انى بدور على اسعار الكاوتش 13/175/70 ولقيت الاسعار فى المنتدى مختلفه
اما لاختلاف المقاس
او لاختلاف التاريخ
ممكن اعرف ايه المنتشر اليومين دول والاسعار ايه
والمفضل ايه
كمان انا بسال على نوع اسمه تايجر
عرض للطباعة
انى بدور على اسعار الكاوتش 13/175/70 ولقيت الاسعار فى المنتدى مختلفه
اما لاختلاف المقاس
او لاختلاف التاريخ
ممكن اعرف ايه المنتشر اليومين دول والاسعار ايه
والمفضل ايه
كمان انا بسال على نوع اسمه تايجر
ده جزأ من المواضيع اللى بادور فيها
http://www.nilemotors.net/Nile/213574-175-70-13-a.html
http://www.nilemotors.net/Nile/232400-a-2.html
http://www.nilemotors.net/Nile/23174-a-26.html
انا كنت جايب البريللى ال 3000 ب 265 الفردة من حوالي 4 شهور
كمان سؤال
لما بنغير البطاريه بياخد القديمه بسعر بيخصمه من الجديده
فى الكاوتشات بيتعمل حاجه زى كده
انا ركبت بريللى قعد حوالى 25 الف وباظ وغيرته وحطيت بريدجستون الاندونيسي
انصحك بيه لانه ممتاز ولو سعره اعلى شوية مفيش مشاكل
البريللى مينفعش في مصر عشان نسبة السلوك اللى فيه اعلى وكتر المطبات في مصر هيبوظه
لما كنت بركب بريللى سمعت كده وقلت طبعا ده فتي عشان بحب البريللى بس ندمت بعديها وركبت البريدجستون
البريللي ايطالي مش تركي خالص
النهردة سألت على كاوتش اسمه سوموتومو ودا ياباني
مش منتشر اوي بس اعرف ناس استعملته وشكرت فيه جدا
الفردة عاملة 340 جنيه
البريللي p3000 تركي ياباشا مش ايطالي
انا اعرف انه ايطالي
عموما لا مشكلة كويس انك صححتلي المعلومة يا ميدو
بريدجستون الاندونيسي اكثر من رائع
يكفي تعرف ان الفردة الياباني شيلتها على 87 الف وكانت تقعد شوية كمان :-)
good year انظف كاوتش فى المقاس ده وعن تجربة حتى فى عربيات الشغل جايبينه ومركبينه على لادا وماشاء الله حمال اسية ومفيهوش مشاكل وسعره فى حدود 270-290
البردجستون فى المقاس ده مفروض مش بينزل يابانى ولا اندوننيسي تقريبا تايوانى او تايلندى
وفى حدود 400 جنيه للفرده
الجود يير اعتقد انه تركى بس معرفشي حد ركبه
السوموتو اليابانى ممكن اسال عليه
احتمال يجيى لى شوية نشاط بالليل واطلع اديها لفه
عموما مفروض هشترى قبل العيد علشان مشوار السفر للبلد
ومنتظر من حضراتكم كل معلومه بالسعر والصناعه وطبعا النوع
البريدجستون ال 13/175/70
اندونيسي p250 أنا مركبوا عندي وماشاء الله زي الفل
من حوالي سنتين وحوالي 45 الف كم أنصحك بيه
وكنت شاريه ب 280 الفرده بالترصيص والنيتروجين
وأخويا لسه مركب بيرللي p3000 من اسبوعين الفرده ب 300 ج
والسوميتومو كان ب 325 ج وفعلا ياباني بس معرفش عنه حاجة
الميشلان ناشف .. هيحسسك بأي زلطة ف الارض
انا مركب تويو يابانى .. ما شاء الله علية الفردة طرية مريحة العفشة ومش بتحس بالطريق
انصحك بالتويو اليابانى علماَ انة الاعلى سعراَ .. يأما زى استاذ كريم ما قال :
البريدجستون جميل .. بس لة عيب واحد بس وهو انة ناشف فقط زى الميشلان .
اولا هو الكمبيوتر عندى الاولاد لعبوا فيه وغيروا الالوان ولا ده تجديد فى المنتدى
لو الاخيره يبقي جميل وكل عام وانتم بخير مع التحيه للاستاذ كريم
ثانيا غالبا هيكون الاتى
هسال على اليابانى سواء تويو او سوميتو
لو مكنشي هيبقي بردجستون او ميشلان مع العلم
توكيل ميشلان فى الغردقه تدخل المكان تحس بالنشاط والحركة
والاهم الوجوه المبتسمه
توكيل بردجستون ... بلاش اتكلم احسن احنا فى رمضان
بالنسبة للاختيارك فهو اختيار سليم ورائع ..
