أعزائى الوحوش....أنا بشكركم مرة تانية على نصايحكم الغالية......النهارده جاتلى الفرصة إنى أسوق الA5 و أحكم عليها بنفسى و كانت إنطباعاتى كالأتى:
المسافة اللى سوقتها كانت حوالى 25 كم داخل المدينة....طبعا مش كبيرة لكن بالنسبة لى كنت مركز فى كل دقيقة فى هذه التجربة المثيرة....
-أول ما لفت إنتباهى و بدء التجربة بالنسبة لى بداية سيئة هو التقل الرهيب للدركسيون مقارنة بالميجان.....فعلا المقارنة بالظبط و كأنك بتقارن عربية باور بعربية مش باور...أنا فعلا كنت خلاص نسيت هذا التقل فى الدركسيون...لاحظ إنى كنت طالع من جراج ضيق جدا و محتاج مناورات كثيرة للأمام و للخلف.....
-التكييف كان أضعف قليلا من الميجان و لو إنه أتوماتيك و فيه مخرج خلفى و كل جنب على حده و لكن مقارنة بالميجان كان أخف قليلا...يعنى شعور بالراحة و لكن مش ساقع....أنا عارف إن تكييف الميجان مش جامد...لكن أنا لسه مغير فلتر و بغسل السربنتينة بالميه...فكفاءته بالنسبة لى فى الأسكندرية جيدة....
-طبعا المرايات الضم كانت بتمثل مشكلة بالنسبة لى كما أوضحت من قبل....
-العربية تقيلة و لكن بالنسبة لى مكنتش تمثل مشكلة ضخمة...يعنى كنت بقرص عليها و كانت بتقول معايا...يمكن مش صاحية زى ميجى لكن كمان مقدرش أقول إنها بطة كما يشاع عنها...على الأقل بالنسبة لسواقتى...أنا بشبع الغيار لكن مش بحرق و بحب قوى أحترم العربية....بجرى بس فى المفتوح و بعقل.....
-العربية كانت بتنقل على 3000 rpm و لما كنت بقرص كانت بتنقل عند 3500 rpm...العدادات مكنتش مريحة زى ميجى و ده ممكن علشان لسه مش متعود عليها أو علشان كم المعلومات و الشاشات اللى محطوطة فى مكان واحد....
-عجبنى جدا جدا الجيربوكس بتاع الA5....تحياتى ليهم....النقلات ناعمة جدا و متحسش بيها خالص و مريحة العربية بطريقة فظيعة...مفيش أى نتش و لا torque converter زى الميجان و كمان مفيش الkick down المميت بتاع الميجان فى حالة إستخدام الفرامل ثم الضغط مرة أخرى على البنزين....فعلا برافو A5.
-العفشة أنشف شوية من الميجان و العربية كلها بتترج فى حالة المطبات....الميجان أنعم و خاصة داخل البلد....
-الكرسى و مع إنه كان جلد طبيعى و العربية إليجانس و لكن كان ناشف و مش مريح...لاحظ أنا كمان بقارن بأول فئة من الميجان...نفس الكلام ده لاحظته مراتى و هى جنبى...علقت إن الكرسى مش مريح.....
-تجميع العربية أبطأ من الميجان و ده ملحوظ فى السواقة الرياضية و غير ملحوظ فى السواقة الهادية......
- أنا مسوقتش العربية على السرعات العالية و لكن أتوقع مع هذا الدركسيون الناشف و تقل العربية إنها تكون أثبت من الميجان على السرعات العالية......
-فرامل العربية ممتازه و لكن فرامل الميجان أكثر حساسية.....
-إضاءة الكشافات الأمامية أوضح قليلا من الميجان.....
-أبعاد العربية جيدة جدا فى السواقة علشان مفهاش التنافيخ اللى فوق الرفارف زى الموجودين فى الميجان.....
دى كانت إنطباعاتى عن الA5 فى ال25 كم اللى سوقتهم...