في السوبر ماركت

**م.احمد زكريا** · 20-07-2011 03:08 PM

أول الشهر ولسة قابض مرتبك
ونازل تشتري حاجة الشهر

تخيل انك ماشي مع ابنك في كارفور

وابنك لسة طفل صغير 3 - 4 سنين كده ..... ولد شقي كله نشاط بيروح هناك ويرجع جري ... عنده طاقة

وطول ما انت ماشي :-

إبنك: بابا عايز شيكولاتة

أنت: عنيا يا حبيبي وتحط في الباسكيت

تتمشى شوية ومركز في حاجات الشهر من المؤن الضرورية للبيت ... تلاقي ابنك فجأه

بابا أنا هايز ايس كريم
انت : اوي اوي أتفضل ..... وتحط في الباسكت

وبتكمل تسوقك في الماركت وعمال تحسبها يمين وشمال عشان تكفي بيتك بدخلك المتوسط المعيشك يا دوب

وابنك فجأه : بابا أنا عايز عصير

هنا انت لقيت الموضوع هايخرم منك رحت قلتله : حاضر بس اصبر لما نجيب الرز وبعدين نرجع للعصير

وبعد شوية ابنك يفكرك : انت نسيت العصير ولا ايه

تروح واخده لحته بعيدة وتجيب حاجة اهم للبيت يمكن ينسى وتنجح انك تنسيه العصير

بس فجأه يشوف قسم الالعاب وينادي بأعلى صوته : بابا انا عايز عربية

إيه الزنقة ديه ... تقوله يا حبيبي مش وقته ... يقولك لا ماليش دعوة
يا حبيبي طيب المرة الجاية ... يعيط ويقولك لا عايزها
يا حبيبي طيب نخلص شراء الحاجات وبعدين لما يتبقى فلوس نشتريها
يعيط وينام على الارض ويرفص ..... عايز العربية

هنا تفير من نبرتك وتكشر في وشه وتزعق فيه ..... قوم يا ولد بلاش دلع مع صيغة تهديد والصباع إياه

يقوم الولد مقموص وماشي معاك ويعيطله شوية .... ومع الف ينسى اللعبه

تكمل لف وتشتري حاجاتك وتقف عند الكاشير وتدفع كل المعاك عشان تأمن بيتك خلال الشهر بكل الضروريات التي لا تستقيم الحياه بدونها

وفجأه ابنك الغلس .... بابا بابا انا عايز المصاصة ديه ... تبتسم ابتسامة خفيفة وتشتريهاله بكل حب وحنان

وتنتهي رحلة التسوق وهو مبسوط وانت سيطرت على الوضع على قد ما قدرت

ووفرت حاجيات بيتك

يا رب المشتريات تكفي الشهر

يا ترى مصر هاتخرج من السوبر ماركت ولا هانلف كتير عشان المصاصات واللبان

**mrwho1982** · 20-07-2011 03:19 PM

المشاركة الأصلية كتبت بواسطة dojuar

طب افرض الواد زودها في العياط و التطيط و لم عليك الناس اللي في السوق و يقولولك يا بيه ده واد صغير هاتسترخصها فيه

دا ابنك و الضنا غالي

وأمه تزن في ودانك هي كمان...ماهي مش فارق معاها مصلحة البيت

نعمل في الأم و الناس اللي في السوق ايه؟!!!!!!!

الام كده كده مش هتتكلم لانها هتكون عارفة بموضوع الفلوس لكن لو حد من الناس اتدخل وقاللي هتهالو

اوكيه هجيبهالو علي حسابو ويشرب بقي علشان يبطل يحشر نفسو في اي حاجة بعد كده

**نور القمر** · 20-07-2011 03:22 PM

بحاول افهمه بالذوق والمنطق ان الامكانيات متسمحش باكتر من كدة
مجاش بالذوق يبقى يخبط دماغه في الحيط زودها يبقى كفين يعدلوه

**aif** · 20-07-2011 03:30 PM

المشاركة الأصلية كتبت بواسطة نور القمر

بحاول افهمه بالذوق والمنطق ان الامكانيات متسمحش باكتر من كدة
مجاش بالذوق يبقى يخبط دماغه في الحيط زودها يبقى كفين يعدلوه

طيب افرضي انه راح اعتصم امام باب الحمام ومنع باقي افراد الاسرة من دخول الحمام ....
او راح شد سكينة الكهرباء وقطع النور عن الشقة
ومش بعيد كمان يروح يسيح لأبوه عند الجيران ويلم عليه الناس .... والجيران مش كلهم كويسين .... برضه فيهم ناس بيتمنو خراب البيوت
....
ماهي العيال بقت بتعمل بلاوي عشان المصاصة والبيك رولز والشيبسي

**Dojuar** · 20-07-2011 03:36 PM

المشاركة الأصلية كتبت بواسطة mrwho1982

الام كده كده مش هتتكلم لانها هتكون عارفة بموضوع الفلوس لكن لو حد من الناس اتدخل وقاللي هتهالو

