الموضوع: الياريس عملتها معايا على الصحراوي ! ! !

السلام عليكم

معلش يا جماعة ان كنت متقل عليكم في المواضيع والاستفسارات بس الواحد خبرته في العربيات مش قد كدة والياريس دي ربنا يعلم انا بخاف عليها قد ايه

ومش بحب امشي ورا كلام الميكانيكا عشان مش بثق فيهم

فا في الاخر بلاقي اني ماليش غير اعضاء نايل موتورز

الموضوع بما فيه امبارح طلعت في دماغي انا وكام واحد زميلي اننا نطلع مرينا صد رد في نفس اليوم

اتفقنا نطلع عربيتين لان العدد كان كبير طلعنا بعربيتي الياريس وعربية واحد زميلي النترا قلنا هنتحرك تاني يوم على الساعة 10 الصبح (اللى هو النهارده )

كشفنا على الزيوت والاستبن والعجل وكله تمام

توكلنا على الله وبسم الله وطلعنا على الصحراوي

طبعا اكيد مشغلين قران عشان ربنا يسترها معانا في الطريق ونروح ونرجع بدون مشاكل

زميلي اللى معاه الالنترا سخني وكان مستقل بمتور الياريس لانه 1300 وبدأ يشد

طبعا انا مينفعش حد يقلل من قيمة الياريس واسكت ربنا يعلم انها في عنيا احسن عربية في العالم ( مش في العالم اوي يعني )

فكان لازم اجري واوريه الياريس ال 1300 بتعمل ايه خاصا ان الطريق كان فاضي وكان فيه مجال للجري

عن عن عن والعربية الحمد لله رفعت راسي وجابت 180 بدون اي مشاكل وكل حاجة الحمد لله عشرة على عشرة وحسيت ان ده اخرها على الرغم ان كان ال Rpm على 5 وقتها تقريبا (وانا كنت قريت ان كذا واحد جاب بيها 200 بس ده مش موضوعنا حاليا ومش فارقة كتير)

المهم هدينا بعدها ومشينا براحة والامور تمام والحمد لله مافيش اي مشاكل

صاحبنا بتاع الالنترا فجاءة وعلى طريق العالمين طلبت معاه يجري تاني

عن عن عن 150 -160 خلاص هطلع منه لقيته عمال يبعد والفرق بيزيد وانا مستعجب انا خلاص كنت هطلع ابص على العداد الاقي العربية مش عايزة تجيب اكتر من 160 ! والRpm واقف عند 6 مش عايز ينقل على الغيار الرابع (العربية عندي اتوماتيك)

استغربت دوست بنزين جامد لقيت ال Rpm نزل ل 4.5 وراح طالع ل 6 مرة تانية علطول والعربية برضوا ماشية 160 مش عايزة تزود عن كدة ابدا !

حسيت ان فيه حاجة غلط حصلت هديت ومشيت براحة قلت امشي براحة اشوف العربية هتنقل على الرابع ولا لاء لقيتها بتوصل للتالت وتقف !

ركنت على جمب فتحت الكبوت ابص مافيش اي سخونة مافيش اي حاجة

سميت الله ومشيت تاني براحة

اول تاني تالت وبرضوا مافيش رابع ! !

طبعا اضايقت جامد وحسيت ان فيه حاجة غلط حصلت ومش عارف هي ايه هديت ومشيت براحة لان كان فاضل سعتها على مرينا حوالي 20 كيلو قلت امشيهم براحة لحد ماربنا يسهل واوصل بالسلامة وبعدين ابقى اشوف اللى حصل ده من ايه

وصلت وركنت العربية سبتها تهدى وتبرد وبليل وانا راجل محرقتش خالص وماشي على مهلي وكنت سايب العربية تاخد سرعتها براحتها بس الحمد لله لقيتها بتنقل للرابع عادي بدون مشاكل

قلت الحمد لله وحسيت اني اتحاملت على العربية بزيادة وحرقت على الماتور بزيادة مع الجو الحر وده اللى سبب المشكلة لاني مشيت فترة مش قليلة حارق على 180

بس برضوا مش مطمن وعايز اعرف اللى حصل ده من ايه وهل دي بداية لعطل كبير ولا حاجة في الماتور او الفيتس ولا ايه ؟ ؟

ومتشكر ليكم ومعلش لو كنت بتعبكم معايا