اما المنتدى .. فالمنتدي فعلا غير استايل حالاَ واللى يلاحظ التوقيت دة
اللى بيتصفح المنتدي ف نفس وقت تغيير الاستايل
غالبا وان لم اكسل سوف انزل بعد شويه واشترى فردتين كاوتش بردجستون
وهركبهم فى الامام وانقل الاماميين للخلف
سؤال
الفردتين اللى هستغنى عنهم هسيبهم عند اللى هشترى منه الكاوتش
وهو نفسه اللى هيركبهم
هل يتم خصم قيمه للكاوتش القديم
؟؟
ارجو الحصول على اجابة قبل ما انزل
انا لسه جايب اربع فرد نفس المقاس قبل رمضان بيوم
جبت بريدجستون اندونيسى من محل فى المعادي
جبت الفرده 325 بالتركيب + البلف + النتيروجين + الترصيص
لو هتسيب الكاوتش هيخده بسعر قليل جدا
انا خليت انظف فرده عندي استبن و واحد قريبى اخد فرده برضه استبن
وبعت فردتين بـ 50 جنيه وكانت حلتهم كويسه
وانت نازل تجيب كاوتش جديد خد بالك من تاريخ الانتاج بتاع الكاوتش
الحمد لله غيرت الفردتين
بردجستون bridgstone اندونيسي الاسبوع الاول من 2011
تركيب +ترصيص +نتروجين+بلف عادى اسود =325 جنيه للفرده
لكن
اولا بدون ضمان وده اكد عليه قبل التركيب لما سالته وقال لى
مش بدى ضمان ؟!
لكنى وافقت
ثانيا بدون فاتوره
مجرد بيان مختوم بخالص وزى قلته لانه بدون اسم المحل مجرد تاريخ وصنف وسعر
ومع ذلك ايضا وافقت للاسباب التاليه
اولا --هم الارخص - بعد لف وسؤال اكتر من واحد ومذكور فى المشاركات السابقه
ثانيا -- الضمان فى الكاوتشات هل تمت الاستفاده به من اى احد معرفه او احد فى المنتدى هنا
اعتقد فى مصر الضمان كلمة دون تنفيذ
الشيئ الاخر وفضلت ان اكتبه مسقل
احد الفردتيت الاماميتين اللى مفروض هرجعهم ورا
بمجرد ما فكهم تبين انها ضاربه سلك
يعنى ايه ؟؟؟
وايه السبب ؟؟
هى كان شكلها فيها ارتفاع منجهه ناحيه النقشه الملامسه للارض
ويمكن ده السبب اللى كان بيخلى العربيه تحدف يمين ورحت من قبل
عملت ضبط زوايا ويمكن برضه هوه ده السبب انى الدركسيون كان
بيرعش لما السرعه تعدى ال90
المهم
(الفرده السلك ضارب ))
ده عيب صناعه او تقادم
ولا عيب فى العفشه
لانى لو عيب فى العفشه يبقي لازم اعالجه
؟؟؟؟
[gdwl]
الأخ العزيز بعد التحية بالنسبة لقطع سلك الكاوتش فلا علاقة للعفشة من قريب أو بعيد بقطع سلك الكاوتش إنما ظبط الزوايا متعلق بالعفشة الزوايا مش حتتظبط لو العفشة فيها حاجة فالعفسة ممكن تخلي الكاوتش يتاكل من ناحية على حساب ناحية تانية أما قطع السلك في الكاوتش فهو للأسباب التالية ومفيش غيرهم أولا يكون الكاوتش متخزن أي منتج منذ فترة طويلة ثانيا مطب جامد بسرعة عالية أو مطب عادي بس الهواء في الإطارات أعلى من الحد الصحيح المقرر وهو 35 ومصر كلها بتوزن على 28 أو 30 ولكن الأصح من المصنع هو 35 بس بنحط 30 عشان نزود عمر الإطار بس ده بييجي على حساب الفرامل وصرف البنزين وسبب كمان لقطع السلك هو إنك تمشي على الكاوتش لو ظغطو نزل أوي وتقول أمشي عليه لحد بتاع الكاوتش وكنت حنسى أخطر سبب قطع السلك في الكاوتش إسمعني كويس تحت أي ظغط ولأي سبب كان متخليش بتاع الكاوتش يحطلك خابور أو تخليه يعمللك لحام بالمكوى لأن ده بيقطع السلك بسرعة أما بالنسبة للكاوتش في مصر اللي مبيحبش قطع سلك فمن خلال