طب تصدق أن المرسيدس بقت تتقفل فى مصر ....
وبقى فيها مشاكل ....
بص يا معلم أنا هقولك على حاجة.
مبدئيًا كده أنا لو مكنتش جبت جين 2 كان هندم أشد الندم لأني مش عايز أقولك كنت راسمها لنفسي ليل نهار لحد ما الحمد لله جبتها.
العربية بقالها معايا سنة و شهر وماشية حوالي 27 ألف و الحمد لله حالتها زي ماهي ماعدا حاليا صوت تصفيرة كده طلعت بلية الشداد الانا لحد دلوقتي مستغرب باظت إزاي في الوقت القليل ده, يمكن حالة فردية. المهم إني بقالي شهر إلى الأن مستنيها مجتش التوكيل.
تعاملي مع التوكيل يضعه مابين سيء ل جيد , مش أكتر من كده.
بالنسبة للعربية طبعا بشهادة الناس كلها ممتعة جدا في سواقتها, سواء سحبها أو عزمها في المطالع أو ثباتها عالسرعات العالية أو أو أو...
يعيبها بعد الاصوات اللي ممكن تظهرلك كده وإنت سايق وقافل الكاسيت, يعني ريش التكييف تحس إنها بترعش, صوت من عند التابلوه, حاجات كده مش أي حد بيركز معاها.
بالنسبة لتيل الفرامل أنا مانيوال ولسة مغيرتوش.
بإختصار هي أحسن عربية في فئتها من وجهة نظري, بس توكيل يجيب اكتئاب.
عامةً إنت لو حابب العربية قوي مش هيفرق معاك أي حاجة من الانا قلتها ديه. :)
عن تجربه ال abs+ebd مش مجرد اهميته ف الدول الي فيها جليد وكده دي وجهه نظر غلط واقول ان الي بيقولك كده مجربش
اهم حاجه من وجهه نظري اني اقدر حتي لو واقف علي دواسه الفرامل اني اتحكم ف حركه العربيه وده موقف حصلي وخلاني اعرف قيمته كويس جدا جدا جدا وكان زماني متوفي حالا ومش برد عليك الرد ده
واهميته كمان ان ممكن زيت فعلا او مياه كمان ف الشتا قابل يعني ف كل حاجه
هو دة اللى مخوفنى ....
التوكيل وقطع الغيار ....
يعنى أية التوكيل معندوش قطع الغيار وأحنا نفضل مستنيين لحد ماتيجى ؟؟؟؟
دة قطع غيار الهيونداى مترمية فى كل حتة و عمرى مادورت ولا أستنيت حاجة ....
لية العربيات الكويسة توكيلاتها أى كلام ؟
نفسى فى عربية محترمة ....
وتوكيلها محترم ....
على أد فلوسى ....
ممكن اقول ل حضرتك نقطه مع اني مش عندي جين 2 ولا تمت لياه بصله
النقطه انا شايف انك بتفكر ف انك هتجيب عربيه استعمال وده طبيعي لانك اتعودت وشفت الويل زي ما كلنا شفناه ف العربيات الاستعمال ف بقت ثقافتنا ف خوفنا من بعد ما العربيه تبوظ وتبدا تحتاج قطع غيارها
انا من رايي متشغلش بالك بالنقطه دي
انا عن نفسي اشتريت كيا وتوكلت علي الله وربنا كرمني وعربيه تمام التمام وكماليات وراحه نفسيه واتقدمتلها ودخلت الباب من بيته وعاشت معايه عشرة سنتين وشويه اهوة علي ما فكرت انزل ادور علي تيل فرامل قداماني
بص لراحتك النفسيه للعربيه وكمالياتها ونوعها وكل حاجه ومتفكرش ف قطع الغيار انت مش بتشتري عربيه استعمال حد حاطط ايده ورجله وكل حاجه فيها
يعني ادي لنفسك سنه او سنه ونص علي الاقل علي ما تفكر ف قطع غيار من الي صعب تلاقيه او الي مش عليها طلب كبير يعني فاهمني انما الباقي هتلاقيه ف كل حته فاهمني ويارب مكونش بنحاز ل جانب ولا حاجه انا بتكلم من وجهه نظرك ف حاجه انا مجربها وربنا يكرمك وتركب عربيه ترتاحلها نفسيا وتحبها وتفضل معاك ياعم 200 الف كيلو متغيرش حاجه غير الصيانات الخفيفه
تعليق بس على فرامل الا بي اس ABS
معنى الكلمة اصلا ......... مانع الانغلاق
أنا سوقت على التلج قبل كدا ......... العربية بتتزحلق لوحدها من غير فرامل و القيادة على التلج لها كاوتش مخصوص
فرامل مانع الانغلاق علشان لما تكبس فرامل التيل ما يقفش على العجل و بالتالي العربية تغير مسارها لو العجل قفش .
اللي بيحصل مع مانع الانغلاق أن العجل مش بيقفش و بالتالي العربية بتقف من غير تغيير المسار أو حتى تسمحلك تتحكم في الدريسكيون من غير ما تغير مسارها
دي رسمة توضيحية لنظرية عمل مانع الانغلاق
http://i51.tinypic.com/vrvnko.jpg