الموضوع: شهادتى من وسط أهالى العباسيه اللى بيقولوا عليهم بلطجيه

المشاركة الأصلية كتبت بواسطة ashouhdy

تحليلك خيالى شوية ... كانوا مع بلطجى !!!\\

طب وطلع فوق المدرعة عادى كدة وبيشاور بفلوس

والتصفيق و الهداف عشان لقم فلوس مع بلطجى !!!

طيب ماشى حمشى فى تحليلك انتا
حبة "البلطيجه" اللى قدامه قد ايه ... قول 30 واحد (انا واخد رقم قليل اوى بس خلى علينا)
و هو ماسك فى ايده قد ايه (تقديرى 500 جنيه .. بس ماشى ياعم خليها 1000 جنيه ) يبقى كده نصيب البلطجى منهم قد ايه 33 جنيه على الاكثر ؟؟؟؟؟؟؟؟
المقصود ان الفلوس اللى ماسكها دى ماينفعشى تتوزع على الناس دول ... و كمان هو كان ماسكهم فى كبشه كده لكن انا اعرف اللى عاوز يورى فلوس بيمسكهم وهى مفروده ( زى اللى بينقط فى الافراح البلدى ) و على فكره احتمال بقى ماتكونشى فلوس اصلا
وياسيدي ادى لنك لنوت بتاعت عمرو غريبه عضو 6 ابريل و اللى بيقر ان اللى هاجموهم من اهالى العباسيه ... شهد شاهد من اهلها

المشاركة الأصلية كتبت بواسطة khaled_sabry

وياسيدي ادى لنك لنوت بتاعت عمرو غريبه عضو 6 ابريل و اللى بيقر ان اللى هاجموهم من اهالى العباسيه ... شهد شاهد من اهلها

Log In | Facebook

المشاركة الأصلية كتبت بواسطة adelseliem

احترامى لرأيك وأسف لأنفعالى

الشهادات دى كدب والنهارده هقولكم الناس اللى أساميها موجوده دى حقيقين ولا لأ

والله العظيم شارع غرب القشلاق ده هو الى كنت واقف فيه والطوب بيتحدف علينا وكل العربيات الى فيه اتكسرت

لو عايزين تقولو عليا بلطجى وضباط الشرطه مأجرينى أنا وكل اهالى الشارع الى كانو معايا قولو



معلش لانفعالى بس حط نفسك مكانى ويتقال عليك بلطجى وقابض فلوس

وكل الناس الى وقعت قدامى من الطوب الى عارفهم بالاسم يتقال عليهم بلطجيه علشان يبان ان الثوار على حق

+1111111
شكرا لشهادتك وكشف الحقيقة
6 ابريل تعرضت لخسارة فادحة يوم 23 يوليو و فقدت اي تعاطف من جانب الشعب
و كما توقعت سيقومون بحملة كبيرة علي مواقع الانترنت و نشر قصص و فيديوهات لمحاولة تحسين صورتهم و تأليب الرأي العام ضد الجيش و الشرطة
هذا ما تدربوا عليه باعتراف اعضاء الحركة و هم يجيدون استخدام الانترنت و الميديا لحشد الجماهير

المشاركة الأصلية كتبت بواسطة sharafconsult

أقسم بالله العظيم ده اللى شوفته واللى سمعته

أولا اللى سمعته
يوم الجمعه بالليل لما عرفت الاحداث ( من موضوع على المنتدى ) كتبت رائى وبعد كده كلمت واحد صاحبى ساكن فى العباسيه ( فى الشارع اللى على ناصيته محطة البنزين ) وسألته على الموضوع قالى بالضبط :
فيه حوالى الفين واحد جايين بيهتفوا علشان يشيلوا المجلس وأهالى العباسيه ( الشوارع اللى قدام معهد القلب ومسجد النور ) طلعوا على الصوت ولقوا مناظر غريبه على وصف صاحبى بلطجيه لأنهم كانوا مبرشمين ( خلوا بالكم من وصفهم لأن يوم السبت وضع تانى ) وكان معاهم بنات شكلهم مش محترمين والخناقه بدأت لما أهالى الشوارع دى مسكوا بنات وولاد منهم داخلين العمارات عندهم ( مقالش كانوا ريحين يعملوا حاجه لأنهم طردوهم أول ما دخلوا ) وقالى دول مش بتوع التحرير لأن فيه بنات لبسها غريب وواخدين بشله فى وشهم وقالى أن أهالى الشوارع دى خرجوا يمنعوهم من أنهم يروحوا المجلس أو يدخلوا شوارعهم ولما بدأوا يضربوهم الاهالى ضربوهم علقة موت على حد تعبير صاحبى

ثانيا اللى شوفته

أنا كنت مسافر ورجعت من المطار الساعه 6 وكلمت صاحبى قالى الاعداد النهارده أكتر من أمبارح بكتير والجيش قافل الشارع وأهالى المنطقه كلهم واقفين على ناصية شوارعهم علشان محدش يدخل

