من كام يوم عملت الموضوع ده....
http://www.nilemotors.net/Nile/238488-a.html
و ذكرت فيه اني هنقل تجربة تسقيط موتور ديزل في عربية جي ام سي بليزر.... و تجديدها بالكامل....

الموضوع بدأ بأن واحد من أصدقائي عنده عربية جي ام سي بليزر موديل 1981 .... طلب مني المساعدة في تغيير موتور عربيته و بعض الاعمال الميكانيكية....

الأول غيرنا المساعدين بنفسنا... أنا و صديقي ده.... فكينا القديم و ركبنا جديد

العربية كان عليها موتور ديزل برضو.... بس حالته كانت معدومة....
موتور ايسوزو جامبو 105

في الأول حاولت أصلحة... لحد ما فكيناه كله.... و اكتشفنا أنه مافيهوش حاجة سليمة....

وش السلندر تعبان جدا.... الفارغة (البلوك) متزود لحام نحاس و معدوم العافية.... الكرنك مخروك 5 مرات و على اخر خرطة بعد كدا يترمي.....

فالقرار كان بشراء موتور تاني..... و طبعا قلنا مش هنجيبه زي القديم.... قررنا نجيب حاجة أقوى....

و رسي القرار على موتور ايسوزو 102 تيربو (بييل طويل)

و دا قدرته الحصانية و عزمه أقوى من ال105.... و حمولته 5 طن و للعلم... هو الموتور اللي بيركب في (الهاشم باص)

تم تغيير الموتور.... و تقعيده عالشاسيه..... و اتعمل رادياتير جديد 4 ماسورة.... و شكمان جديد عمولة.... و بعد كدا تم عمل ضفيرة كهربا كاملة (القديمة اترمت كلها)

و طبعا تم تغيير زيوت الات الجر كلها.... الفتايس (عادة و غرز) و الكوارين (الامامية و الخلفية)

بعد كدا.... عملنا قفص للعربية.... أو كيدج بار.... اللي هو المواسير اللي بتحمي الركاب في حالة لا قدر الله انقلاب العربية.... زي اللي في الرانجلر بالظبط.... بس طبعا تم عمله بطريقة مختلفة....
بمعنى أدق.... اتفصل عالعربية.....

و بكدا انتهت مرحلة الميكانيكا و العفشة....

و دخلنا في مرحلة السمكرة و الدهان و السروجي.....

طبعا العربية موديل 1981.... يعني فيها شغل سمكرة كتير.... بارومة في الأرضية.... و في أجزاء كتير تانية.... و طبقات معجون كبيرة في أماكن كتير..... و غيرها من العك اللامتناهي....

قررنا تصفية المعجون كله.... و حرق صاج العربية بالكااااااامل من الداخل و الخارج..... و اصلاح كل البارومة و اعادة سمكرتها من الأول....

و بالفعل.... العربية اتصفت.... و كل الشغل اللي فيها اتعمل بنضافة جداااااا فوق ما توقعنا..... و اترشت من جوة و من تحت بالبوتامين.... و ال4 سوست اتفكوا و اترشوا بوتامين....
و من برا أخدت قشرة معجون و بطانة بسيييييييييطة جدا.... و تم الرش فوقها دوكو فرن.... (سيلفر ميتاليك)

بعد كدا السروجي... عمل كسوة للكيدج اسفنج و فوقه جلد.... و فرش جلد طبيعي للكراسي.... و فرش أرضية و سقف و جوانب.... و تم تنجيد الكراسي الأمامية.... و اضافة طبقة عزل بسمك 1 سم للحرارة و الصوت في الأرضية.... و في السقف كمان....

العربية باقت حكاية..... و خصوصا أنها بزجاج و مرايات كهرباء.... تعبنا فيها جدا و اخدت وقت طويل جدا... بس خرجت اكنها موديل 2011 في الاخر.....

و أي تفاصيل عن المراحل اللي فاتت تحت أمركو في الاجابة عنها.... :)