الحقوني الاطارات الاماميه الفرامل بتقفش عليهاوتسخن جدا لما العربيه تسخن في الزحمه

السلام عليكم
المشكله دي جننتنى و بجد اتخنقت
العربيه 128 اول ما بطلع بيها بتبقا عادي جدا و زي الفل. ده و هي برده او في بدايه السخونه..
اول ما مؤشر الحراره يوصل للنص الاقي العجلتين الاماميتان تسخن جداااااااااااااااا و لو استمريت في السير و هي كده تسخن زياده و الفرامل تقفش علي العجلتين دول لدرجه انى لو زقيت العربيه متتحركش من مكانها غير لما تبرد لوحدها...
رحت للمكانيكي غير كاوتشات الماستر و قصر حاجه اسمها الصباع و ظبط كم حاجه كده بس بردو العيب زي ما هو......
اتخنقت بجد مش عارف اعمل ايه--- وشكرا....

نفس المشكلة عندى فى 305 غيرت ماستر العجل والخراطيم ولسه موجودة طول م العربية باردة مفيش مشكلة لما العربية تسخن الفرامل تتقل يعنى السخونة هى اللى بتاثر على الفرامل مش الفرامل هى اللى بتسخن العربية وده اللى بشك فيه ياريت اللى يعرف الحل يقولنا

تقريبا كده نوع التيل اللى راكب وحش ويفضل انك تغيره فى اقرب وقت

لانه معنى كلام حضرتك ان لما الحرارة بتزيد التيل بيتمدد ويقفش فى العجلة ومايخلهاش تتحرك

وده غلط جدا فى التيل لان التيل المفروض مش يتمدد بشكل كبير فى الحرارة لانه مصنوع علشان يتحمل الحرارة

نصيحة : روح للميكانيكى خليه يغير التيل علشان مايأثرش على باقى منظومة الفرامل

شكرا اخوانى علي الردود
بس مع العلم ان التيل ده لما جبتو كان اغلى تيل موجود و اكيد هو الانضف-- و نسيت اقول ان لما التيل بيقفش الفرامل بتحجر جدا
يا شبااااااااااااااااااب ال عندو الحل يقولنا........

اقتباس:

---

و نسيت اقول ان لما التيل بيقفش الفرامل بتحجر جدا

---

كده يبقى تخلى الميكانيكى يبص على السيرفو قبل لما تغير موضوع التيل

ممكن يكون السيرفو هو اللى بيخللى التيل يقفش

شوف يا بوبوس !!
قبل ما تدور العربية : دوس عالفرامل اربع خمس دوسات (مكاركة) وخلي رجلك دايسة على دواسة الفرامل وبعد كده دور العربية.
المفروض الدواسة هتنزل شوية معاك .. وده معناه ان السيرفو شغال تمام معاك - غير كده يبقى السيرفو بايظ أو خرطوم الفاكيوم بتاعه مقطوع.

بتقول غيرت كاوتشات الماستر العمومي .. انا لما بلاقيه مسرب زيت بغيره كله (ب 65 جنيه فمش مستاهلة تصليح فيه)
أنا برجح ان بستم الكاليبر(دشمة الفرامل) مبيرجعش - يعني لما تشيل رجلك من على دواسة الفرامل المفروض يرجع وبالتالي التيل ميفضلش قافش عالطنابير.
ايه اللي ممكن يخليه ميرجعش:
1- أولسي البستم (وده وظيفته يرجع البستم لما تشيل رجلك ويمنع هروب الزيت) .. ناشف أو مقطوع ولازم يتغير
2- أو كاوتشة التراب بتاعة البستم مقطوعة .. فبيدخل تراب بين البستم واسطوانته ويعوق حركة رجوعه .. وبالتالي يلزم تغييره.
3- أو المساميراللي بينزلق عليها الكاليبر عايزة تتنضف وتتشحم

وممكن العيب يكون من حاجة تانية خالص : بلي العجل ؟؟

اقتباس:

---

المشاركة الأصلية كتبت بواسطة ahmedhawas

وممكن العيب يكون من حاجة تانية خالص : بلي العجل ؟؟

---

تصدق ممكن صحيح لما البلى يسخن يتقل وبتقل العجل ويسخنه

شكرا يا شباب علي المشاركه و الردود ..
بس انا مش مقتنع ان ده ممكن يكون عيب بلي لان العيب ده اولا في العجلتين الاماميتين مش واحده - ثانيا الفرامل بتحجر لما العجل بيسخن و تقفش - ثالثا انا مش بسمع اي صوت من الاطارات الاماميه
هو تقريبا كده زي ماقال ا احمد حواس -- أنا برجح ان بستم الكاليبر(دشمة الفرامل) مبيرجعش - يعني لما تشيل رجلك من على دواسة الفرامل المفروض يرجع وبالتالي التيل ميفضلش قافش عالطنابير. تقريبا هو ده
عامتا بكره هروح لميكانيكي تانى و اشوف الحوار ده

