استلام البي واي دي اف 3 و الترخيص و صيانة الالف
السلام عليكم اولا: احب اتشرف اني بقيت واحد من ملاك العربية بي واي دي اف 3 اتوماتيك .
انا اسف اذا كنت هطول عليكما شوية بس انا هحكي الموضوع باختصار علي قد ما اقدر علشان الفائدة تعم للجميع و اتمني انوا يكون موضوع مثمر ان شاء الله و اي استفسار هجاوب عليه علي قد ما اقدر.
نبدأ بالاستلام: طبعا كان يوم جميل و الواحد متحمس جدا و عايز حد يقرصه من كتر ما هوه مش مصدق نفسه :E_braces[1]: اول ما العربية جت فرحت فرحة السنين خصوصا اني كنت دايخ علي اللون الاسود.. المهم العربية في نظري الشخصي و بحيادية تامة فوق الجيدة جدا بالنسبة لتمنها
مميزات: 1- صالون فخم وواسع باللونين الاسود و البيج مع ان البيج عايز عناية خاصة علشان بيتوسخ بسرعة
2- فتحة سقف بوضعين ( علشان العربية اتوماتيك المانيوال مفيهاش حاتة الكاملة)
3- الخامات كويسة جدا جدا بالنسبة لتمن العربية
4- الكاسيت صوته بدون مبالغة تحفة جدا و جميل جدا ( 2 سماعة امامية + 2 تويتر + 2 سماعة خلفية) مع ملاحظة ان السماعات كبيرة مش صغيرة و صوتها عالي و نقي
5- سنتر لوك (كان ناقص وحدة رفع بس) + 4 ازاز كهرباء + 2 مرايا كهرباء
6- 2 اير باج + فرامل ABS و EBD + باركنج سينسور
7- فرامل قوية سواء يد او فرامل الرجل + لمبة استوب
8- شنطة واسعة جدا جدا
9- تارة مالتي فانكشن
10- باور ستيرينج
11- فوج خلفي شمال و اليمين عاكس و مفيش امامي ( العربية مجهزة لفوجات امامية)
12- مقابض نيكل خارجية و داخلية
13- فرش جلد
14- اهم حاجة بقي السحب تمام التمام بس مع التكييف بيقل شوية و الثبات تمام التمام
15- قطع الغيار سعرها كويس جدا جدا جدا
نيجي بقي للعيوب:
1- التقفيل كويس بس ممكن يكون احسن بكتير يعني بيكون في عيوب لا تذكر مسمار مش مربوط كويس .. حاجة مش متعشقة كويس حاجات كده
2- في ناس بتقول ان الشنطة لازم تترزع علشان تتقفل بس الموضوع ده مش موجود معايا
3- العربية في الملفات علي سرعة عالية عايزة تحكم شوية بس يمكن علشان انا لسه مش متعود عليها و اتمني لو حد عندوا العربية يفدني في الموضوع ده
4- دواسة البنزين تحس انها تقيلة شوية بس نسيت اعملها في صيانة ال 1000 كيلو و ان شاء الله اعملها في ال 5000 ده لو كان عيب
4- العربية لسه مكملة 1250 كيلو فمفيش لسه عيوب كتيرة ظهرت بس اول ما الاقي حاجة هبلغهلكوا ان شاء الله و ربنا ما يجيب حاجة وحشة
شكل العربية فخم جدا من جوه و من بره بالنسبة لتمن العربية و خاماتها كويسة زي ما ذكرت فوق و العفشة و الثبات كويس جدا جدا جدا جدا و ناعمة جدا علي الطريق
الترخيص: انا مش فاكر قوي بس اللي فاكره هكتبه
1- 120جنيه طفاية حريق
2- 315 جنيه ترخيص سنة (تقريبا)
3- 120 جنيه استمارة تأمين مع شركة مصر للتأمين
- بس كده بيتهيألي مفيش حاجة تاني بالنسبة للترخيص
صيانة ال 1000 كيلو بقي:
رحت عملت صيانة في مركز القطامية و الناس هناك كويسين جدا في المعاملة و يمكن انا بقعد معاهم مش في الاستراحة فوق
المهم: العربية كان فيها كام ملاحظة كده ان فرامل اليد عايزة تتشد و ان الفرامل مكنتش جامدة و ان الموتور بيتكتم اوي مع التكييف
دخلت العربية و قعدت حوالي ساعتين بالظبط طلعت و لاقيتوا مغير فلتر زيت و زيت موبيل اكس اتش بي و فرامل اليد اتشدت و الفرامل اتظبطت و العفشة اتربطت و الموتور بقي انعم و ظبطه علي الجهاز و كلفت 155 جنيه
العربية بعد الصيانة اختلفت تماما بقي في نعومة علي الطرق جميلة و العربية حسيت انها كانت مخلعة كده بس لما العفشة اتربطت بقت تحفة جدا ما شاء الله عليها في الطريق و التكييف بقي كويس و الموتور هدي بعد ما اتظبت علي الجهاز و السحب طبيعي بيقل مع التكييف لما يشتغل زيها زي اي عربية اوتوماتيك تانية لكن كسحب عربية كويس جدا جدا و الموتوي قوي و بعد 3 ار بي ام تحس انك راكب اسد عايز ياكل الطريق.
اتمني اني مكنش طولت عليكما و اتمني يكون الموضوع فيه افادة للناس كلهم و ربنا يباركلنا في عربيتنا و يكفينا شرها يا رب .. اللهم امين
