انا مش عارف ليه الناس معتبره ان التقفيل اللى فى مصر كخة و وحش .. ياااى
على فكرة مصر فى المركز السادس على العالم فى جودة التقفيل
يكفى ان مرسيدس بجلالة قدرها اول ما قررت تجمع ال s500 لأول مرة خارج المانيا اختارت المصنع بتاعها فى مصر
تفتكروا ليه يعنى .. بيحبوا الهرم ؟؟!!!
و كمان بى ام نفس الكلام لما قرروا يجمعوا الفئة السابعة خارج المانيا اختاروا مصر برضه .. دول بقى بيحبوا معبد ابو سمبل
يا ريت نبطل نردد كلام لمجرد اننا حفظناه و نعيش الواقع شوية
انا خضت تجربة مختلفة شوية
والدى كان عاوز يشترى عربية و كان محتار بين الصنى ( سوبر صالون ) و الكرولا و السيراتو و الأوبترا كلهم فول اوبشن اتوماتيك
فأول حاجة خليته يشيلها من تفكيره السيراتو
و هو من نفسه شال الأوبترا لأنك بجد لو قعدت فى الصنى او الكرولا و بعد كده قعدت فى اوبترا هتحس بفرق فى الفخامة و الراحة فى الصالون من جوة
و انحصر الخيار بين الصنى و الكرولا
الظريف بأه ان واحد من معارف والدى موزع معتمد لنيسان و تويوتا الأتنين مع بعض
فوالدى سأله .. الراجل كان صريح جدا و قاله انا لو هكلمك كتاجر هقولك اشترى الكورولا عشان الكورولا اغلى و هكسب منك اكتر
اما لو عاوز نصيحتى بحكم المعرفة اشترى صنى و انت مغمض
و التقفيل المصرى مفيش اى فرق بينه و بين اليابانى خالص .. غريبة مش كده ؟؟
لا مش غريبة و لا حاجة الراجل ده كان عنده فى المعرض صنى يابانى و صنى تقفيل مصرى .. افتح دى و شوفها و افتح دى و شوفها و اذا لقيت فرق واحد يبقى ليك الكلام
اولا كل المكونات جاية من اليابان يعنى كل اللى اتعمل فى مصر انهم ربطوا الحاجات فى بعض فقط
و التربيط ده بيتم عن طريق خط انتاج ( اكيد مش يدوى ) جاى من اليابان هو نفسه خط الأنتاج اللى موجود فى مصنع نيسان هناك
يعنى عمليا مفيش ايد دخلت فيه لا مصرية و لا يابانية .. كله بالمكن و الكمبيوتر
و كمان اللى بيشغلو المكن دى مهندسين من اليابان نفسهم .. روح مصنع نيسان و شوف بعينك
طب فى عيوب ؟؟
اكيد فى عيوب .. مفيش و عمر ما هيكون فى عربية فى الدنيا كاملة 100 %
فالراجل اللى بيقول ان ال air bag متفتحتش دى عيب فردى و التوكيل اعتذر و عرض عليه عربية على الزيرو و موديل السنة اللى بعدها كمان
يعنى قمة الأحترام .. المفروض يعملوا ايه تانى يبوسو رجله ؟؟
الأخ الى بيقول ان النيسان فاشلة فى مصر .. اكيد شركة زى نيسان لو لقت نفسها بتخسر فى مصر كانوا سابوها من 30 سنة فاتوا
كون انهم شغالين لحد دلوقتى و عربياتهم ماشية زى الفل فى البلد و بكميات كويسة اكيد ده معناه انهم مش شركة فاشلة
كل اللى اقدر اقوله روح اقعد فى صالون الصنى ( السوبر صالون ) و لو جالك نفس تنزل منها يبقى ليك الكلام
بجد عربية فخمة فخمة فخمة و سحبها خرافة و شكلها الخارجى جميل و صالونها واسع و صوت موتورها هادى جدا و سواقتها ناعمة جدا جدا و ثبات مش عاوز اقولك العربية ماشبة على 130 و لا هتحس انها ماشية اصلا و معاها طقم صوت كلاريون ب cd changer بيشيل لحد 6 cd
احد المواقف اللى بجد احترمت شركة نيسان فيها اننا بعد ما جبنا العربية و كانت لسه جاية عيل ابن حلال فى الشارع حدف طوبة كسر الزجاج الخلفى ( اصل بعيد عنك فى شارعنا مدرسة ابتدائى )
والدى راح التوكيل غيروا الزجاج ببلاش .. معرفش ليه !! هى كانت فى الضمان بس ده مش عيب صناعة و مع ذلك مخدوش فلوس
نصيحة منى .. نيسان صنى ( و يا سلام لو سوبر صالون ) و مش هتندم
منقول ......