متستبعدش بلى العجل نفس المشكلة كانت معايا فى 127 زمان وبردو لدرجة ان العربية حالفة ما تتحرك وطلعت بلى عجل والجنط كان سخن جامد لدرجة ان الكاوتش من كتر السخونية قلب لونة من اسود لاخضر من عند الشفة .... اى ان كان العيب متحاولش تحرك العربية كدة عشان انت هتأثر على الديسك والاسطوانة و الخ

منتظرين ضرورى الميكانيكى هيقولك ايه بس هو لو الكليبر هيبقى فى عجلة واحده مش فى الاثنين صح ولا ايه تفتكر مكن يكون الماستر العمومى لانه بياثر على العجلتين مع بعض

دوست علي الفرامل و هي مبطله بتكون محجره شويه صغيره و لما دورت البدال نزل شويه صغيرين
الجدييد بقااا
النهارده لما العجل سخن و الفرامل قفشت عليه فكيت الصامولتين بتوع العجلتين الاماميتين من الماستر جابو شويه زيت و بعدين قفلتهم تانى العربيه اتظبطت بس رجعت تانى و انا راجع متعرفوش ده ايه؟؟؟؟ عامتا انا بكره رايح للمكانيكى و هقولكم عملت ايه

أومال فين بوبوس !! هههه
شوف يا باشا في حاجة تانية برضو لازم نقولها في الموضوع ده.
وهي زيت الفرامل.
1- دايما اشتري نوعية نضيفة ومضمونة.
2- اتأكد من مستوى زيت الفرامل ميكونش أكتر من الماكسيمم.
3- شوف لون الزيت هل قلب على بني أو ان الزيت مليان شوائب عايمة في الإربة؟؟ يبقى تغيره أحسن.

- زيت الفرامل شديد الامتصاص لبخار المياه الموجود في الجو ، عشان كده متسيبش الغطا مكشوف لفترة كبيرة (بمجرد التزويد أو التشييك وتقفل فورا)

هههههه انا اهو بس كنت داخل من عند ابن خلتي
المهم رحت للميكانيكي قالي ده عيب ماستر عمومي قلتلو بس ده لسه جديد قالي انا هحلو و اشوفه و اعمل اللزم..
جاب طقم اصلاح و خراطيم و كوتشات كلهم ب 20 جنيه و مخدش مصناعيه... خت العربيه و روحت بيها نفس العيب طلع تانى كلمتو قالي كده يبقا عيب مواسير ال متوصله من الماستر العمومى و ال تحت..
ان شاء الله بكره هروحلو و اغيرهم و هقولكو عملت ايه و علي فكره انا غيرت الزيت الفرامل

انا متابع معاك لان نفس المشكلة دى عندى بالضبط انا كمان غيرت الماستر العمومى والمواسير والخراطيم وجبت كاوتشات للماستر اللى فى العجل ونفس المشكلة موجودة فى الشتاء كله تمام مفيش اى مشكلة وطول ما انا ماشى فى السريع مفيش مشكلة المشكلة لو وقفت فى اشارات تسخن العربية تظهر المشكلة مفيش قدامى الا تغيير التيل والكشف على بلى العجل ونشوف ان شاء الله خير

الميكانيكي اعد يفحص و يمحص في الفرامل لحد ما لقى وصلتين (خرطومين) مسدودين واحد بتاع العجله الشمال و التاني بتاع العجله اليمين الواحد طوله حوالي 20 سم و هو يربض بين الماستر ال تحت علي الطنبوره و الماسوره ال جايه من الماستر ال فوق جبت الوصلتين ب 50 جنيه و العربيه بقت تمام و العجل مبقاش يسخن.. و دي صوره الواصله بعد ما ركبت
ImageShack® - Online Photo and Video Hosting

تمام يا باشا .. الله ينور.
بس انت مكنتش بتحس ان العربية بتحدف (ولو قليلا ) لما تيجي تدوس فرامل ؟؟

اه كانت بتحدف شويه بس حاجه بسيطه اوى لا تزكر

مبروك التصليح