الموضوع: سيارة فى حدود 40 ل 45 الف

المشاركة الأصلية كتبت بواسطة m.alaa92

ربنا يكون ف عونك
وربنا يفك كربكم يااا رب

بالنسبة للعربيات
عندك لانوس 1و 2 98-99
نوبيرا 1
ابيزا
البولو
دول اللى منتشرين ف السوق و ان شاء الله تلاقى حالة ممتازة و توفر عليك التعب

عن نفسى معايا النوبيرا 1 واقدر اقولك ان فيها كل المواصفات اللى حضرتك طالبها وسعرها مناسب جدااااااااا لانها من غير جمارك عكس النوبيرا 2 مثلا وهتبقى ارخص من 45 الف كمان بس ده فعلا فى حالة انك هتستخدمها للسفر بس لانها اساسا بتاعة سفر.اما لو هتستخدمها جوة البلد كتير او على طرق غير ممهدة فانصحك شيلها من حساباتك خالص لانها واطية وبتستهلك بنزين ضعف اللى بتستهلكه فى طرق السفر

المشاركة الأصلية كتبت بواسطة minicooper20

ربنا يخليك يا فندم انا عمرى مركبت العربيه دى و لا شوفتها فى الشارع حتى والله
لكن ناس كتير اجمعو على ان دى هى العربيه المناسبه
طيب ايه مشكلها فى الكهربه
هى حساسة لمكونات الكهرباء و مش موضوع مشاكل و لكن للاحتياط اكشف على الضفيرة و الحساسات عند كهربائى كويس و يا ريت لو تكشف عليها فى التوكيل
الماتور بيتعها انا سامع انو جنرال موتورز ياعنى المفروض انو high tec
مضبوط حضرتك و الموتور قوى و كويس و تقريبا هو نفس ماتور الاوبل
شوفت كذا عربيه على النت بيتكلمو فى 45
اهم حاجة حضرتك تكشف على العربية كويس و تطمن عليها و ربنا يوفقك فى واحدة كويسة
انا و الله لا اعرف مكانيكى و لا كهرابائى بس اصحابى اكيد يعرفو
طيب دلوقتى اخود بالى من ايه و انا بشتريها
زى ما قولت لحضرتك اكشف على الضفيرة و الحساسات و تأكد انهم سلام و خلى الميكانيكى يشوفلك الفتيس الاتوماتيك حالته عاملة ايه و اخبار النقل ايه و يبصلك على زيت الفتيس و حالته و رائحته ويشوفلك كبس الموتور و يجربلك العربية و يلفلك الدركسيون علشان يشوفلك الكبالن و شوف سمكرى كويس علشان يتأكد ان العربية مش عاملة اى حادثة قبل كده و ان الصاج تمام و بص فيها كويس فى كل مكان و شوف اذا كان فيها بارومة و لا لاء
و برده فى بعض المواضيع للاخوة فى المنتدى عن ما يجب ان تراعيه عند شراء عربية مستعملة اقرائها اكيد هتستفيد منها
كمان هى افضل و الهوندا si
صعب اجاوب فى ديه لانى ماركبتش الهوندا علشان اقيمها
معلش انا رخم شويه ابه اخبار الكيك دون و هل فيها over drive و لا لا و التسارع بيتعها ايه يخباره من 1 الى 100 و من 1 الى 200
يا باشا و لا يهمك
بص الكيك دون شغال و كويس و يخرج من مواقف صعبة بس على حسب ما بأسمع و الله اعلم ان المفروض متكترش اوى من الكيك داون لانه بيتعب الفتيس
الثبات ثم الثبات ثم الثبات ايه اخباره
من ناحية الثبات فهو عالى و مفيش قلق منه
صدقنى انا مبجريش بس انا بسافر كتير جدا بحكم الشغل و مفيش امكانيه اجيب سواق يشتغل معيا
فا لو مجرتش هنام و كمان بكون لوحدى طبغا هو غلط بس غصب عن الواحد و الله
يا باشا الله يكون فى عونك بس فيه مثل بيقول علشان توصل بسرعة امشى بالراحة و ربنا يحميك فى طريقك
مصريف تسجلها كام
بتختلف حسب سنة الصنع و على ما افتكر كان مصاريف تسجيل 1999 حوالى 550 جنيه و ممكن تأخر الخطوة ديه شوية بأنك تشترى بتوكيل و بالتالى تستفيد من مدة الرخصة لانك لو نقلت ملكية لازم تفحص و تغير نمر و ديه مصاريف تانية و ديه على حسب ما فهمت ان الظروف مش مساعدة دلوقتى
لو هاعمل صيانه دوريه تكلفنى كام ياعنى كام سير على كام فلتر على تيل فرامل على بوجيهات و كده ياعنى
بص حضرتك هى قطع غيار الكورى عامة و الدايو خاصة رخيصة مش غالية طبعا بالنسبة لليابانى و الاروبى و مثلا
سير الكاتينة الاصلى 180 جنيه
بليه الكاتينة 175 جنيه
البوجيهات 60 جنيه
تيل الفرامل الامامى او الخلفى فى حدود 75 جنيه
لو لقيت عربيه عمله الارقام ال هى 180 الف كيلو ولا 200 الف اجيبها ولا اجيب كيلو قليل
هو موضوع الكيلو ده فى اعتقادى مش مهم المهم حالة الموتور و الفتيس و العربية عامة وقت الكشف عليها
فممكن يكون الكيلو الكثير فى طرق سفر و بالتالى العربية بتكون مرتاحة عن ما يكون كيلو قليل داخل البلد و فى زحمتها و بالتالى العربية بتبقى مكتومة
هو ايه فرق بين اتو cdx و اتو عادى
لا هو حضرتك الـ cdx هى الاتوماتيك و ديه بيبقى فيها فرامل abs و كرسى السائق كهرباء و مقاعد جلد و cd changer اما النوعين الاخرين و هى se و نوع اخر فعلى ما اتذكر انهم مانيوال و مفيهمش نفس الاوبشنز اللى فى الـ cdx
هى دايو جى مش كورى طيب ايه جاب جينرال موتورز لكوريا
شركة دايو اشترتها شركة جينيرال موتورز من التسعينات بعد ما تعرضت شركة دايو لأزمة مالية و حتى من قبل ما تشتريها كانت جينيرال موتورز بتورد المواتير لشركة دايو
انا اسف جدااااااااااااااااااااا على ازعاجك

