الموضوع: التقرير الخاص بمأساة شراء ميجان 2

السلام عليكم جميعاً
أنا حبيت أشرككم معايا فى تجربتى المريرة لشراء ميجان 2 لعل وعسى أنها تكون مفيدة لأى حد مقدم على شراء عربية مستعملة عشان مايتعرضش للعذاب اللى أنا شفته فى التجربة الغير سعيدة دى
المهم يا سادة يا كرام ان الموضوع بدأ بأنى بعد الصبر ما طال ومن خلال مشاركتى فى المنتدى عموماٌ وقسم رينو خصوصاٌ لقيت إن الميجان هى أنسب عربية بالنسبة ليا من حيث إمكانيات العربية وسعرها و بإختصار و عشان ماأطولش عليكم حبيت الميجان جداٌ وقررت أنى اجيبها وخصوصاٌ بعد ما حضرت مقابلة الرينو اللى كانت فى المقطم مع م/هشام مكى و العقيد خالد وهانى وتامر و م/فرحات و ركبت مع هانى عربيته واتفرجت على عربية العقيد خالد و عجبونى جداٌ
المهم أنى فضلت أدور على ميجان فترة من على كونتاكت كارز ورحت أتفرج فى الميكانيكيون العرب لقيت أن معظم العربيات هناك غالية وفيه منها عربيات متبهدلة المهم أنى وبعد استشارة الخبراء نصحونى أنى أبعد عن الميكانيكيون
المهم أنى شفت ميجان عجبتنى فى المهندسين لأو أيه إستعمال طبيب وشفتها 3 مرات وأخدت معايا المهندس فرحات كشف عليها فى يوم كان كله مغامرات لاقاها كويسة ومافيهاش حاجة بايظة غير سنسور الشكمان (الأكسجين)
رحت تانى يوم فعلاٌ وخلصت مع الدكتور اللى عرفت يومها أن المجال مش عاجبه وبيفكر يبقى بزنس مان (المفاجأة الأولى)
الرخصة بأسم التوكيل (اللى طلع شركة سيفتى بلس الشهيرة بالميكانيكيون العرب) وهو إشتراها منهم و ماغيرش الرخصة توفيراٌ لنفقات نقل الملكية (المفاجأة الثانية)
المهم قلت لنفسى مش مهم العربية كشفت عليها وطلعت كويسة وكمان هى عاملة 44000 كم الفئة اللى تحت البانوراما و ب 77000 غالية ب ألفين تقريباٌ عن سعر السوق وده كان يوم 5/5
أخدت أجازة من الشغل و رحت المرور يوم 9/5 بدرى عشان أرخص العربية و أنقل ملكيتها بأسمى عشان اطمئن ان العربية مافيهاش حاجة و اشتريت شنطة الإسعاف و الطفاية (لأن الدكتور كان منفض العربية على الأخر لدرجة أنه ادانى الكوريك و الكتالوجات بتاعة العربية بعد ما إشتريتها بيومين وكان حاططلى دوسات مقطعة وقديمة بتاعت جد جده تقريباٌ ) و جبت ورق الفحص و دخلت على ساحة الفحص و دخل على الميكانيكى عشان يرفع بصمة الموتور و هبببببببببببببببببببببببب بببببب لقيته جاب رقم موتور غير اللى فى الرخصة و أنا فتحت بقى مش مصدق اللى أنا شايفه و مابقتش عارف أكلم مين و أعمل ايه كلمت الدكتور و سألته بكل برأه هى العربية دى مغيرة موتور راح رادد بكل ثقة لأ طبعاٌ تلاقيهم فى المرور مش بيعرفوا يرفعوا بصمة الميجان قفلت معاه و رحت لمهندس الوحدة وطلبت منه يجى بنفسه يبص على الموتور المهم أنه أكدلى أن الموتور رقمه غير اللى فى الرخصة
كلمت المهندس هشام مكى (اللى كلمته وأزعجته معايا فى مناسبات عدة) و دورلى على نمرة الميكانيكيون و ادهالى و كلمتهم شرحتلهم الموضوع قالولى أقفل دلوقت و أحنا هنكلمك كمان 5 دقائق وفعلاٌ كلمونى وقالولى تعالى عندنا وأحنا هنحللك المشكلة وفعلاٌ خدت بعضى وطلعت على هناك
ملحوظة: المرور فى مايو و الميكانيكيون فى النزهة
وإلى الجزء التانى ....

