سعر هيونداي جيتز 2011

**MoMaDoW** · 01-08-2011 02:35 PM

السلام عليكم..
كل رمضان وانتم الى الله أقرب..
شباب أنا باشتري عربية في حدود من 70 لـ 90 ألف واستقريت كده من يومين على الجيتز.. شفتها عند أبو غالي داون تاون اسكندرية.. اداني سعر للاوتوماتيك من غير فتحة سقف 89000 وفتحة السقف تزيد 2000 والمانيوال قال تمنها 85000

المشكلة في حاجتين:

1) دي نفس أسعار مواقع الانترنت اللي هي طبيعي بتكون أغلى من السوق من 2000 لـ 4000 جنيه

2)الحاجة التانية انه خوفني من المعارض الصغيرة اللي اسمها مش معروف.. وفال انهمبيكونوا ارخص لانهم بيفكوا حاجات اوريجينال من العربية و بيركبوا حاجات تانية (مرايات مثلا - كاسيت - حاجات زي دي) و بالتالي هم بيكونوا كسبانين اكتر من الخصم اللي هم بيكونوا عاملينه والرخص بتاعهم عن المعارض الكبيرة (ابو غالي - الطارق - ...)

محتاج حد يقولي اعمل ايه؟ وايه سعر الجيتز المناسب.. اللي لما اشتريه بيه ما يكونش انضحك عليا.. يعني مثلا في على المنتدى بنت اشترت بيكانتو خليجي اوتوماتيك بـ 78000 وهي عندنا في المنصورة بـ 84000.. فاهمين قصدي ايه؟

رجاء المساعدة..

اخيرا لو حد عنده ملاحظة على العربية في حد ذاتها كاختيار يا ريت يفيدني (غير ان التوكيل سئ لان دي سمعتها كتيييييييير اوي.. وان كنت برده عايز اعرف سئ من اي نوع؟؟ مواعيد؟ اسعار؟ اهمال؟ عدم فهم؟ بيبوظوا العربية؟ ارجو الافادة)

شكراً مقدماً

**Screenplays** · 01-08-2011 03:25 PM

اشتريها من التوكيل مباشره او من موزع معتمد و بالنسبه للعربيه هي مفيهاش مشاكل بس هي مش منتشره اوي فمش هتعرف تبيعها بسهوله بعد كده و قطع غيارها مش هتبقي متوافره اوي بره التوكيل و بالنسبه للتوكيل في فروع زحمه زي ابو رواش مثلا بتبقي الخدمه فيها سيئه فممكن تشوف فرع رايق تعمل فيه الصيانات الدوريه

**MoMaDoW** · 01-08-2011 03:40 PM

شكراً يا ريس على المعلومة.. بس انت لو مكاني تجيبها هي ولا الكيا ريو؟ أسمع ان الكيا توكيلها ممتاز..

**Screenplays** · 01-08-2011 03:46 PM

الريو مشوفتهاش ماشيه في الشارع خالص و واضح ان مبيعاتها في الارض و فعلا توكيل كيا من افضل التوكيلات في مصر و لو معندكش مشكله مع العربيات الصغيره ممكن تشتري البيكانتو و بالمناسبه الجيتز اتوقف انتاجها خلاص

**MoMaDoW** · 01-08-2011 05:49 PM

شكراً يا ريس.. بالنسبة للريو.. بس انا محتاج اعرف ده هيأثر عليا في ايه بالضبط؟ يعني سعر قطع الغيار مرتفع و غير موجودة غير في التوكيل؟ لانها قليلة؟ هل مثلا هيأثر على سعر البيع لما اجي ابيع؟ ولا كل الكيا بيتباع بسعر كويس؟ الكيا البيكانتو الجديدة غالية اوي بالنسبة للريو.. ب حوالي 80000 الكاملة اوتوماتيك.. والريو ب حوالي 80000 كاملة مانيوال.. بس كاملة كاملة.. سي دي - ام بي 3 - مرايات كهربا - كل اوبشنز الاوتوماتيك موجودة في المانيوال مش سايبيبن ولا اوبشن.. والكلام على عهدة موقع كيا ايجيبت..

يعني برده لو قدامي الجيتز 1600 مانيوال - والبيكانتو 1250 اوتوماتيك خليجي - والريو 1400 مانيوال.. وكلهم ب 80000 جنيه.. اجيب مين فيهم؟ شكراً

**Screenplays** · 01-08-2011 06:06 PM

يعني سعر قطع الغيار مرتفع و غير موجودة غير في التوكيل؟ لانها قليلة؟ هل مثلا هيأثر على سعر البيع لما اجي ابيع؟

الاجابه نعم للاسئله دي

ولا كل الكيا بيتباع بسعر كويس؟

لا طبعا

اجيب مين فيهم؟

متدخلش في مقارنات عشان متتعبش نفسيا و حضرتك عارف الشعب المصري بيحب الفتي قد عينيه فطالما مستريح للجيتز و هي اصلا مفيهاش مشاكل معينه يبقي توكل علي الله بس انا وضحت لحضرتك ان انتاجها اتوقف عشان تعرف الموقف من اعاده البيع و قطع الغيار

**MoMaDoW** · 01-08-2011 07:15 PM

شكراً يا باشا.. حضرتك كنت خير عون.. انشاء الله لما اشتري هابقى زائر دائم.. بس اتقديم النصائح والاجابة عن الاسئلة.. :-) My user review

**Screenplays** · 02-08-2011 01:48 AM

1000 مبروك مقدما يا فندم

**engtmk** · 02-08-2011 11:14 PM

المشاركة الأصلية كتبت بواسطة screenplays

اشتريها من التوكيل مباشره او من موزع معتمد و بالنسبه للعربيه هي مفيهاش مشاكل بس هي مش منتشره اوي فمش هتعرف تبيعها بسهوله بعد كده و قطع غيارها مش هتبقي متوافره اوي بره التوكيل و بالنسبه للتوكيل في فروع زحمه زي ابو رواش مثلا بتبقي الخدمه فيها سيئه فممكن تشوف فرع رايق تعمل فيه الصيانات الدوريه

انا كنت عند غبور ولقيتهم بيقولو ا للناس مفيش جيتز عندهم ولا ماتريكس مش هيستوردوهم تاني

فالجيتز حاليا مش هتكون موجوده عند الوكيل