خبرتي بمئات ماركات الإطارات عشان كان عندي شركة تكسي تركب يا إما يوكوهاما الياباني وده أعلى كاوتش في العالم وفكك من الألماني والإيطالي والفرنسي وسيبك من الكومهو الكوري أو تركب أي نوع نظيف يكون ماليزي وإبعد عن الأندونيسي والتايلندي والصيني ولو عجزت ركب لاسسا التركي وربنا يوفقك ووصية إعمل ظبط زوايا مرة كل 10 آلاف كيلو حتكلفك 40 جنيه وإقلب الكاوتش الأمام للخلف وبالعكس بس مش بالطريقة العادية بطريقة x مرة كل 25 ألف كيلو والسلام ختام .[/gdwl]
جزاك الله خيرا
انا معملتش ضبط زوايا بعد ما ركبت الفردتين
وهصبر شويه لما اشوف الظروف الماديه وان كنت هغير الاتنين التانيين ولا بعدين
وعليه هبقي اضبط الزوايا
بس ال لادا
الزوايا بتضبط ل الامام والخلف ولا الامام فقط
ولانى سمعت البعض بيقولوا ال لادا بتضبط زوايا امام فقط ؟؟؟
كان عندي جود يير و كانوا كويسين جداً و أعدو 45000 كم و بادلتهم بهانكوك كوري كويسين برد بس صوتهم عالي مزعجين جداً بس شغالين و iلله أنا بفكر أجيب بعد كدة برد جود يير أو ميشلين أو بريدجستون ال كاوتش حاجة مهمة جداً للأمان و ربنا الستار
وسؤالى السابق عن الضمان والفاتورة
هل هم حاجه مهمه وانا اتضحك عليا
ولا عادى وبتحصل
ولا هو ده النظام المتبع
ارجو الرد للآتى ::--
الاماميين بردجستون اندونيسي
غدا صباحا سوف اغير الاماميين ب 2 كومهو فيتنامى
فى مشكلة انى يبقي الامامين والخلفيين نوعيين مختلفين
ثانيا ال كومهو فيتنامى --- تقييمكم له ايه كويس ولا بلأ --
البريدجستون اندونيسى 350 الفرد شاملة التركيب و الترصيص و النيتروجين
http://www.nilemotors.net/Nile/217690-a.htmlاقتباس:
ثانيا -- الضمان فى الكاوتشات هل تمت الاستفاده به من اى احد معرفه او احد فى المنتدى هنا
اعتقد فى مصر الضمان كلمة دون تنفيذ
الموضوع ده حصل معايا ... وانا قعدت 3 شهور محروق دمى .... ده عشان الضمان مش اكتر ..
انا قريت موضوع حضرتك
والف مبروك فعلا رجوع فلوسك
وعلى فكرة التوكيل ده كويس كمعامله لانه رجع الفلوس وكمان هيراجع الشحنه
ده بعيد عن كون ال جى تى كويس او وحش
بس انت كان معاك فاتوره وده كويس
لكن بالنسبه لى هو من البدايه وقبل التركيب اكد انه مش هيدينى فاتوره
وساب الاختيار لى
وتصدق لو هو ادانى فاتوره كان ممكن اركب عنده الاتنين التانيين كمان
للاسف لم التزم بكلامى
والسبب
روحت يومين ورا بعض اسال على الكومهو ولقيت الفرده لسه ما وصلتشيي
وكنت عندهم النهارده وظبطت الزوايا ووسط الكلام اكدوا لى حتى اللى جاى هيكون فيتنامى
فستعجلت ورحت للى اشتريت منه الربدجستون وقلت له انا عايز فردتين تانى لورا
بس عايز فاتوره -- قال لو هاخد فاتوره هيزود 10%
واكد لى الحكايخ سمعه ولو فى عيب فى الصناعه هو ملتزم باستبدال الفرده
-- بس خلال اسبوع ---
وكلام وانه عارفنى وشافنى فى .... وبكده احنا جيران وربنا شاهد علينا ووو
المهم اتكلت على الله وركبت الفردتين
جوايا سؤال من ناحيه الفضول
ليه الاصرار على عدم منح فاتوره
للافاده
لما كنت فى توكيل ميلان بسال على الاسعار وخلافه
كان فى عرض على الكاوتش 13/175/70
من 440
الى 400
ده للميشلان التايلندى