شكراٌ يا جماعة لكل اللي رد و كمان اللى دخل على الموضوع و أتمنى أن الكل يستفيد من اللى حصل معايا
المهم يا جماعة خدت العربية ورحت على الميكانيكيون راحو واخدين العربية على الإنعاش عشان يكشفوا عليها و شوية راح طلعلى واحد أسمه أ/حمادة علام وقاللى العربية دى فعلا موتورها متغير (لأ فعلا أضاف) و السبب أنه كان حصل over heat للموتور واحنا هنجيبلك الورق الخاص بالموتور خلال 3 أيام و أنا هتابع معاك بالتليفون (كظمت غيظى) وعملت للخلف در و روحت على البيت محطم
عديت كام يوم و إتصلت بيه راح قاللى معلش الورق هيجى كمان 3 أيام (إستحملت) وعدوا ال 3 أيام و إتصلت تانى ورحتلهم بنفسى .. نفس الرد (خدوا بالكم انى أنا اللى كل شوية أتصل و أروحلهم وهو ما إتصلش ولا مرة يعنى صباح الطناش أو هو ده اللى أنا حاسيت بيه)
بعد إسبوعين كنت مع زميلى فى العربية وباحكيله على الموضوع قاللى لأ شكل التليفون مش نافع يلا بينا نروحلهم
وفعلا روحنالهم دخلت عليه وقولتله أنا بقى عايز أعرف موضوع العربية دى ايه و الورق بتاع الموتور فين راح رد تخيلوا يرد يقوللى إيه (وهو الرد الذى تسبب فى تحول مسار الموضوع 180 درجة لما كان له من أثر على أعصابى وتسبب فى فقدانى للسيطرة على صاحبى ) : أنا بعمل favor أنى بحاول أجيبلك ورق الموتور و أنا مش ملزم بأنى أعمل كدة
قولتله لو أنتوا عارفين أنها مغيرة موتور إزاى تطلعوا جواب نقل الملكية برقم الموتور القديم وهو ده الجواب اللى خلانى أسترى العربية و أدفع باقى فلوسها
صاحبى : يعنى أنتوا ب جوابكم ده خليتوا الراجل يدفع 77000 جنيه فى عربية مش عارف يرخصها ولا يركبها و انتوا اللى غيرتوا موتورها من غير إثبات على الرخصة و جاى تقوللى أنا بعمل فيكم معروف يعنى احنا كدة إتنصب علينا طبعاٌ الكلام كان من صاحبى بنرفزة
راح الأخ حمادة بدأ يزعق (وهو متعجب من الناس اللى لا ينفع معاها الإحترام ولا يقدروا المعروف) المهم الناس إتلموا وابتدوا يهدئوافينا رحت مكلم الدكتور على التليفون قاللى هات حمادة أكلمه رحت أديله التليفون رفض انه يكلمه
شوية و راح داخل واحد حلو مفلفل شعره(أسمه هانى) و قال مين اللى بيزعق هنا (اللهم طولك يا روح) المهم راح صاحبى قاله أيوة أى خدمة
هانى: ايه الموضوع... راح صاحبى شرحله الموضوع بسرعة راح رد الرد المعجز: هو أحنا اللى بعنالك العربية ولا أحنا اللى خدنا منك الفلوس
المهم بعد الشد والجذب إتفقنا مع كبير الفنيين (الحاج عبد الخالق و هو ده الوحيد اللى إحترمته لأنه إتكلم كويس) إنى أروح التوكيل لمدير قطع الغيار وهو هيعملى اللازم وراح هانى إدانى الكارت بتاعه و قاللى أنه هيتابع معايا
فعلا رحت التوكيل تانى يوم وقابلت المسؤل عن قطع الغيار ووعدنى أنه هيكلم مسؤل الجمارك و هيجبلى الورق خلال يومين.. وفعلا بعد زيارتين للتوكيل إتصل بى وقاللى الورق وصل (أخدت معايا الشنطة عشان أشيل الورق فيها..طبعاٌ مش هو ده الورق اللى هيخلينى أرخص) وصلتلهم و ها بقى الورق فين لقيتهم بيدونى ورقة مصورة بالإفراج الجمركى بتاع فارغة الموتور (طلع البلوك بس هو اللى متغير) سألتهم هى الورقة دى بس هتنفع قالولى طبعاٌ هتروح بيها بس وترخص فوراٌ صدقتهم و مشيت مبسوط على أمل أنى أروح أرخص خلال نفس الإسبوع وبعدها إكتشفت ما لم يكن فى حسبانى .
و إلى الجزء الثالث و الأخير ...
و أسف على الإطالة لأن الموضوع طويل فعلاٌ وفضلت فيه أكتر من شهرين من 5/5 إلى 6/7