الموضوع: سؤال عن مكان المطعم اليابانى والمطعم الصينى فى القاهرة ؟؟؟

من أسبوع طلع في دماغي أنا و واحد صاحبي اننا نجرب مطعم ياباني و ناكل سوشي
من زمان و انا عايز أجرب السوشي و المدام مش راضية و بتقولي ده سمك نيء
و لما لاقيت واحد صاحبي دماغة زي دماغي و عايز يجرب رحنا مطعم ياباني في المعادي..جنب فرايدايز المعادي علي الكورنيش اسمه vision
اول معلومة عرفتها ان السوشي ده appetizer يعني فاتح شهية مش وجبه اساسية
طلبنا كل أنواع السوشي عشان ناخد فكرة و هو عبارة قطعة ماكولات بحرية نيئة ملزوقة في شوية رز
جربنا جمبري-كابوريا- سلمون- اسماك معرفش نوعها-اخطبوط-تعبان بحر
عايز اقولك ان طعمه وحش جدا...حتة سمك ني علي رز بس احنا طبعا خلصنا الاكل كله عشان كنا دافعين فيه 100 جنيه للفرد
بس الحق يتقال الحاجة الوحيدة الي طعمها كان حلو جدا هو ثعبان البحر و السبب انه مشوي يعني ده السوشي الوحيد اللي مش ني
لو عايز نصيحتي خد وجبة سمك او فراخ او لحوم علي الطريقة اليابانية و زود جنبها قطعتين سوشي تعبان البحر اسمها eel
التكلفة للوجبة حوالي 50-80 للوجبة + شوربة وسلاطة يعني حوالي 100 جنيه للفرد و المطعم شكله راقي جدا و ديكوره كله ياباني و ينفع لو عايز تعزم ناس عزومة محترمة
هتلاقي عصيان و شوكة و سكينة و في معلقة مع الشوربة
دي صور انواع السوشي و اول صورة هي صورة تعبان البحر الي طعمها عجبني




جمبري



اخطبوط


سلمون

المشاركة الأصلية كتبت بواسطة abdalah_hashem

طب سؤال بسيط كدة فاكس سوشى

بس هى نية لية مش نص سوى حتى :؟؟؟؟

بس الطباق دية شكلها صغيرة قوى

بس حلال وللا بيستخدموا كحوليات فى الاكلات دية؟؟؟

هو السوشي لازم يبقي ني باستثناء تعبان البحر اللي كان مشوي
و زي ما قلت لك صعب قوي علينا كمصريين نستطعم سمك ني و اكيد مش هايعجبك عشان كده اطلب وجبة أحسن و زود سوشي تعبان البحر جنبها
الاطباق في الصور صغيرة لان قطعة السوشي مش وجبة دي مجرد فاتح شهية مع الوجبة الاساسية
و أنا ما سألتش علي حكاية الكحوليات بس ده مطعم في مصر استحالة يكون بيحط كحول في الأكل..ممكن في اليابان يكون في وصفات بيدخل فيها كحول

اخونا العزيز
انا ممكن ادلك على المطاعم الصيني في واحد في مصر الجديده قبل المحكمه وفي واحد في شارع شهاب وفي واحد في التحرير بس ده مطعم كوري
المطبخ الصيني والكوري قريبين من بعض بس انا بحب الصيني اكتر
بالنسبه للمعالق فيه طبعا معالق بس انصحك تتعلم تاكل بالعصايتين - اسمهم شوبستك_
الأكل الصيني أغلبه مسلوق صحي بس مش بتاع العيانين وممكن تلاقي كل انواع الخضار فيه
وطالما انت في مصر مش في الصين يبقى كل ةانت مطمن ومش هقولك ليه عشان انا لو قلتلك على اكلهم في الصين ممكن متدخلش المطعم من اساسه
اي استفسار انا تحت امرك

بس فى واحد بجد بجد خطيييييييييييييير بس مش فاكر اسمو بس هوا فى سيتى ستارز جمب ماك وبتزا هت وكنتاكى

هو فيه حاجة بس يا جماعة
انا كنت قرأت في مرة ان السوشي حرام
ليييييييييييييييه
لان السوشي بيدخل في اعداده نوع مميز من الخل اسمه خل الارز
وهو نوع من الخل مستورد خصيصا من اليابان ودول جنوب شرق اسيا
وخل الرز ده بيدخل في تركيبه الكحول
وطبعا كلنا عارفين الحديث الشريف " ما اسكر كثيره فقليله حرام "

طبعا انا الخبر ده زعلني جداااااااا
لاني كان نفسي اجرب السوشي من زمان ويوم ما قررت اجربه لقيت المعلومة دي فتراجعت فورا

اما عن انهم يكونوا بيستخدموا في مطاعم مص نوع تاني من الخل مفيهوش كحول
معتقدش
اولا لان خل الرز ده حاجة اساسية في اعداد السوشي
ثانيا ان اغلب مطاعم السوشي في مصر ان لم يكن كلها الشيفات اللي فيها يابانيين او صينيين او من جنوب شرق اسيا
ثالثا ان كاتب الموضوع اللي قريته ده كان بيقول انه سأل في اكتر من مطعم سوشي لما لقي ان خل الرز مكتوب عليه ان من مكوناته الكحول ،، وعرف ده طبعا بعد ما شال الاستيكر اللي ملزوق علي العبوة اللي بتتباع عندنا في مصر
ليجد استيكر بتاع بلاده
ده اللي مكتوب عليه كحول
المهم الراجل بيقول انه سأل مطاعم سوشي كتير لقي ان كلهم بيستخدموا نفس الخل المستورد خصيصا من اليابان
ولما سألهم عن موضوع الكحول كلهم حاولوا يهربوا ورفضوا انه يشوف عبوة الخل اللي بيستخدموها

ده اللي انا اعرفه وحبيت اقوله للامانة
الحكاية مش مستهالة نعصي ربنا عشان غدوة

وياريت لو حد عنده معلومة غير دي يقولنا
وانا لو طلع مش حرام اعمل حسابي معاك انت وصاحبك
ني ني يا عم
يعني هو اللي احنا بناكله من الشارع ده مش الني ارحم منه