الموضوع: سلسلة سلوكيات القيادة - الحلقة العاشرة (ثقافة استخدام الأنوار)

المشاركة الأصلية كتبت بواسطة ahmod

فعلا حاجة قمة في الاستفزاز لما تبقى ماشي في شارع منور وزي الفل وتلاقي واحد من ورا ضارب العالي ببقى نفسي افهم هو بيعمل كدة ليه ! !

لسه امبارح راجع من كوبري فيصل والاقي عربية من قوة نورها انا مش عارف نوعها ايه قلت اعديه واعمل فيه زي مابيعمل

عديته وطلع تاكسي اسبيرانزا ورحت مديله العالي ! !

اللى عايز اعرفه هو بيبقى مش واخد باله انه مشغل العالي؟ ولا واخد باله وعامل عبيط ولا ايه بالظبط ؟ لان الطريق منور ومش محتاج

ولا لما عربية تيجي تعديك مثلا تروح كاسر عليه او ماتخليهوش يعدي يقوم مشغلك العالي اكنه بيضايقك مثلا !

لسه حاصل موقف قدام عيني امبارح في شارع فيصل

اليو تيرن اللى عند المساحة بعد كلية التربية

واقف ومستني العربيات بتاخد الملف فجاءة العربيات تقف وعربية هوندا سيفك قديمة عمالة ترجع ومش فاهم هو بيعمل ايه يرجع ويطلع لقدام حبة ويرجع تاني وموقف في الشارع كله وكله مش فاهم هو بيعمل ايه

فجاءة الاقيه رجع جامد وهيخبط في جمب عربية فيرنا بتاخد الملف معاه بتاع الفيرنا راح فارك وفي ثانية فلت منه وطلع من وسط العربيات ماتسألنيش ازاي وبقى ماشي عكس اتجاه في وشي !

رحت معدي من جمبه بقوله هو اللى بيحصل ! قالي اصله عايز يخبطني عشان حكتله الاكصدام ! ! معقولة احنا وصلة للدرجة دي ! ! يوقف الشارع وعمال يعدل ضهر عربيته عشان يخبط للتاني جمب عربيته ! ! لا حول ولا قوة الا بالله

وبصراحة انا مش مع الناس اللى بتقول انها بتشمي على نور التبلوه بس لان كتير لما بتيجي تتجاوز عربية نورك بينبه العربية التانية ودي نقطة مهمة بالذات في الطرق اللى الاضاءة فيها مش كويسة

اما النقل والترلات فحسبي الله ونعم الوكيل فيهم كنت على الدايري مرة ومن غير قصد كسرت على ترلا

من قوة الاضاءة بتاعتة نوره والله العظيم ماكنت عارف هي موقعها فين بالظبط ولا كنت شايف قدامي اساسا

يعني خلاص رعش نور وانا عرفت انك جاي لكن بالطريقة دي ! خلاني رحت كاسر عكس وطلعت فوق الرصيف عشان اتفاداه مانا مش شايف حاجة

وفي النهاية طلع بعيد عني ببتاع حارتين !

الموضوع في النهاية كله زي عنوان موضوع حضرتك ! سلوكيات ! وهي دي سلوكيات الشعب المصري ! ربنا يهدينا ويسترها معانا

أزيك يا ابوحميد، عامل ايه دلوقتي ؟؟ انا مبسوط انك شاركت معايا في سلسلة السلوكيات ودة تاني موضوع تشارك فيه
عامل ايه دلوقتي ؟؟ وازاي دراعك ؟؟؟ اتمني تكون بخير
هما شالوا الموضوع بتاعك من علي العام ومن علي المنتدي كله ؟؟؟

فعلا النور بيضايق العين وبيخلي الواحد مش عارف يشوف ودة بدوره ممكن يسبب مشاكل اكبر بكتير من انك تكون مش مشغل النور

والمشكلة انك تلاقي بتوع الأجرة فاكرينها عند وحداقة فيقوم مركب لمبات اقوي واكبر وعدد اكبر من الفوانيس

ربنا يسترها علينا
انا سعيد اني شوفت مشاركتك معايا في سلسلة السلوكيات واتمني اشوفك علي خير

والله المستعان
،
،