بسم الله الرحمن الرحيم..

السلام عليكم ...

- في الموضوع البسيط ده هقدم للاعضاء قصه كفاحي في تغيير كاسيت الافيو ..(ببساطه الكاسيت اللي فيها ده مش كاسيت ..ده ترانزستور صوته مستفز..)

ما علينا ..المهم..

- بدأ الموضوع من اول ما جيت استلم العربيه و لقيت فيها كاسيت بشرايط..! و كمان مفيهوش aux ..و تهزييئ للراجل اللي بيسلمني العربيه و انا بقولو عربيه فول اوبشن حاطنلي فيها كاسيت بشرايط و الازاز اللي ورا بكره ...!

برضوا ما علينا ..

- بدأت رحله المعاناه..الصوت وحش اوي ..و لاني مكنتش فاهم قولت اشطه اقديها ب FM Modelator ب 35 جنيه و الدنيا هتظبط..

طبعا الدنيا مظبتش و الصوت كان سئ جدا جدا..

- قولت ده اكيد من السماعات.. غيرتها بجوز بايونير 16 سم.. 3way..و كانو سعتها غالين ب 320 جنيه.. وده الموديل TS-A1672S..و لما فكيت لقيت السماعات اللي ورا اللي راكبه اصلا مصري..!

- برضوا الصوت زي الزفت..

- قولت اعمل مباحثات علي النت و اشوف اجيب كاسيت ايه و طبعا ..بالصدفه عرفت ان موش هنا علي المنتدي ! ..لانه اصلا صاحبي من قبل ماعرف انه هنا علي المنتدي..!

- طبعا نزلت قعدت ادور في الاول علي الموديلات الدبل لاني مكنتش مقتنع ب شكل السينجل علي التابلوه ..خصوصا اني مش عايز حلجه تشوهلي شكل التابلوه ..
نزلت دورت و جبت اسعار و عملت الموضوع ده..

- بعد كده جيت ابوص علي الكاسيتات السينجل و اشوف ايه الامكانيات الموجوده فيها لقيت ..ان بنفس سعر الدبل ممكن اجيب سينجل امكانياته اعلي بكتير من الدبل ...بس المشكله في شكل التابلوه..فعملت الموضوع ده..خصوصا اني عرفت ان فكلا الحالتين انا لازم ادفع 250 جنيه لشراء وش كاسيت ..عشان اصلا الكاسيت اللي في الافيو مساحته اكابر من الكاسيت الدبل.. (الله يحرقك يا منصور..!)

- نزلت كتالوجات موديلات 2010 و 2011 و ابتديت اسأل الناس علي المنتدي ..اللي فيه بلوتوث و اللي مفيهوش..الخ..
و قعدت اقارن و اشوف انا عايز ايه..المهم استقريت علي ان الكاسيت لازم يكون فيه Folder Browsing..و ده ملقتهوش غير في موديلين في البايونير و مش موجود اصلا في اي ماركه تانيه ..(انا بتكلم علي الكاسيتات مش الشاشات)..
كان موجود في ال DEH-7250SD و DEH-9350SD...واحد موديل 2010 و التاني 2011..





- استقريت اني هجيب DEH-9350SD ..مكنش موجود تقريا غير عند ادريان مدينه نصر - و الارخص في التوفيقيه ..واحد ب 1275 و التاني ب 1250 .. علي فكره روحت (روكيت و تناتيش و فانتازيا و Max Power)..!

نزلت جبتوا من التوفيقيه ..ب 1220 بعد فصال مرير ..لان ادريان مكنش عايز ينزل جنيه و لان طبيعه بيعوا مستفزه و انا مبحبش الطنطيط سبتوا و مشيت..
المهم ..قلبت التوفيقيه كلها علي الوش ..ملقتهوش عند اي حد ..نزلت بعد كده علي المركز اليباني اللي في الحجاز (مجدي كلاريون )..ملحوظه ..الموديل ده مش عندوا اصلا..

لقيت عنده الوش الاصلي + درج ..بكام يا عم ب 250 جنيه ..طب و التركيب قالي بوصله الراديو و ضفيره كهرباء للكاسيت و التركيب 430 جنيه ..قالي بس لو عايز تقطع في ضفيره الكرهرباء انت حر بس انا منصحكش ..كده كده انا كنت عايز العربيه متتلمسش..قولت خلاص يعني اعمل ايه.. مفيش غيره ..(البس ال 430 جنيه و خلاص ..انا مش بركب كاسيت كل يوم..)

الصراحه الصنيعي شغلو نضيف قوي حتي وصله الراديو كان بيلفها بشريط لحام عشان متتفكش..و كان فاهم هوه بيعمل ايه ..و الفريم فعلا هوه بتاع العربيه .و مفيش اي فتحات في اي حته ..جيت اشوف ايه ماركه الكاسيت اللي راكب لقيتو ملوش ماركه ..بس مصري

المهم ركب و جربنا علي فلاشتي ..فرق شاسع بكل المقاييس ...صوت و بيز و كل حاجه ..و الكاسيت لسه عايز اذاكر الكتالوج بتاعه لان الاوبشنز فيه كتير اوي ..كده انا دافع تقريا بتاع 1660 جنيه في تغير الكاسيت بس..

ان شاء الله لما هيكون معايا فلوس ناوي اجيب السماعات اللي ورا دي في البيبان بدل المصري اللي راكبين و اغير كوبسته و احط اتنين بايونير دبل بيز ب 700 جنيه و اجيب GM و ريموت تاره Multi Function ب 150 جنيه..!
بس كل الكلام ده عايز 1500 جنيه تاني

اخيرا و ليس اخرا ان شاء الله ناوي احط صور بعد التركيب ..

بس بجد لازم اشكر كل اعضاء المنتدي اللي ساعدوني و انا قرفتهم و بعتلهم رسائل خاصه ..عشان الستفسارات و اي حد رد عليا في الموضوعين بتوعي اللي قبل كده..و شكر خاص ل مووش و بيسو... و طبعا الوجز صديقي لانو اتسحل معايا برضوا ..

انا عارف اني رغاي و قرفت القراء بس انا قولت اعمل موضوع شامل ...
يا ريت اي حد قبل ما بفكر يشتري اي حاجه من اي حته يخش و يسأل و يعرف ايه المميزات و العيوب و يقارن ..طريقه ممله..بس صدقني هتفرق معاك كتير اوي في معرفتك