اوكيه هجيبهالو علي حسابو ويشرب بقي علشان يبطل يحشر نفسو في اي حاجة بعد كده

ده لو أم محترمة و بنت ناس متربية

لكن لو واحدة شلق اتفرج عليها

المشاركة الأصلية كتبت بواسطة نور القمر

بحاول افهمه بالذوق والمنطق ان الامكانيات متسمحش باكتر من كدة
مجاش بالذوق يبقى يخبط دماغه في الحيط زودها يبقى كفين يعدلوه

والناس اللي في السوق افرضي طلع واحد عامل فيها قلبوا على الواد و ياسم الطفولة و البرائة مكلفت الزوج؟؟

أنا حاسس الاعضاء مهرشتش صاحب الموضوع عايز يقول ايه

**wesam_salom** · 20-07-2011 03:44 PM

ما هو المفروض من الاول
نحدد ايه الضروريات
وايه الاولويات
وطريقه الشراء
يعنى الطريقه لعبور السوبر ماركت
علشان محدش يمسك فى حاجه صغيره ويسيب حاجه اهم
وميجيش 2 من الولاد واحد يقول المصاصه اولا والتانى يقول الايس كريم اولا
لازم حد يقول لهم الرز والخضار اولا
ناكل وبعدين نحلى
نختار نوع الاكل ونختار الطباخ مش نتخانق على الكماليات
والمفروض يبقى هدفنا واحد مش كلنا نتهم بعض باننا مش عارفين الطريق
كلنا ايد واحده

**نور القمر** · 20-07-2011 03:46 PM

المشاركة الأصلية كتبت بواسطة aif

طيب افرضي انه راح اعتصم امام باب الحمام ومنع باقي افراد الاسرة من دخول الحمام ....
او راح شد سكينة الكهرباء وقطع النور عن الشقة
ومش بعيد كمان يروح يسيح لأبوه عند الجيران ويلم عليه الناس .... والجيران مش كلهم كويسين .... برضه فيهم ناس بيتمنو خراب البيوت
....
ماهي العيال بقت بتعمل بلاوي عشان المصاصة والبيك رولز والشيبسي

المشاركة الأصلية كتبت بواسطة Dojuar

ده لو أم محترمة و بنت ناس متربية

لكن لو واحدة شلق اتفرج عليها

والناس اللي في السوق افرضي طلع واحد عامل فيها قلبوا على الواد و ياسم الطفولة و البرائة مكلفت الزوج؟؟

أنا حاسس الاعضاء مهرشتش صاحب الموضوع عايو يقول ايه

طيب رأي حضراتكم ايه
ننفذ له طلباته المرة دي كمان عشان وجع الدماغ حتى لو هتضر باساسيات الحياة
مهو بردو مش هايقف عند حد معين وبعد تنفيذ كل طلب هايدور على غيره
انا هاخده بالسياسة مرة واتنين وتلاته
مجاش بالذوق يبقه بالعقاب واحبسه في اوضته وامنع عن المصروف وكل الرفاهية اللي مكنش مقدر قيمتها قبل كدة
الجيران خرابين البيوت تدخلوا طيب مهي خربانة خبانة يبقى عليا وعلى اعدائي على الاقل مفرطتش في كرامتي

انا ايه كان دخلني كارفور اصلا

اكتر حاجة بكرهها فيه قسم الالعاب

**Dojuar** · 20-07-2011 03:49 PM

المشاركة الأصلية كتبت بواسطة نور القمر

طيب رأي حضراتكم ايه
ننفذ له طلباته المرة دي كمان عشان وجع الدماغ حتى لو هتضر باساسيات الحياة
مهو بردو مش هايقف عند حد معين وبعد تنفيذ كل طلب هايدور على غيره
انا هاخده بالسياسة مرة واتنين وتلاته
مجاش بالذوق يبقه بالعقاب واحبسه في اوضته وامنع عن المصروف وكل الرفاهية اللي مكنش مقدر قيمتها قبل كدة
الجيران خرابين البيوت تدخلوا طيب مهي خربانة خبانة يبقى عليا وعلى اعدائي على الاقل مفرطتش في كرامتي

انا ايه كان دخلني كارفور اصلا

اكتر حاجة بكرهها فيه قسم الالعاب

لأ طبعا...ده دلع مرق

فيه نظام للبيت و الخروجات

واخواته التانيين مؤدبين مش زيه

يبقى يتفلق

-

الموضوع: في السوبر ماركت

LinkBack

أدوات الموضوع

عرض

في السوبر ماركت - انشر الموضوع فى :

-

-

-

المواضيع المتشابهه

مشكلة في اندرويد ماركت :(

عاوز سوبر ماركت او كافية للايجار

للبيع مستلزمات تجهيز سوبر ماركت

>>> مترو ماركت يحترق <<<

الكلمات الدلالية لهذا الموضوع

المفضلات

المفضلات

ضوابط المشاركة