النترا 2012 ولا كروز ؟

**Dawns_Mist** · 28-07-2012 02:50 PM

إلنترا أفضل في الموتور
إلنترا أفضل في الكماليات
كروز أفضل في الراحة الداخلية
كروز أفضل في الأمان و الثبات

* دي تجربة شخصية مع العربيتين في سفر
و من الآخر لو أنا معايا ثمنهم كاش لا هشتري دي ولا هشتري دي ... الاتنين فلوسهم كتير عليهم

و بالنسبة للتقارير الأجنبية اللي نزلت في الموضوع هنا معمولة على موديلات مش هي اللي موجوده عندنا في مصر ... و لو عرفت تطلعلي عربية واحده إلنترا gdi في مصر يبقى ليك الحق يا سيدي ... مستحيل مستورد يجيب عريب gdi من هيونداي في مصر .... و حتى لو gdi ادخل على توب جير و شوف بيقول إيه على الهيونداي اللي بالـ gdi جنب العربيات التانية اللي في فئتها السعرية مش عارفه تكمل حتى 6 من 10 في ولا إصدار من إصداراتها اللي بالـ gdi كتقييم أداء !!!
أنا مش عايز الناس تنبهر بالأرقام اللي بيكتبوها الكوريين .. ماهم كانوا بيقولوا على السيراتو 124 حصان و لما سوقناها ماعرفتش تجيب ولا حتى 50 حمار يا جماعة .. لازم نكون واعيين شوية عن كده.

**coolbelo** · 02-08-2012 03:09 AM

أكيييييد كروز أنا ركبت و جربت بنفسى الألنترا عفشة ناشفة أوى و ثبات ضايع و خامات أى كلام و بالمناسبة كانت توب لاين أعلى فئة

**esam_ayad** · 13-08-2012 05:18 PM

المشاركة الأصلية كتبت بواسطة coolbelo

أكيييييد كروز أنا ركبت و جربت بنفسى الألنترا عفشة ناشفة أوى و ثبات ضايع و خامات أى كلام و بالمناسبة كانت توب لاين أعلى فئة

حضرتك متأكد من معلومة ان عفشتها ناشفه دي؟
لأني ركبت العربيه دي بتاعة واحد زميلي وسقتها مسافة ستين كيلو رايح جاي وكنت باخد بيها المطبات والحفر الصغيره وانا مستمتع.يبقي ازاي عفشتها ناشفه.أكيد حضرتك سوقتها لماسف بسيطه.
وعلي فكره انا معايا نيسان ماكسيما يعني مش متحيز لدي ولا لدي.

**esam_ayad** · 13-08-2012 05:22 PM

المشاركة الأصلية كتبت بواسطة titooooasg

عايز اوبشنز وشكل شبابي و acceleration حلو واستهلاك بنزين اقل وتوكيل افضل يبقي الانترا
عايز استايل ووسع و topspeed وثبات وامان يبقي كروز

علي فكره ياباشا انا ركبت ورا في الكنبه الخلفيه للعربيتين والكرسي الأمامي كان راجع لأخر حاجه وكنت مركز جدا لما ركبت ورا علشان اعرف النتيجه ايه :النترا تكسب بمراحل في الوسع
وكمان في العزم.الكروز تحسها تقيله أوي علي الأرض

**Dawns_Mist** · 14-08-2012 02:45 AM

المشاركة الأصلية كتبت بواسطة coolbelo

أكيييييد كروز أنا ركبت و جربت بنفسى الألنترا عفشة ناشفة أوى و ثبات ضايع و خامات أى كلام و بالمناسبة كانت توب لاين أعلى فئة

أنا موافقك جدا على كل الكلام ده .. وصفك كمان دقيق

المشاركة الأصلية كتبت بواسطة esam_ayad

حضرتك متأكد من معلومة ان عفشتها ناشفه دي؟
لأني ركبت العربيه دي بتاعة واحد زميلي وسقتها مسافة ستين كيلو رايح جاي وكنت باخد بيها المطبات والحفر الصغيره وانا مستمتع.يبقي ازاي عفشتها ناشفه.أكيد حضرتك سوقتها لماسف بسيطه.
وعلي فكره انا معايا نيسان ماكسيما يعني مش متحيز لدي ولا لدي.

هو أنا كمان جربتها على الطريق الزراعي .. و مع مقارنتها بالبوما ( اللي تعتبر عفشة رياضية و ناشفة ) إلنترا كانت متعبة أكتر معايا ...
بس عموما عايز أقولك لحضرتك حاجة .. طرق المحروسة غير طرق الكويت .. أكيد انت عارف حاجة زي كده كويس ... و ممكن تكون حضرتك اللي بتحب تكون حاسس بالأرض شوية في السواقه و دي طباع ... لكن الأكيد إن الكروز أنعم و أطرى بكتير فعلا من الإلنترا .. و حضرتك كلامك على عيني و راسي و عارف إن حضرتك مش متحير خالص بس برضه موضوع ناشف و طري ده محتاج أكتر من تجربة ..

