الموضوع: سلسلة سلوكيات القيادة - الحلقة التاسعة (الأنتظار الخاطئ)

ثانيا السلام عليكم ورحمة الله وبركاته

كل عام وانتم بخير بمناسبة حلول شهر رمضان الكريم أعاده الله عليكم وعلي الأهل بالخير واليمن والبركات

اما بعد،

في موضوع كلنا كدة تقريبا اتأذينا منه جدا وانا لاحظت ان مش انا لوحدي الي أتأذيت منه

وهو موضوع الأنتظار صف تاني واحيانا تالت

مشكلتنا اننا بنكون واقفين صح وتلاقي واحد جه قفل عليك خلاك مش عارف تطلع، طب دة الحل أيه ؟؟؟

اجمل حاجة كمان في الموضوع بغض النظر عن الصف التاني

تلاقي يافطة جميلة جدا بتقولك ممنوع الوقوف قطعيا، تخيل ان في ناس فاكرة ان قطعيا بمعني عمودياً وتلاقيهم واقفين موازيين للرصيف ومنطقه انه كدة صح لأنه مش قطعيا علي الرصيف.

ويافطة تانية بردو جميلة اوي بتقولك ممنوع الوقوف نهائياً، "أهي دي بقي مفهومة" ومع ذلك ممكن تلاقي الواحد سايب الرصيف كله وبالعند واقف تحت اليافطة وكأنه بيطلع لسانه للداخلية وبيقولهم انا اهو انتوا مش عارفين انا مين؟؟؟

بغض النظر عني وعنك وعن مصالحنا الي بتتعطل بسبب ان في واحد قافل عليا

شارع وليكن زي شارع فيصل، ممكن يبقي في منه أمل لو اتنظم شوية والعربيات بطلت تقف فيه صف تاني

انا نادرا لو شوفت ونش ولا ظابط ولا حتي عسكري بياخد العربيات الصف تاني مخالفة

عملوها مرة يتيمة من حوالي اسبوعين علي المريوطية وكانوا شادين قوي ، انا طبعا فرحت وقولت يالا خلوا البلد تنظف
علي الجانب الأخر تلاقي شارع زي السد العالي في الدقي يوميا في ونش رايح جاي وبيعمل كمين حوالي 4 او 5 ساعات في اليوم ومش بيخلي ناموسة تقف صف تاني او مخالف

والونش دة اساسا انا ضده بكل المقاييس لأنه مش بيحل قد ما بيعطل الدنيا
يعني لو عربية واقفة صف تاني مش بيشدها ، لا دة بيكلبشها يعني بدل ما يحل لا بيعقد بدل ما يشيل العربية الي موقفة الشارع لا بيزود الطين بلة بدل ما كانت العربية هتقف نص ساعة لا هتقف اليوم كله

احنا يا جماعة لازم نلتزم من جوانا بعيد عن الداخلية والمرور لأن زي ما صعب يوقف في كل شارع عسكري مرور صعب يوقف علي كل واحد بيسوق عسكري مرور
صعب يعمل لجنة في كل شارع
صعب ييمشي ونش في كل شارع

اتمني يا جماعة نغير سلوكياتنا ونبطل ننتظر في الممنوع

Best Practice

- حاول قدر المستطاع تركن سيارتك صف اول حتي لو هتضطر تركن بعيد وتمشي شوية
- بغض النظر عن وجود لافتات تفيد بمنع الوقوف في مناطق معينة انت ماتوقفش لو حسيت انه هيبقي غلط وليكن زي الملفات
- لو لقيت حد واقف صف تاني او مخالف ماتقلدوش وتقف زيه وتقول ماهي الناس واقفة اهو (طب هو متخلف ومعندوش اخلاقيات, نقلده؟؟؟)
- ياريت يعملوا جراجات في كل حتة ويريحونا من موضوع الركن دة

كل سنة وانتم طيبين

والله المستعان
،
،

أقرأ أيضاً

http://www.nilemotors.net/Nile/23618...post3873695189
http://www.nilemotors.net/Nile/23553...post3873686975
http://www.nilemotors.net/Nile/23553...post3873686912
http://www.nilemotors.net/Nile/23494...post3873680644
http://www.nilemotors.net/Nile/23432...post3873673040