين. و ممكن اقل لو بتقف في الشمس كتير.
والفوانيس الخلفية لو تايواني لمعتها بترح بعد فترة من جوة.
يعني من الاخر احسبها حسب وضعك و ظروفك.

الاكصدامات التايواني بتتكسر مع الخبطات لكن الاصلي خامته فيها مرونة عالية جدا مش هتخليه يتكسر من الخبطات، ممكن يتني لكن صعب جدا يتكسر.

بالنسبة للفتيس الاوتوماتيك انا عن نفسي بحب ادلعه، يعني كل سنة بغير الزيت بتاعه بعدها بحس نعومة الزيرو في النقلات رجعت تاني، هي بسيطة جدا و ممكن متاخدش بالك منها، و كل ما نوع الزيت كان انضف هتلاقي الاداء انعم، الكلام ده لو عربيتك جديدة بقالها سنة و لا اتنين متشغلش بالك بيه.
وعلى فكرة الفتيس الاوتوماتيك ده مفيهوش فلتر يتغير ولا حاجة، فيه جواه مصفاة سلك و مغناطيس يلم الرايش.

كمان قواعد الموتور مرة رحت اشتريها لقيت سعرها استيراد اغلى من الاصلي في التوكيل، والمتخلف البياع احلفله انه غالي يقوللي اصل اللي في التوكيل صيني يا بيه.. اوعى تصدق بتوع الاستيراد لو حاول يقنعك ان الاستيراد احسن من الجديد الاصلي.

بالنسبة للبوجيهات.. اول حاجة الموجود في التوكيل اسمه NGK BKR5E و عليه علامة نيسان
اللي بيتباع برة NGK BKR5ES انا معرفش ايه الفرق بتاع حرف الاس ده لكن اوقات الي بشتريه برة التوكيل يخنق العربية معرفش هل السبب النوع مضروب مثلا و لا في فرق في الموديل.

بالنسبة لل ٤ شمعة ، في مفهوم غلط عند معظم الميكانيكية انه بيطلع ٤ شرارات و بيسخن العربية و يقولك يا عم حرام عليك و كدة
ده كلام مش مضبوط.. البوجيه بيطلع شرارة واحدة بس ، و سبب وجود ٤ اطراف للارضي ان الشرارة بتاخد اقصر طريق و بالتالي مفيش تاخير في الشرارة. هو ده فرقه عن الشمعة الواحدة. و ده ميزة مش عيب.
لكن مهندس التوكيل لو رحتله ببوجيهات غير NGK هيغيرها قبل ما يكشف، و قاللي انها بتدي error معاه.

عاش