الموضوع: معلومة لأى حد عايز يقسط عربيته .. لحبايبى اللوجانية

وانت رايح تقسط عربيتك قدامك طريقين :

1- تروح لمعرض شكله كويس .. وتقابل المندوب الشاطر .. ويقلك يا باشا ما تقلقش .. هاظبطك .. هاعملك كل حاجة

أ) هاجبلك أحسن فايدة فى البنوك
ب) هأمنلك فى أحسن شركة تأمين
ج) هظبطك فى المرور
د) هاعرفك بمهندس كويس فى التوكيل علشان تتابع معاه الصيانات

فقط احجز معايا بأى مبلغ وهاجيبلك العربية بكرة على طول .. وهاتلى مفردات مرتب ووصل نور وصورة بطاقة والمندوب بتاع البنك بيعدى عليا كل شوية .. فى ظرف 3 أيام هاتيجى الموافقة من البنك ونخلص على طول .. وأبعت معاك مندوب المرور يعملك كل حاجة.

2- تروح للبنك اللى انت شايف أحسن فايدة عنده بناءاً على المعلومات اللى انت لمتها من هنا وهناك .. ويبعتوك لمندوب قروض السيارات .. وتديله صورة البطاقة ووصل النور ومفردات المرتب .. ويبتدى يعمل استعلام وبعدين يرد عليك .. على حسب البنك .. فيه ناس بترد بعد 3 أيام .. وفيه ناس بعد شهر

ولما تاخد الموافقة ممكن تدور على العربية فى المعرض اللى تحبه وتقول لمندوب البنك عليه فا يروح يخلصلك العربية .. وممكن تقوله هاتلى معرض تعرفه وتثق فيه وتكون العربية جاهزة عنده ويكون محترم

وبعدين هاتروح عند شركة تأمين محترمة (زى شركة مصر للتأمين .. مثلاً) وتأمن لمدة سنة على العربية تأمين شامل بـ 3.5 % فى المية من ثمن العربية .. وتدى الورقة بتاعت التأمين لمندوب البنك

وبعد كده تشترى العربية من المعرض ويطلع معاك مندوب المرور علشان يساعدك فى عمل إجراءات الترخيص

ملحوظة :
المعرض اللى قالك هاظبطلك كل حاجة .. مظبط مع شركة التأمين وواخد منهم 1 % أو 1.5 % من تمن العربية عمولة علشان بيجيب زباين لشركة التأمين دى مش أى شركة تانية .. اللى هيا (1050 جنيه) .. يعنى بدل ما تدفع 3.5 % تأمين شامل .. تلاقيك دافع 4.5 % أو 5 % حسب الظروف .. علشان كده لما تقوله نزلى فى تمن العربية 500 أو 1000 جنيه بيوافق وتبقى بجميلة .. فا أحسنلك تعمل الحل التانى وتمشى الخطوات بنفسك


المعلومة المهمة بقى :-

لما بتقسط تبع بنك .. أياً كان البنك ده .. فيه فايدة ولتكن 7.9 % (بنك المشرق) يعنى لو هتاخد قرض 50.000 جنيه يبقى الفايدة فى السنة 3995 جنيه فى السنة .. ولو
هتاخد القسط على 5 سنين مثلاً يبقى تضرب الفايدة فى 5 .. يبقى 19.975 جنيه .. هاتجمع بقى الرقم ده على المبلغ اللى هاتقسطه اللى هو الـ 50.000 يبقى إجمالى المبلغ 69.975

تروح قاسم الرقم ده على 60 شهر (خمس سنين) يديك 1.166 جنيه فى الشهر

كل ده حلو قوى وكل الناس عرفاه

إيه الجديد بقى ؟

بدءأً من أول قسط بيتم تقسيم القسط الشهرى إلى :
75 % من القسط (874 جنيه) بيروح للفايدة اللى عليك .. اللى هيا 19.975
25 % من القسط (291 جنيه) بتروح لأصل المبلغ اللى انت سالفه من البنك .. اللى هو 50.000

يعنى بعد 22 شهر .. اللى هى سنتين إلا شهرين تكون سددت الفايدة اللى كسبها منك البنك بالكامل .. يعنى لو حبيت تسدد المبلغ اللى فاضلك سداد مبكر يبقى مش هاتلاقى حاجة تتشال من الفوايد .. لأنك دفعتهم بالفعل .. واللى فاضل هو أصل المبلغ .. اللى مش هاينفع ننزلك منه حاجة .. وكمان البنك هايضيف عليك حاجة اسمها غرامة سداد مبكر

ودى بتبقى 3 % من المبلغ اللى انت سالفه اللى هو 50.000 يعنى 1.500 جنيه يضاف إلى المبلغ بالفوايد .. وكمان نسيت أقولكم على 1.5 % من 50.000 البنك بياخدها منك فى مرحلة التعاقد .. مصاريف إدارية .... يعنى :

تمن العربية 70.000 جنيه

مقدمة 20.000
+ المتبقى 50.000
+ فايدة 19.975
+ مصاريف إدارية 750
+ غرامة سداد مبكر 1.500
+ تأمين على تمن العربية اللأصلى 2.450 فى السنة .. مع العلم إنه بيقل تمن العربية عند شركة التأمين كل سنة بمعدل 15 % من تمن العربية .. يعنى تانى سنة
هايبقى التأمين 2082 .. يبقى لو هنسدد بعد سنتين يبقى دفعنا تأمين 4.532 جنيه

يبقى المجموع كام بقى ؟

96.757 جنيه مصرى على سنتين .. يعنى تمن النيسان صنى الاوتوماتيك

لو هاتقسط ومافيش حل تانى غير كده .. مش عارف تتصرف وتجيبها كاش .. يبقى خليك عارف المعلومات دى كلها .. وماتزعلش من البنك

المعلومات دى انت مش بتتقالك لما تيجى تشترى العربية .. انت بيقولولك كل معلومة فى وقتها .. بعد ما تكون إدبست فى المرحلة اللى قبلها

كنت خلاص على وشك شراء العربية بنظام المرابحة مع بنك إسلامى, ولكن فى اللحظات الحاسمة حسمت أمرى وتقلت على واحد صاحبى استلفت منه باقى تمن العربية واشتريتها كاش, والحمد لله كده أحسن وأريح.

وبالمناسبة دى أحب أشكر صاحبى ده لأنه فعلاً صديق بيظهر وقت الشدة.