المشاركة الأصلية كتبت بواسطة yousef1978
ألف حمدا لله على سلامتك
ربنا يخلف عليك التعب ده كله والعربية تريحك وتطلع ممتازة وترتاحلها
حصل موقف مع أخي الأكبر مني إنه اشترى أغذية منتهية الصلاحية من سوبر ماركت
أخويا من غير ما يلاحظ فتح وأكل منها وحصله تسمم خفيف
بعد ما خف راح بحسن نية يعاتب صاحب السوبر ماركت راح الراجل بكل قلة أدب دفعة بإيده ووقعه في الشارع ومن غير أي مقدمات وزعق فيه وكأن أخي هو اللي غلطان
راح أخي بكل هدوء عمله محضر في قسم الشرطة بالتعدي وبأن عنده أغذية منتهية الصلاحية بيبيعها
الراجل مجرد ما دخل في القضية ولقي نفسه في النيابة بدأ يتصل بأخي ليل نهار ويترجاه إن بيته هيتخرب وإن عنده عيال ولو عاوز تعويض يديله ولو عاوز يبوس على راسه ييجي يبوس على راسه في بيته وقدام الناس كلها
وفضل على هذا الحال ويتصل بجميع أهلي وياخد تليفون ده من ده ويكلم كل واحد فيهم علشان يتوسط لأخويا
لغاية ما أخي قلبه حن وفي النهاية راح بنفسه واتنازل عن المحضر في النيابة وما رضيش ياخد حاجة منه طبعا
الكلام ده كان قبل الثورة
على فكرة للأسف فيه بعض الناس ما بينفعش معاها الكلام بالذوق والأدب والترجي لأنهم بيوصلوا لمرحلة يفتكروا فيها إنهم على حق وإن احنا ولا مؤاخذة بنشحت منهم مصالحنا
لكن لما يبقى الموضوع رسمي بيبان كل واحد حقه فين وبيتعلموا الأدب
وقديما قالوا إن الله يزع بالسلطان ما لا يزع بالقرآن
فإحنا لازم نعمل اللي علينا ونتعب شوية ونمشي قانوني وما نخافش لأن الشخص اللي غلطان هيخاف اكتر مننا ولو اشتكينا وبهدلناه شوية هنحفظ حق باقي الناس اللي ممكن تتعامل معاه في المستقبل
تحياتي للجميع