فعلا
الميزة الوحيدة اللى موجودة فى الصنى عن الكورولا هو الثبات
وفى فرق كبير فى النعومة
عمرى ماسمعت العفشة بتهبد فى المطبات
وغير اصلا الكراسى الناشفة بتاعتها كمان الواحد بينزل من العربية كان حد ضاربة
بشاكوش!
عرض للطباعة
لا شك ان الصنى عربيه ممتازه ولكن
انا احد ملاك نيسان صنى اليابانى مو 1999 وقعدت معايا 10 سنين وعملت بيها حوالى 290 الف كم وبعتها من سنه واشتريت نيسان صنى التقفيل المصرى موديل 2010 منيوال مزوده بالا abs
واليكم الاختلافات
1- التقفيل - من حيث جوده خامات الكراسى والفرش والكاوتش الابواب وحتى مفاتيح الابواب لصالح الصنى اليابانى تماما وبفرق ملحوظ
2- الموتور - لصالح الصنى المصرى لانها 1600 والقديمه كانت 1300
3- العفشه - لصالح الصنى اليابانى وبفرق ملحوظ فى النعومه
4- التكييف لصالح الصنى المصرى ( لما بيكون شغال ومش بيفصل بالعيب الشهير بتاع 2010 اللى لسه ما صلحتوش حتى الان )
5- المشاكل العجيبه اللى بيسميها البعض حالات فرديه
1-5 درج التابلوه كل شويه بيقع من مكانه
2-5 مشكله فى الضفيره وتم تغييرها عند 10 الاف كم بدون تكلفه
3-5 مشكله فى البطاريه وتم تغيييرها بعد سنه بواحده جافه مستورده ودفعت 300 جنيه فرق رغم انها المفروض فى الضمان
4-5 مشاكل فى الزجاج الامامى بيعمل صوت فى المطبات وكل ما يعملوه تظهر المشكله تانى بعد شويه ( بيحتاج تربيط زى العفشه )
5-5 مشكله فى تاخر الادراه صباحا ولم تحل حتى الان رغم تغيير الضفيره والبطاريه مش فاضل غير انى اغير العربيه نفسها
6-5 صوت تزييق فى الطنابير الخلفيه والعربيه واقفه وحد بيركب او ينزل منها وانا دايس فرامل وقلت لهم 3 مرات فى الصيانه ويعملوها ويرجع العيب تانى
7-5 صوت تزييق فى كرسى السائق وعملوه وبقى بيطق بدل ما بيزيق
الخلاصه :
الناس اللى بتشتغل فى التجميع فى المصنع ماعندهمش مراقبه جوده ولا ضمير
الناس اللى فى الصيانه مش عارفين يحلوا العيوب حل جذرى
النتيجه :
عربيه باساسيات يابانى جيده وتقفيل مصرى متواضع ان لم يكن ردىء وعيوب متعدده ولكن العربيه ككل احسن اللى موجود بالسعر ده اذا كنت مش حتدقق فى لاحاجات اللى انا كاتبها فوق ( مقبوله بالنسبه لسعرها - بتفكرنى ب 128 بتاعت زمان )
مع انهم كانو ممكن يطلعوا حاجه انضف من كده بكتير وبدون عيوب كتيره بالمنظر ده بس نقول ايه بقى استهتار بالناس اللى مايقدروش على تمن الكرولا واللنسر الجديده ومافيش فلوس يدفعوا اكتر من تمن الصنى
بصراحه بعد سنه استخدام و 30 الف كم انا غير راضى عن اداء العربيه بالمره واتمنى انى ابيعها واجيب عربيه محترمه عن كده
:120105~352: كلام زى الفل بس ايه هو عيب التكييف الشهير بتاع 2010 انا مرة واحدة بس فصل منى التكييف لأنى كنت واخد نفق الازهر عالاول كله عشان الزحمة واول ما طلعت فوق الارض اشتغل تانى الحمد لله ومع زميلى مرة فصل برضه وانا راكب معاه فى الزحمة