رحت على صاحبى وركنت عنده ورحت معاه عند الشوارع ولقيت كل أهالى المنطقه رجاله وشباب وستات وأطفال ( أقسم بالله العظيم زى ما بأوصف ) وواقفين بيحدفوا طوب على المتظاهرين والمتظارين بيحدفوا طوب عليهم ولما سألت عرفت أن المتظاهرين ( مجموعه منهم مش كلهم ) عايزين يدخلوا الشوارع والأهالى بيمنعوهم

وقفت معاهم وكان الطوب نازل علينا ( وعليهم ) زى المطر وكل العربيات اللى فى الشوارع الداخليه أتكسرت ومكنتش فاهم ليه عايزين يدخلو الشوارع لكن الناس قالولى أنهم عايزين يضربوهم زى ما أتضربوا أمبارح وكل دقيقتين المتظاهرين يهجموا مره واحده ويوصلوا لجوه الشوارع وأهالى العباسيه يروحوا ردين مره واحد ويطردوهم بره الشوارع ( الكلام ده فى شارعين بالضبط على ناصية البنزينه وقدام جامع الفتح عند مطلع الكوبرى)

واللى شوفته برضه أن كان فيه ناس كتير حوالى 100 أو 150 من متظاهرين التحرير كانوا واقفين وشايلين شنط على ضهرهم وكانوا بيتكلموا معاهم وبيقولوهم فكرهم بس كانوا بعيد عن الضرب عند معهد القلب تحت الكوبرى المعدنى للمشاه

يعنى كان بالترتيب
الجيش وبعد كده متظاهرين بيهتفوا وبعد كده متظاهرين بيحدفوا طوب على الاهالى وبعد كد الاهالى بيردوا بالطوب عليهم وبعد كده متظاهرين واقفين وبعد كده أهالى العباسي وأخر مجموعتين بيتكلموا مع بعض

وبرضه شفت أن كل اللى جاى من التحرير بيعدى من وسط كل دول ومحدش من الأهالى بيكلمه طالما أنه مش بيحدف طوب عليهم ,

وصاحبى قالى المناظر دى غير اللى كانت موجوده أمبارح لأن شكلهم ولاد ناس غير بلطجية أمبارح ( المجموعه اللى بتتكلم معاهم )

وأنا واقف على ناصية الشارع وقناة الجزيره شغاله فى قهوه كان فيه واحد بيتكلم مع المذيع وبيقول أن الطوب والمولوتوف من البلطجيه وأنه واقف قدام معهد القلب , أستغربت لأن أنا واقف قدام معهد القلب ودى منطقة الحوارات زى ما وضحت والضرب كله عند الجامع ومحطة البنزين

وبعد الولد اللى أتكلم لقيت أسماء محفوظ بتقول للمذيع أن البلطجيه بيضربوهم وأن دول بلطجيه الجيش جايبهم , وساعتها عرفت أنها كدابه


قبل ما أمشى حوالى الساعه 8.30 لقيت الطوب أتحول لمولوتف لأن ناس كتير وقعت من أهالى العباسيه ( والله العظيم قدامى ) وفضلوا يلموا زجاجات البيبسى من القهاوى ويملوها بنزين من محطة البنزين ويحدفوها على المتظاهرين لكن المسافه بينهم كانت كبرت قوى والقنابل بتقع فى النص


على فكره أنا بروح المنطقه دى من 15 سنه وبقعد مع صاحبى على القهوه وعارف أهل المنطقه كلهم ( لأن المنطقه دى تعتبر شعبيه وكلهم عارفين بعض ) وهما اللى شفتهم واقفين على ناصية الشوارع علشان محدش يدخل

وبعد حوالى ساعه كمان مشيت وعرفت من صاحبى أن المتظاهرين بدأوا يمشوا وضرب الطوب خلص وأنه واقف دلوقت عند جامع الفتح ( مكناش نقدر نوصل المنطقه دى ) واللى موجودين حوالى 500-700 بيهتفوا بس

دى شهادتى لأن كل مظاهره بسمع زيكم أن فيه بلطجيه من المتظاهرين وفيه بلطجيه بيضربوا المتظاهرين وكنت عايز أعرف الموضوع بجد

دى شهادتى والله على ما أقول شهيد

مع تحياتى

المشاركة الأصلية كتبت بواسطة alaasaid

السلام عليكم

أوكد على شهادة حضرتك لان والدى ساكن فى العباسية و شاف زى ما حضرتك حكيت و ربنا يصلح الاحوال و يكفينا شر الفتن و الفرقة .

أشكركم لتوضيح الحقيقه

أستاذ sharafconsult واضح من كلامك أنك كنت واقف جنبى لأن أنا كنت فى الشارع ده من أول الأحداث وبنصد الى بيقول على نفسهم ثوار وعايزين يهجموا على الشارعين دول .