الموضوع: لو انت اللى هتختار ... تزود سعر السجائر ولا البنزين ..؟؟؟

إحنا بنتكلم في ايه !!! السجاير غلوها ربع جنيه (المحليه) ..يعني مش حاجه جباره ..والي مش عجبه سعرها دلوقتي ممكن يبطلها .لاكن البنزين حيبطلوه إزاي ؟؟ فيه حاجه درستها من ايام الكلية (وتقريباً هي دي الحاجه الوحيده الي لسه فاكرها ) وهي مرونة الطلب
يعني فيه سلع مرونة الطلب عليها عاله ..لو غليت ممكن متشتريهاش (كافيار مثلاً :) )
وفيه سلع مرونة الطلب عليها قليلة لو غليت برضه حتشتريها زي العيش و الوقود

طبعا السجاير تزيد 5 أضعاف لانها بلا فائدة بالعكس ضااااااااارة جدا بالصحة

السجاير طبعا ..............
الحمد لله كنت بشرب خفيف وبطلتها خالص بقالي سنتين انا كنت بشربها بس كحب استطلاع فقط مش اكتر
انما البنزين حرام يعني انتا كده هتقطع عيش ناس كتير الي هما سواقين الميكروباصات وسواقين التاكسي والناس الي بتركب عربياتها هتقضيها مواصلات وازمه المواصلات هتزيد بالعكس اقتصاد البلد هيددمر اكتر علشان الناس مش هتستهلك بنزين كتير

انا مدخن ,, باختيارى ,, بكامل حريتى !!


انا مدخن ,, باختيارى


بكامل حريتى ,, مش هقولك بقا اصدقاء السوء والكلام الفاضى بتاع الناس اللى غيرها بيقررلها


انا صحيت الصبح فى يوم , وقررت انى ابقى مدخن


رحت كشك ساير واشتريت علبة سجاير ووولاعه , وشرب علبة السجاير دى كلها فى يوم واحد ,


ومن ساعتها وانا رسميا بقيت مدخن


اكتر عدو ليا هوا غير المدخن , مش كلهم الحقيقه , الجهله من غير المدخنين , الجهله اللى لسا ميعرفوش انى من حقى ادخن


انا لما ادخن بحرق فلوس , ( فلوسى ) وبحرق صحتى , وصحتى دى ثروت المجتمع اللى انا عايش فيها , مظبوط


فلوسى وانا اللى بكسبها بشغلى , ومن حقى احرق جزء منها فى متعه انا بحبها , حقى
ثروت المجتمع اللى هى صحتى بدفع فى مقابل حرقها , ده يعنى على اعتبار ان المجتمع صعبان عليه صحتى او فارقه معاه ,


بس المهم انى بدفع فى كل علبة سجاير بحرقها , 5 اضعاف ثمنها ضرائب .
يعنى انا بشرب ساير ميريت , ميريت اصفر , تمنها 7,50 جنيه لكل علبة سجاير .
تمن السجاير + 500 فى الميه ضرايب ,


اولا شركة الشرقيه للدخان اللى بتصنع سجاير ميريت بتاخد من فيليب موريست صاحب العلامه التجارية لميريت


41 جنيه فى الـ 1000 سيجارة , يعنى السيجارة بتتكلف كام ؟؟ متتعبش نفسك السيجارة بتتكلف 4 ساغ تقريبا


والعلبه بحالها تتكلف 80 قرش سجاير وقول بقيت الجنيه تغليف , تبقى العلبة بتتكلف على فيليب موريست 1 وبيكسب 150 فى الميه تبقى العلبه بــ 2 جنيه ونصف
والدوله بتحصل ال 5 جنيه الباقيه ضرايب !!


يبقى كدا المجتمع بيحصل من سيادتى 7جنيه ونصف ضرايب لانى بحرق علبه ونص فى اليوم !


اشطا كدا ؟ اشطا


يبقى فى الشهر المجتمع بحصل منى 225 جنيه , بيعمل ايه بقا المجتمع بالـ 225 جنيه ؟


اقولك .. بيدفعها لحضرتك عشان تتعلم ببلاش , وعشان تتعالج ببلاش , وعشان تركيب مواصلات مدعمه , وعشان تاكل عيش مدعم
وتركب عربيه وتحط فيها بنزين مدعم ,
وبتدفع منها مرتب للموظفين فى الدوله ,


جنيه 225 هى بالظبط مرتب طبيب معين فى الدوله اول تعيين بالحوافز والزيادات والبدلات ,



شوفت بقا ؟!! شوفت ؟!!


المجتمع واخد حقه منى تالت ومتلت


بس انا زعلان من المجتمع شوية , واخد على خاطرى منه ,


لان المجتمع بصيرف من الفلوس اللى انا بدفعها على علامات سخيفه مكتوب عليها ممنوع التدخين ,


وبيعلق العلامات دى فى الاماكن العامه , اللى انا برضه مساهم فيها بصدرى اللى بحرقه ,


المجتمع بيطردنى من الامكان العامه ومن المواصلات العامه , وبيجبرنى انى ادخن فى الشارع او اى مكان تانى بعيد عن الناس عشان ؟؟!!


اذا كان من حقك ان تدخن فا من حقى ان استنشق هواءا نقيا .



بجد عبارة تحرق الدم , تمام


مدمن المخدرات شخص صرف من فلوس المجتمع مبلغ محترم على متعه بيحبها ,
وحرق صحته اللى هى ثروة المجتمع برضه بنسبه محترمه ,


بس الفرق بينى وبينه حاجتين ,,,,


اولا : ان مدمن المخدرات مبيدفعش ضرايب لا هوا ولا تاجر المخدرات


ثانيا : ان المجتمع عمره ما بيعتبرنى مريض زى ما بيعتبر المدمن مريض ,


المجتمع بيعاملنى على ان انا كلب جربان , لازم ينعزل حفاظا على صحة الاخرين ,
الاخرين اللى انا وغيرى تقريبا من المدخنين بنصرف عليهم ,


انما المدمن المجتمع بيعامله على انه مريض


وبيدخله مستشفيات عامه , بيقولو يا حبيبى ياللى بقيت مدمن وخربتها , تعالى انتا مسكين ومريض ,


تعالى لما نعالجلك بالفلوس اللى دفعها المدخنين ,


لما بركب اى طريق سريع , بيدفعونى ضريبة مرور ( كارته )
والكارته دى فلوسها بتتصرف على اعادة اصلاحح وانشاء طرق ومواصلات ( فير ) عدل وتمام .


انما الضريبه اللى بيدفعها المدخن , مافيش فيها مليم بيتصرف على برامج علاج واعادة تاهيل وتوعية المدخن ,


يا جماعه المدخن ده مواطن مثالى , من حقه انه يدخن , فى مكان مخصص للمدخنين , فى كراسى نضيفه واماكن محترمه , ومزيكا شغاله


اه مزيكا شغاله , المدخن ده مبيشحتش من حد , المدخن ده قاعد بفلوسو


ولو بطل تدخين تادكو انه غير المدخنين هما اللى هيبقو خسرانين




المدخن شمعه تحترق من اجل المجتمع , بس خسارة


المجتمع مبيطمرش فيه ,

منقول

الســــــجــــائـــــــــ ـــــر