الموضوع: عاجل 308 ولا كرولا 2011 و ألنترا الجديدة

المشاركة الأصلية كتبت بواسطة ahmedzag1

طبعا التويوتا كورولا2011 تكسب في التلاتة

خير الكلام ما قل و دل

الكورولا 2011 اصبحت بتيجي ياباني بالكامل مش جنوب افريقي زي زمان يعني
نقدر نقول انه بأذن الله المشاكل اتعدمت .
طبعا عربيه محترمه جدا و اعتماديه من الدرجه الأولي و تنساها خالص
و لاتفكر في توكيل و لا اي حاجه ممكن تضايقك منهم مع الوقت
و طبعا توكيل تويوتا من التوكيلات المحترمه في مصر وعربيه ماسكه نفسها في اعاده البيع بقوه .

الالنترا الجديدة تعالى شوف انتشارها فى السعوديه برغم انها لسه جديدة على فكرة الكرولا تحتضر فى مبيعاتها بسبب قوة منافسه هيونداى بتصاميم اكثر جذبآ للعملاء من الكرولا ليس بها اى لمسه جماليه وعاديه جدآ
سوناتا ضربت مبيعات كامرى والالنترا ضربت الكرولا والاكسنت ضربت اليارس . خلى بالك قوة هيونداى فى انتشارها فى العالم كله ودعم قوى لما بعد البيع من غزارة قطع غيار
البيجو ما انصح بيها قطع غيار مش متوفرة لكل حاجه وكل موديل وحاجتهم نار واصلاح لازم عندهم فانت امام خيار افضل الالنترا الجديدة اللون الابيض الكريمى او الاحمر مع تفييم الزجاج وانوار زنون حكايه عليها قوى

ميرسى يا رجالة على التجاوب الجميل و الفوق ممتاز فى الحيرة اللى أنا فيها ،،، و بعد مداولات لقيت ان الإلنترا طلعت من التصفيات ،،، بسبب عمنا غبور ،، حاجة غريبة سمعة التوكيل لووووز ،،

دلوقتى الكرولا ،،، 308 بيصفوا مع بعض ،،، اللى محببنى فى الكرولا سمعتها ،،، و الى مخلينى متردد شكلها شكل الفوانيس عاملة زى الناس القصيرين بتوع اسيا ،،، وكمان برده ممكن يغيروا الشكل قريب علشان السيكل بتاعت الموديل الحالى قربت تخلص من 2008

البيجو 308 بصراحة شكلها روعة و شياكة الأوروبى ،،، روحت المعرض بتاع بيجو ،، و ركبتها حاسس بفخامة حلوة قوى فى التابلوه ،، و العربية ماشاء الله شياكة الفرنساوى ،،، بس التوكيل سمعته مش حلو خالص ،،، و ده مش حلو فى بلدنا بلد المطبات و الجبال الصغيرة ،،

بص يا باشا 308 ثم الكورولا ثم خلاص

يا جماعه انتوا اكيد بجد بتهزروا
لو بتقارن شكل انا معاك ان الالنترا شكلها شبابى هى و 308 والتيوتا شكلها رائع جدا كمان وشبابيه
بس لو بتقارن انك عايز تركب عربيه وتحس انك راكب عربيه بجد وراقبها ومطمن انك لو بعد 10 سنين مش هتخسر فيها الا تمن الى مشيتوا بيها يبقى اكيد الكرولا واليابانى طبعا ماينفعش يتقارن بأى عربيبه تانيه فى السوق الا لو عايز تطلع للالمانى
انا عايزك كده توقف النترا جنب 308 جنب كرولا وشوف ساج كل واحده هتلاقى الكرولا بجد وحش زى الفيات انما الاتنين التانيين ورق زيهم زى الكيا سيراتو بالظبط

وفى النهايه الكرولا اداء وماتور عالى جدا وفى السفر قمه الراحه والمتعه والثبات

بص بداية ... عيب عيب كبير أوي أوي لما تقارن الـ 308 بالإلنترا ... أنا معاك إن قطع غيار الكوري أرخص بمراااااااحل و إن أي ميكانيكي بيشتغل فيها و التوكيل منتشر و سعر إعادة البيع و و و ... لكن كعربية ... جنط البيجو بالإلنترا كلها كده على بعضها .. و مش عيب إننا نعترف و نقول دي عربية أحسن من دي بس أنا هاخد الأقل لإنها مناسبه ظروفي أكتر ... أنا كنت بشتري بيجو 307 فل أوبشنز سواقتها وهم بمعنى الكلمة و أوبشنز و كل حاجة .. بس لما عرفت إن المراية بألف جنيه على طول رجعت في كلامي و اشتريت لانسر و مش عيب إني أقول إن الـ 307 كانت برقبة اللانسر لكن اللانسر هي اللي على مقاسي ...
من الآخر لو تقدر على قطع الغيار يبقى بيجو بدون تفكير .. و ممكن تفكر في الميجان برضه ، أو تبص على السيات و الفيات بيعملوا حاجات حلوه جداااا .... أي أوروبي برقبة أي كوري كركوبه ... لكن السوق بيحكم .
الكورولا كويسه جدا ... هو فعلا سعرها غالي على كمالياتها لكن اللي أقدر أقوله بكل ثقة إن فراملها و ثباتها أحسن من الإلنترا و بكتييييييييييييييير جدا كمان.
و في النهاية ربنا يوفقك في الاختيار.