يا باشا و لا يهم حضرتك و ارجو انى اكون ساعدت حضرتك و جاوبت على اسئلتك على قد ما قدرت و انا تحت امر حضرتك لو فيه اى اسئلة او استفسارات اخرى

المشاركة الأصلية كتبت بواسطة minicooper20

8 سلندر وااااااااااااو
طيب اجيب ايه يا استاذ سمسم ماهو انا مش عارف

مع احترامى لكل الاراء المعروضة من يابانى و ااوروبى بس صاحب الموضوع كاتب انو ف ازمة و العربية المطلوبة تكون >45 و كمان بما انو ف ازمة ف بالتالى قطع الغيار لابد و ان تكون رخيصة و معمرة و بالتالى الكورى هنا يكسب مش عشان الكورى افضل لأ انما عشان هو مناسب للحالة ف الموضوع ده و كمان حيلاقى منها حالات نضيفة كتير و القطع الاصلية الكورى ( ال gm) معمرة و رخيصة نسبيا مقابل الاصلى من اليابانى زى الهوندا و الالمانى

ارجو ان محدش يزعل منى ده مجرد راى شخصى

المشاركة الأصلية كتبت بواسطة minicooper20

ربنا يخلى حضرتك يا فندم على اهتمامك
بس انا مش فاهم قصه قطع الغيار ياعنى هى نسبه و تناسب اكيد
ياعنى انا ممكن اعمل مثلا 200 كيلو فى اليوم فابالتالى هاستهلك قطع غيار اكتر من واحد بيمشى 50 كيلو فى اليوم مثلا
تانى حاجه الخامات ياعنى فى تيل فرامل ب مثلا 100 جنيه اكيد مش هيكون بكفائه ابو 250
انا بقا عايز اعرف انهى احسن اجيب تيل فرامل دى على سبيل المثال بيعود 100 الف كيلو و لا اجيب 3 من البيعدو الواحد 30 الف حد فاهم قصدى

م انا قولت لحضرتك قطع غيار الكورى الاصلى معمرة فية و هى ارخص من اليابانى الاصلى
هو الاحسن انك تجيب واحد ب 250 لان حتفرق معاك 50 جنية بالاضافة لمصنعية الميكانيكى كمان يعنى قول مثلا 150
يبقى ابو 250 افضل