السلام عليكم ورحمة الله وبركاته

طبعا إنتوا عارفين إن معايا سيتي 2010 lx. وطبعا العربية دي من مشاكلها فقرها للكماليات. فحبيت إني أحط كماليات من عندي.

اللي أنا محتاجه فعلا هو الإنذار والريموت. وطبعا فطيم باشا ماعندوش إنذار أساسا للعربية والمهندسين بينصحوا بعدم تركيبه عشان حيبوظ كهربة العربية (على حسب زعمهم). والريموت ب 2600 جنيه !!!!!!!!! ولما سألتهم ليه 2600 قالوا عشان حنفصل مفتاح سيفيك على العربية......... حسبي الله ونعم الوكيل 2600 جنيه عشان أفتح العربية بالريموت.....

وطبعا لما سألتهم على أجهزة رفع الإزاز لما أقفل العربية بالريموت، كإني سألته عن حاجة حرام بالظبط.

طبعا ياريت لو أقدر أركب سينسور لأن برضه من مشاكل العربية دي عدم الرؤية الخلفية بوضوح أثناء الركن وبتخليك عامل زي اللي ما بيعرفشي يركن أساسا. وبرضه في التوكيل قالو بلاش عشان حتبوظ كهربة العربية....

قلت ماشي ياواد بلاش، ركب المالتي فانكشن في التوكيل، بقالهم 5 شهور بيقولوا لسه ماجاش من برة ومستنين لما ييجي.

الحاجة الوحيدة اللي لقيتها عندهم فعلا تنفع عندي هي الشاشة ال دي في دي وكمبيوتر الرحلات والبلوتوث وكاميرا خلفية وحاجات تانية ولكن دي ب 6000 جنيه!!!!!!!!!

العربية ممتعة جدا ولكن نفسي أركب لها كماليات عشان تحلو أكتر وأعرف أستمتع بيها.

حد عنده فكرة إيه هي الحاجات اللي ممكن أركبها في العربية من غير ما تبوظ حاجة تانية في العربية أو تخرج العربية من الضمان؟؟؟؟؟؟