ازيكم يا شباب
يارب تكونوا بخير جميعا
النهردة كان يوم اجازة طبعا والحياة بيس وزي الفل :E_braces[1]:
قلت انزل اتفسح شوية كنا عاملين يوم لدار ايتام وواخدينهم الحديقة الدولية -بيبقا يوم لذيذ جدا واحساسك مع الاطفال وانت بتلعب معاهم تحفة اساسا-
المهم ماشي على الدائري وقلت هنزل نزلة مدينة نصر بدل مادخل موقف العاشر واخد اوتوستراد ووجع القلب دا
وكالعادة
الناس قبل نفق السلام غير الناس بعد نفق السلام
بحس انهم قبل نفق السلام بيبقوا محترمين جدا حتى اللي بيكسر السرعة مش بكتير بيبقا 100/110 بالكتير
لكن تعدي نفق السلام تلاقي الهادي فيهم ماشي 120/130
انا في العادة بمشي 90 ملتزما بالسرعة القانونية عشان معنديش وقت اني اعد اجري واهدي عشان الرادار والكلام دا
مبوجعش دماغي وبمشي على السرعة القانونية وخلاص وبحس انها بتنجز معايا طول مالطريق ماشي الحمد لله
المهم نزلت نفق السلام وطلعت من عليه وماشي 90 زي مانا -ماشي في الحارة التالتة- الطريق اربع حارات
ولقيت من ورايا عربية دبل كابينه كان في الحارة التانية وقام كاسر على الرابعة عشان يعدي مني
انا قدامي تريلا وطبعا سايب بيني وبينها مسافة عشان التريلات بترمي حجات وبتاع بتبوظ الازاز والكلام دا
المهم في الحارة الرابعة انا شايف قدامي تاكسي واقف عطلان وبيغير عجلة تقريبا
كدة بقا الموقف انا وقدامي النقل في الحارة التالتة
النقل الدبل كابينه وقدامه التاكسي في الحارة الرابعة
النقل كان قدامه فرصة انه ينزل تاني على الحارة التالتة ويهدي بيني وبين النقل انا سايب مسافة كافية تدخل عربيتين كمان مش عربية واحدة
المهم لقيت بتاع النقل زود اكتر وبقا جنب التريلا ومحسبش حساباته صح لقا التاكسي في وشه
قام مفرمل طبعا والعربية عومت منه وقام كاسر يمين في شمال وكان هينزل تحت التريلا يتفرم لولا ستر ربنا
من غباؤه كمان ان ماشي وراه بنفس سرعته تاكسي فيرنا
كان الاولى بسواق الدبل كابينه انه ينبه سواق الفيرنا ويفتحله الطريق بدري عشان يعرف يتصرف
ولكن سواق الفيرنا اتفاجأ ان قدامه التاكسي العطلان دا وزي ما عمل الدبل كابينه عمل الفيرنا بالظبط
فرملة جامدة جدا ويمين في شمال
والحمد لله ربنا سترها مع الاتنين
انا طبعا لما شفت المشهد دا توقعت ان فيه حاجة غلط هتحصل من اول ما العربية عدت مني فهديت وشغلت فليشر
ولما اطمنت ان الدنيا تمام ومفيش مشاكل قمت قافل الفليشر ومشيت لقيت طبعا بتاع النقل هدى سرعته خالص واترعب من اللي حصل فقلتله بالراحة شوية فاتكسف وقلي حاضر
طب انت موت في جلدك وعرضت حياة اللي معاك للخطر وعرضت حياة التاكسي اللي وراك للخطر اضافة لأنه لو كان نزل تحت التريلا كانت هتحصل مجزرة لأن التريلا برده هتعوم وهتاخد الحارتين اللي جنبها وكانت هتبقا خرابه
هيفيدك بايه انك تجري وتكسب 5 ثواني وفي النهاية مش هتوصل خالص
طب ما تمشي بالراحة وتخسر نص ساعة في سبيل انك توصل بسلام
وياريتها نص ساعة
دا تأخيره مكانش هيزيد عن 10 ثواني اللي هي هينزل في الحارة التالتة قدامي يفضل ورا التريلا لحد ما يعدي من التاكسي وبعدين ينزل على الحارة الرابعة ويعدي منه بكل سهولة بدل الرعب اللي عاش فيه دا !
معلش كلمتين كنت مخنوق منهم وجيت افضفض معاكم بيهم ! :E_braces[1]: