سيارة فى حدود 40 ل 45 الف

**minicooper20** · 20-08-2011 06:51 AM

المشاركة الأصلية كتبت بواسطة حماده المصري

هههههههههههه انا فتحت محل كار كير والحمد والشكر لله

متقلقش من الميجان الموديل ده مفيهوش حوارات كتير زي القديم وعربيه قويه ومفيش بقى الكلام المقرف بتاع الميجان الي بنشوفها

ادخل على contactcars.com ودور في المستعمل انا شايف في حاجات كويسه هي من 99 تقريبا او 98 لحد 2002 او 2003 ان شاء الله لو لقيت وحده كويسه هاتها وابقى ادلك على حد محترم شغال فيها

بالنسبه لليجانزا واقعه بقى في ايد واحد صعيدي صرف وتاجر انسى انه ينزل فيها جنيه لما كانت معايا الالنترا كنت هدخل الاتنين في بعض لقيته بيهرز عايز عربيته ب 60 الف لما خلصت في الالنترا كنت هيشيل الليجانزا ب 52 بس قولت بنزينها كتير ومش بياعه يوم ما هبقى بايعها هتبقى 45 الف ف كبرت دماغي منها بس بصراحه العربيه دي ممكن تبقى انسب اختيار ليك

الف مبروك على الكار كير
و الله انا مش عارف اقولك ايه على تعبك ده معيا
الكار كير بيتعك فين بقا

**mado208** · 20-08-2011 07:26 AM

دايو لانوس 99 اتوماتيك كورى افضل اتوماتيك فى الدايو

**minicooper20** · 20-08-2011 08:08 AM

المشاركة الأصلية كتبت بواسطة mado208

دايو لانوس 99 اتوماتيك كورى افضل اتوماتيك فى الدايو

القيها فين طيب

**minicooper20** · 21-08-2011 09:16 PM

الموضوع ده ادفن لما اتغير عنوانو و اتنقل فى قسم المقارنات

**benmatar** · 22-08-2011 02:44 PM

السلام عليكم
النصيحة والله عن تجربة للكوري والياباني والأوروبي، وبإذن الله ربنا ينفعك بنصيحتي عن أمانة اشتري بيجو 405 أواخر التسعينات، موتور 1600 صالون كويس جدا تكييف ممتاز ما شاء الله عالية على الأرض كانت معايا موديل 2001 وهي مع أخويا لغاية النهاردة وبنسافر بيها 170- 180 ثابتة وقوية حمالة أسية زي مابيقولو ومفيش قلق من قطع الغيار هتلاقي منها أوتوماتيك 2000سي سي واسمها بريستيج، والاتنين تمام بس هتستغرب لو قلت إن المانيوال فيها كانت مريحاني جدا.. والاختيار الثاني أوبل فيكترا ألماني الشكل القديم أوتوماتيك رائعة بس قطع غيار أغلى وثباتها عالي جدا وموتور قوي جدا لو سليم، وفي الحالتين يراعى الفحص المتأني والكشف الجيد وبالتوفيق وراجع نفسك قبل ماتفكر في صيني أو كوري.

**sha2e** · 25-08-2011 03:49 PM

ممكن كمان كيا اسبكترا اتوماتيك
تكيفها ممتاز وشكلها حلو وثباتها كويس جدا " اثبت من البومه "
وكمان هتكون موديل الفينات 2003 وانتا طالع
عيبها : انها مش منتشره زى النوبيرا والبومه وبالتالى بعض قطع غيارها بتكون غاليه

**damasry** · 25-08-2011 06:50 PM

معانا زميل هنا فى المنتدى والدته معاها دايو لانوس وهو ركب للعربية فتيس اوتوماتيك والموضوع كله كلفه غالبا ١٥٠٠ جنيه

والموضوع اهوه:
http://www.nilemotors.net/Nile/145435-a.html

فى اقتراح تانى
ما تاخد الليجانزا دى وتتفق مع صاحبها انك تقسط باقى المبلغ (مش ها يزيد عن ١٠ الاف جنيه) على سنة واحدة بس!!!

**samyyousef** · 01-09-2011 07:18 PM

السلام عليكم
أحد الأعضاء اقترح عربية أمريكاني كابرس كلاسيك
و انا اعتقد ان اقتراحة هذا له وجاهته فهي سيارة بها اكثر من المواصفات المطلوبة و قطع غيارها متوفرة و اسعارها معقولة
اما بالنسبة لمشكلة البنزين فيوجد منها معروض به غاز طبيعي

**zooma79** · 30-09-2011 12:19 AM

المشاركة الأصلية كتبت بواسطة حماده المصري

يارب يفك الكرب الي حضرتك فيه

بس مع احترامي الشديد ليك انت عايز كده 530 ب 45 الف جنيه دي عمرها ما هتحصل

سيفيك اوبل فورد ليجانزا مستحيل تلاقيهم مفيهومش مصاريف وكل الي فاتوا دول الغلطه فيهم بفوره وقطع غيارهم غاليه ومش اي حد يشتغل فيهم

انت عايز تلم الموضوع وتركب وتبقى قادر انك تصرف ضحي شويه بالثبات الخارق الي في الالماني واركب جوليت او لانوس او نوبيرا وحتى لو فيهم مصروف بتتلم بكلام فارغ

والي يقولك اركب امريكي قديم 8 سلندر ده انا طول حياتي مشوفتش 5 عربيات في شوارع المحروسه ويمكن ال 5 دول 3 منهم شوفتهم كزا مره حرام عليك تركب حاجه زي دي

معلش انت عشان يطلعلك مشكله في عفشه حاجه من الالماني مثلا هتكع فلوس كتير

انما لو الدايو عموما عفشتها تتلم بكلام فارغ وطقم سيورها كله اخره 200 جنيه انما اي حاجه من دول ممكن تلاقي السير الواحد ب 150

معلش انا اسف بس انت في موقف المفروض تفكر باسلوب تاني غير اللي بتفكر فيه تماما

انا في موقف مقارب للي حضرتك فيه وركبت لانوس طبعا انت كان معاك جيتا فرق السما والارض

بس معلش اللانوس هتجيب 180 بالتكييف وهتستحملك السنه دي مستريح عفشتها كلها بالف جنيه سيورها كلها 200 جنيه تقريبا اي حاجه بتبوز فيها بكلام فارغ فعلا طب ليه تجيب لنفسك وجع الدماغ

انا لفيت على فكره في السوق كزا مره ملقتش مونديو نضيفه تمامااااا ولا اوبل 95

السيفيك لقيت بس بصراحه انا مضمنش اي عربيه قديمه في اي حاجه خالص حتى لو ايه

على فكره لسه صديق ليا مخلص لانوس 2003 العربيه زيرو بمعنى الكلمه اقسم بالله كانها لسه طالعه من التوكيل مفيهاش جنيه صرف حتى ف كوتش ب 46 الف

يعني لو لقيت وحده رشه جنبين مثلا وحالتها كويس هتبقى ارخص من 45 الف وبالتوفيق

انما 45 الف تركب بيهم احسنها لانوس او جوليت او نوبيرا وحتى مستريح اي حاجه تحصل تعرف تلمها وتبيعها كمان وانت حاطط رجل على رجل ولا يهزك ريح

وفكك بقى من شغل دي بتجيب من 0 ل 200 فكام ثانيه هوه مش سباق

كلام موزون و عاقل و انا عن نفسي معايا نفس المبلغ ده و هجيب عربية لانوس 1 و أريح دماغي