الموضوع: تكييف الكرستالة حالف ما يبرد .. مش عارف لية!!

السلام عليكم..
من حوالى شهر ونص غيرت سربنتية التكييف بعد ما باظت فى حادتة وقولت للى هيشحن التكييف انى التكييف كان شغال مفهوش مشاكللكن غيرت السربنتية بس، فكبس دايرة التبريد مفيش تسريب وشحن وكلة تمام

بعد حوالى شهر ونص التكييف ما بيبردش خاااالص رجعتلة ومن غير ما يبص قالى دة ناقص فريون وهفضى واكبس واحدد التسريب , المهم قلتلة ماشى، فضى الفريون وكبس وكشف مالقاش تسريب زود الضغط لحد 350 (ياعنى كان فاضل 2 بار وينفجر) قال فعلا فية تسريب على350 يمكن من الكمبروسر بعد فترة بيسرب (طب مانت مزود الضغط يابويا) المهم ولانى مش مقتنع من الاساس ان العيب تسريب فريون قلتلة طب اشحن على كدة وانا هبقى ازود الفريون بعد فترة فشحن وقفل الكبوت ونادى على وقالى تعالى ياأستاذ حط ايدك على الهوا البارد من الطابلوة(وكان اخر النهار والجو اتحسن) فرحت على العربية ومن غير ما احط ايدى على الهوا فتحت الكبوت ومسكت بأيدى ماسورة راجع الثلاجة (واللى المفروض تكون متلجة حتى لو الدنيا نار) ولا الهوا وسخنة كمان قلتة فين دة قالى ماهى هتكون ضعيفة شوية وكانى ومانى قلتلة التكييف زى ما هو ومافيش اى تبريد خاااالص

المهم فضى تانى وفك الوصلات وكبس هوا فى كل وصلة وشحن ونفس المشكلة فاقالى انت محتاج تغير (فيرتر) الفريون قصدة الـ Drier والـ Expansion Valve اللى هو الجزء الداخل على التلاجة فاقالى هتهم وهغيرهم وهيشتغل التكييف ولو فية تسريب هنغير الكمبروسر .... (على رأى ابنى لما يتعمد يكسر اى حاجة فى البيت فيقولى بمنتهى البساطة هات غيرها من عند عمو يابابا)

انا اصلا بقى مش مقتنع بأى حاجة هو عاوز يغير كل حاجة لحد ما يوصل للعيب فقلت اسأل عليهم بتوع قطع الغيار ما حدش افدنى واللى يقولى توكيل او استيراد ...

حد يعرف العيب دة اية ولو انى اميل ان يكون فية انسداد فى الـExpansion Valve رغم انة ضغط الدايرة ومالقاش حاجة بس عاوز واحد بيفهم صح فى التكيف مش اخرة يكبس ويشحن ... بالمناسبة الراجل ماخدش منى فلوس على الشحنتين دول

المشاركة الأصلية كتبت بواسطة prisoner

المهم الاسعار ايه والف مبروك رجعوع التكييف ليك فى الحر ده

الله يبارك فيك...

قبل ما اقول الاسعار احب الاول احكى اللى حصل علشان الكل ياخد بالة، لما عملت الحادثة سربنتنية التكييف اتخرمت فاشتريت واحدة استيراد وادتها للسمكرى علشان يركبها ويقفل العربية ولما رحت اشحن عرفت بتاع التكييف ان التكييف كان شغال زى الفل وكل اللى حصل انى غيرت السربنتينة وقلتلة يفكها ويشيك على ربطها ويعمل اللازم وكدة.. طبعا هو كبس على طول واديها شحن وكلة تمام ...
بعد الكلام اللى قلتة فى الاول رحت للحرفيين لواحد بيفهم غير الحتتين اللى قلت عليهم وتمام الحمد لله.....
المهم .. لاقدر الله لو حصل اى حاجة للعربية واضطريت انك تفك دايرة التكييف فأول نصيحة لازم ولابد بنفسك تطبب اى ماسورة او مداخل مفكوكة باى حاجة وتقف على ايد اللى بيشحنلك التكييف وتقول بنضفلك جميع المسارات بهواء مضغوط وينضف كل وصلة قبل ما يركبها
لو ما عملتش كدة هيحصل انسداد فى ارفع مسار فى الدايرة وهو ال Expansion وفى الحالة دى ما بتسلكش وبيتغير وكمان لازم تغير فلتر الفريون معاة (Drier)
الاسعار
1- الـExpansion ب 175 جنية
2- الـ Drier ب 175 جنية
3- شحن فريون بالكامل(طبعا اى عربية فى الحالة العادية بيزود فريون بس) مع الزيت مع تغيير جميع موانع التسرب 180 جنية
5- المصنعية 100 جنية (استغرقت حوالى 4 ساعات شغل )
الاجمالى 630 جنية ، تم تخفيض 30 جنية يبقى الصافى المدفوع 600 جنية