السلام عليكم ورحمه الله
دي يا جماعة صور الزيارة اللي اتخطفنا ليها امبارح اثر استضافة كريمة جدا من شخص لا يقل كرما
وهو الاستاذ ماجد زميلنا في المنتدي
اتخطفنا انا ومحمود حفناوي وخالد سبعاوي ومعانا صاحب الدعوة طبعا ماجد
كل واحد فينا كان وراه مشاوير قد كدة وانا كان عندي برد شديد لكن مجرد ما سمعنا كلمة دعاوي VIP اتغير الوضع والمواعيد اتاجلت والمسكنات اشتغلت
ورحنا جري قضينا وقت تحفة في الروقان قبل الزحمة وهسس الشعب المصري اللي بيمشي يلم بروشورات وشنط علشان يعمل انه مهتم وفاهم
ويخرج يرميهم علي باب المعرض مع حسرة قلب اصحاب التوكيلات اللي طابعينها بالشيئ الفلاني

المهم بدون اطالة كانت في مفاجاتني في المعرض
العربي الاسبيرانزا A113 and A213 هاتش باك وسيدان علي التوالي بموتور 1300 87 حشان فول اوبشن تقفيل جميل جدا وشكل رائع وتمن اروع
45 و 48 الف جنية للهاتش باك والسيدان
طبعا كلام يجنن خاصة لما تشوفوا العربيات
تاني المفاجات من الفطيم انه اعاد طرح الهوندا سييتي 1300 فول اوبشن مرة تانية وبتمن هايحرق بيه كل الاسعار
83900 جنية
ايون مش غلطة مطبعية - هوندا سيتي 1300 فول اوبشن 90 حصان ب 84 الف جنية وضمان 100 الف كيلو
يا حسرة علي الكورى اللي في نفس الفئة-ولا الماليزي-لازم يعيدوا حساباتهم تاني
الفيرنا اتقفلت انتاجها وبتنزل هندي في نسخة 1500 مع الاحتفاظ بال 1600
النسخة الجديدة من البريليانس 1600 تمنها مبالغ فيه -107 الف جنية مع وجود منافسة يابنية قوية
في لانسر وصني وتيدا واركب عربية صيني تقفيل مصري يبقي اكيد في هبل في الاسعار
العربية ال BYD عاملة تواجد كويس وجايبة مواتير ميتسوبيشي وعاملة شكل هاتش باك جميل شبة الاوبترا الهاتش باك ومنزلاه ب 73 الف تقريبا
العربيية ال لينا الجديدة من فيات حلوة قوي بس موتور 1400 علي 77 حصان عند 6000 ار بي ام
يعني العربية تموت عشان تجيب 140 بس شكلها شكل البوجاتي بالظبط ونازلة ب 105 الف تقفيل تركي
اما البرافا ال 1400 برضة بس اتنين كامة ب 140 الف جنية
يعني مش هانشوفها ابد
قولولي مين يجيبها في وجود السيفك الجديدة بموتورها وتقفيلها واسم هوندا عليها
مش عارف دول بيفكروا ازاي

بجد بجد لازم الكل يروح وانا هاسيبكم دلوقتي ولما ارجع هابقي اكمل او سبعاوي يدخل يحط انطباعاتة بقي

مراسلكم من اتوماك
كريم منير