اقتراحات اضافية لتمويل حقيقى للعلاوة الأجتماعية
طبعا احنا شفنا الحكومة اتصرفت ازاى علشان توفر موارد حقيقية لتمويل العلاوة الأجتماعية، ايه رأيكم احنا كمان نقول اقتراحاتنا، و بما ان الحكومة اتبعت مبدأ الامعقوليزم فى قراراتها، يبقى احنا كمان نعمل كده و مفيش حد احسن من حد، عن نفسى باقترح الأتى:
- فرض ضريبة فرحة، يعنى كل واحد يفرح، يدفع، و تقسم فئات، يعنى فرحتك بنجاح ابنك فى الأبتدائية تبقى اقل من ضريبة فرحتك بيه لما يلعب فى نادى اسمنت حلايب
- فرض ضريبة هواء، و تحتسب على حسب مقاس محيط صدر كل مواطن، يعنى على قد ما تستهلك، تدفع
- فرض ضريبة مبيعات على الدم اللى بتتبرع بيه، تقولى طب انا باتبرع مش ببيع، اقولك يمكن اللى خده منك يبيعه ;)
- تغيير نظام عدادات الكهرباء و يبقى لكل أوضة فى الشقة عداد، و يبقى سعر كهربة غرفة النوم أغلى من كهربة غرفة المعيشة علشان المفروض الناس تنام فى الضلمة و اللى بينام فى النور يبقى مرفه ابن مرفه، و أغلى سعر كهرباء هيكون للمطبخ، علشان اللى بيطبخ هيبقى من فئة الأثرياء، و كهربة الحمام تبقى بنفس سعر المطبخ مع اضافة بند منفصل لكهربة لمبة الحوض علشان دعم حلاقة الذقن، تشجيعا للمواطنين على حلاقتها علشان الجزيرة متشنعش على مصر و تقول بقت كلها اخوان
يا ترى حد عنده اقتراحات تانية؟