السلام عليكم،، أنا عملت الموضوع ده بعد بحث و قراية كتير فيه !! و لكني حطيته في قسم ورشة نايل موتورز ،، و لاحظت أن في ناس كتير في قسم التعديلات لسه بتسأل فيه ،، فقلت أنقله بظبط زي مهوا في قسم التعديلات !! بحيث أنه يفيد أن شاء الله ،، و تحت امركم في أي سؤال أن شاء الله أعرف أفيدك فيه !!
أسيبكم مع الموضوع
=====================================

(1)
بسم الله الرحمن الرحيم


السلام عليكم ورحمة الله وبركاته ،،


أخواني في منتدى نايل موتورز ،، لاحظت كتير من المواضيع الي بتسأل عن نظام العادم ، تحسينه ،، الديفيل ... و هكذا


لذلك قررت البحث ،، و أضافة معلومات أكتر لمعلوماتي المتواضعة في الموضوع ده !!


انوي بجدية أن يكون هذا الموضوع ملاذ لكل من يبحث في جزئية التعديل في نظام العادم ،، أنوي أيضاً أن يكون الموضوع مرجع لكل أخواني الي عايزين يعملوا نظام عادم بنفسهم ،، او يعملوه عمولة ...


أعذروني الموضوع حيكون متقطع ،، نظرأ لأنشغالي ،، حنزل جزء جزء أول بأول أن شاء الله !! بحيث تكتمل المنظومة :)
الموضوع من أجتهادي في البحث ،، و أن شاء الله حذكرلكم المرجع في الآخر علشان الأفادة تعم ,,, هو عامةً مرجع واحد حتى الان لقيت فيه معلومات قيمة !!
================================
بسم الله نبدأ ،،


مبدأياً ،، علشان نفهم في تعديل حاجة معينة ،، لازم على قد منقدر نعرف أصلها ،، و مكوناتها !!
~~~~~~~~~~
ايه هوا العادم ،، باختصار و بدون لك كتير ،"لأن أكيد كلنا عارفين هوا أيه" ، هو نظام أخراج غازات الأحتراق من الموتور !! علشان الموتور مكون من سليندرات "غرف الأحتراق" دي بيتحرق فيها خليط الأحتراق ،، .. لازم بعد ميتحرق ،، يطلع براه ،، علشان السليندر تفضى و تقدر تستوعب خليط تاني تحرق ،، و هكذا ،، و هي عملية دورية !!


طيب في الغالب بيتكون من أيه ؟؟



زي محنا شايفين ،، بالتدريج من الشمال لليمين ،،
1-هيدرز ،، ده الي بياخد من كل سليندر و يجمعه في أنبوب العادم ،،
2-محول حفزي ،، ده فيه مواد بتساعد على أكبر تحويل ممكن لنواتج الأحتراق ،، لنواتج آمنة غير سامة.. بتقنيات معينة مش حنخوض فيها


3،4 -دول كواتم الصوت muffler ،، دول يا أخواني وظيفتهم الوحيدة و الأساسية هي كتم صوت غاز العادم و هو ماشي في النبوبة بتاعت العادم !!
========
طيب ايه حكاية الديفيل دي بقا ؟؟؟


الديقيل ،، دي علبة كاتم صوت ،، بس مش كاتم صوت ،، فهمتو حاجة .. ؟؟
بمعنى !! العلبة دي مش بتكتم الصوت زي العلبة العادية الي بتيجي بيها العربية ،، و بتكون معمولة بحيث أنها متكتمش الصوت كله !! و تستغله في تطليع صوت نعرة معينة بيتميز بيها الديفيل !!
============================
في العربيات العادية ،، علشان يتم كتم الصوت الناتج من سريان العادم في الأنبوبة ،، علب كواتم الصوت دي ،، بتكون فيها عواقب لسريان العادم !! بتخليه يخبط فيها ،، و يرد ،، و يعمل دوامات جوا العلبة دي بغرض تقليل سرعة خروجه من الجاكمان ،، بالتالي بيقل الصوت الي طالع منه خالص !! .....بس للأسف الحلو ميكملش !!
لأن الحكاية دي أينعم بتقلل الصوت !! لكن بتزود الباك برشير على الماتور !! بالتالي بتكتمه لأن حركة الغاز في انبوبة العادم أتوقففت و أتخنقت ،، بالتالي حصل زحمة في الأنبوبة ،، بالتالي سرعة خروج العادم قلت !!


طيب علشان أحصل على اكبر قوة ممكن تطلعلي من تعديل نظام العادم أعمل ايه ؟؟


في عامل اساسي بنعلب عليه ،، و هو "تقليل ممانعة و مقاومة خروج العادم من الموتور !!!!!! "



*معلومة هامة !! الممانعة الي بتحصل دي ،، بتمنع كل الغاز المحروق أنه يطلع من السليندر ،، بالتالي لما يتحط خليط أحتراق جديد بيكون فيه نسبة عادم ،، فبيكون الخليط مش نقي ،، بالتالي الأحتراق مش بيكون ميا ميا و ده معناه فقدان في الطاقة ... "آدي أول فقدان طاقة حصل بسبب الموضوع"


طيب مع زيادة الممانعة دي بيتقل سرعة خروج العادم زي مقلنا !! بالتالي بيزيد الضغط العكسي على الموتور !!! بمعنى ان الموتور بيكون في زي حاجة كاتماه ،، مش مخلياه يكمل الدورات بتاعته بتتابع بحرية ،، في حاجة مقيداه كده ،، "باك بريشر" .. فبكدده الموتور بيحتاج يخصص جزء من الطاقة الي طالعه منه ،، في انه يبزل شغل يعرف يتغلب بيه على الباك بريشر الجامد ده !!! ... أآآآدي تاني فقدان للطاقة حصل في الموضوع !!!


============================


الباك بريشرر !!


كتير لنسمع المصطلح باك بريشر ،، من غير منعرف أثره !! و احياناً معناه


في الواقع الكلمة مفسرة نفسها هيا معناها الضغط العكسي ،، الناتج من العادم على الموتور ،،


طيب أثرها ... مرتبط بأيه ؟؟
ده الي حنعرفه المرة الجاية بقا علشان أنا بجد تعبان و عايز انام ،،


يا رب مكنش طولت عليكم ولا أزعجتكم ،، و اعرف بأذن الله ألخص الموضوع بطريقة جميلة و مفيدة و سليمة 100 %