انا معايا 2010 مانيوال بدون abs ومشترك معاك فى عيب الضفيرة وغيرتها فى الضمان عند 40.000 كم وصوت تزييق الطنابير لما حد ينزل او يركب وقالولى انى مش بابقى شادد فرامل اليد ع الاخر عشان كده التيل بيحك فى الطنابير:E_braces[1]: وعندى بس تزييق فى الدركسيون عن الركن على خفيف كل فترة وفترة يعنى
اتفق معاك فى التجميع والجودة بس ما تنساش حضرتك ان خط الانتاج فى مصنع نيسان مصر مراقب من يابانيين يعنى احسن بكتير من مصانع تانية بتشتغل بمزاجها
ومش فكرة انها ارخص من منافسيها تبقى معيوبة ولا على قد تمنها
وانا لو مكانك هاغير لصنى برضه بس استنى الشكل الجديد كليا لما ينزل باذن الله انما عربية تانية ما اظنش الا اذا كانت متفوقة فى كل شىء عن الصنى وموضوع ال128 ده يمكن لأن حضرتك شايفها منتشرة وبقت شعبية فى الشوارع
:,:
بصراحة الصني من العربيات اللي اثبتت انها حمالة اسية والعيوب اللي طالعة دي متجيش حاجة جنب سيارات الجير بتاعها يفصل والدركسيون يفصل وعربيات ب 140 الف و عربية تانية ب 170 الف بدون ذكر اسماء يقولك الفتيس بتاعها فيه مشاكل ويقعد كل شوية يغير فيه
وكلو كووووووووووووم وعربية تانية سعرها ب 70 الف ومش حقول اسمها برضو كل شوية تطلع ببلوة جديدة مرة تخبيط في العفشة ومرة بتعوم يا جماعة ما دام المشكلة مشكلة نفسية يعني حاجة بتسمعها والكلام ده يبقى نقولو الحمد لله لان في ناس ماتت من عيوب مكانتش ظاهرة الا مع استخدام سنين
ولنا عبرة في دواسة الكورولا
تمام كلام حضرتك ..بس نصيحة عن تجربة ما تغسلش الموتور بماء أو صابون لأن ده خطر على المواتير الحديثة .. مش زي القديم .. وبعدين إيه موضوع ترشيح الزيت ده ؟؟؟
احب اوضح نقطه مهمه
على فكره انا لم اذكر اى مميزات للصنى تماما وده لاننا كلنا عارفين الميزات
انا لما اشتريت تخيلت انها مش حترفق كتير عن اليابانى - ممكن جوده الفرش او التابلوه مثلا لكن ده محصلش للاسف
الصنى بتفكرنى ب ال 128 فى عيوب تقفيل واضحه والعربيه لسه زيرو وليس الاداء او الامكانيات
لا شك ان اداء الصنى افضل 100 مره من ال 128 ولكن تشترك معها فى رداءة التقفيل اللى بيطلع العيوب اللى ذكرتها ( مش قصه فرش او زجاج او كاوتش ابواب )
الموضوع كان ممكن يبقى تحفه لو بعد عده سنوات من الانتاج ان المصنع يحل العيوب المتكرره ويهتم بسمتعهمش مجرد انتج عربيه اساسيتها يابانى ممتازه ولكن مليئه بالعيوب الغير اساسيه اللى بترفع الضغط
انا عاشق للعربيه الصنى لانها عشره عمر بس زعلان على اللى وصل ايه الحال فى مصانع نيسان فى مصر
وكنت اتمنى ان تكون عربيه تنتج فى مصر بجوده لاتقل عن التقفيل الكورى او الصينى
انا مش عايز الناس تفهم انى مش بحب الصنى انا متضايق من العيوب وعدم حلها وتكرارها بدون بذل محاولات حقيقيه تحل المشاكل جذريا وبلا رجعه
مين يقولى اى عربيه صينى او كورى كراسيها بتزيق ؟
او تكييفها بيفصل ؟
وربنا يهدينا الى ما فيه الخير لمصر