المشاركة الأصلية كتبت بواسطة esam_ayad

علي فكره ياباشا انا ركبت ورا في الكنبه الخلفيه للعربيتين والكرسي الأمامي كان راجع لأخر حاجه وكنت مركز جدا لما ركبت ورا علشان اعرف النتيجه ايه :النترا تكسب بمراحل في الوسع
وكمان في العزم.الكروز تحسها تقيله أوي علي الأرض

كلام حضرتك صح يا أفندم ... صالون الكروز أضيق من صالون الإلنترا ... و أكيد في السحب و العزم في الطلعة الإلنترا برضه تكسب .. كروز فعلا ماسكه في الأرض .. بس ده بيديها على السرعات العالية توب سبيد أعلى و ثبات كويس ..

**Samir Elshahawy** · 14-08-2012 04:46 AM

المشاركة الأصلية كتبت بواسطة coolbelo

أكيييييد كروز أنا ركبت و جربت بنفسى الألنترا عفشة ناشفة أوى و ثبات ضايع و خامات أى كلام و بالمناسبة كانت توب لاين أعلى فئة

يارااااااااااجل .... حررام عليك

الألنترا حتي من الموديل السابق و معروفة أن عفشتها ناعمة جدا و الالنترا الجديدة تكاد تماثل تويوتا كرولا في نعومتها

أما الثبات مش عارف حضرتك حكمت عليه ازاي بس أنا باسافر بيها و باجيب ساعات سرعات لحد 180 كم/ساعة (لو حالة الطريق تسمح) و الحمد لله العربية ثباتها جيد جدا

ياريت اللي يقيم عربية من حيث الأمكانيات الفنية يكون من ملاكها أو عنده خبرة بقيادتها لفترة طويلة مش مجرد سمع أو ساقها لمدة 5 دقائق

**Samir Elshahawy** · 14-08-2012 04:50 AM

المشاركة الأصلية كتبت بواسطة midobond

الالنترا اجمل بس مبدأيا اكيد فيها عيب الالنترا منذ قديم الازل عيب بتتوارثه اجيال النترا بكفاءة انعدام الثبات :)

و ايه الدليل علي كده ؟
- شوفت عربيات ألنترا كتير مقلوبة علي الطرق مثلا ؟
- نسبة حوادث الالنترا كام بالنسبة لحوادث الطرق عندنا ؟
- و ياريت تقول لي نسبة حوادث العربيات الياباني كام بالمرة ؟

**Samir Elshahawy** · 14-08-2012 04:53 AM

المشاركة الأصلية كتبت بواسطة dawns_mist

و بالنسبة للتقارير الأجنبية اللي نزلت في الموضوع هنا معمولة على موديلات مش هي اللي موجوده عندنا في مصر ... و لو عرفت تطلعلي عربية واحده إلنترا gdi في مصر يبقى ليك الحق يا سيدي ... مستحيل مستورد يجيب عريب gdi من هيونداي في مصر .... و حتى لو gdi ادخل على توب جير و شوف بيقول إيه على الهيونداي اللي بالـ gdi جنب العربيات التانية اللي في فئتها السعرية مش عارفه تكمل حتى 6 من 10 في ولا إصدار من إصداراتها اللي بالـ gdi كتقييم أداء !!!
أنا مش عايز الناس تنبهر بالأرقام اللي بيكتبوها الكوريين .. ماهم كانوا بيقولوا على السيراتو 124 حصان و لما سوقناها ماعرفتش تجيب ولا حتى 50 حمار يا جماعة .. لازم نكون واعيين شوية عن كده.

علشان كده العربية محققة أعلي نسب مبيعات في الولايات المتحدة و بريطانيا (16%) و دول الخليج و أخيرا مصر

معني كده أن كل اللي اشتروا العربية مابيعرفوش يقرأوا و لا يحللوا التقارير دي ؟؟
و لو التقارير و الارقام غلط ليه مبيعات العربية مازالت في أرتفاع و عليها طلب ؟

**Dawns_Mist** · 14-08-2012 01:58 PM

المشاركة الأصلية كتبت بواسطة se_coralsea

علشان كده العربية محققة أعلي نسب مبيعات في الولايات المتحدة و بريطانيا (16%) و دول الخليج و أخيرا مصر

معني كده أن كل اللي اشتروا العربية مابيعرفوش يقرأوا و لا يحللوا التقارير دي ؟؟
و لو التقارير و الارقام غلط ليه مبيعات العربية مازالت في أرتفاع و عليها طلب ؟

أنا مش متحامل على إلنترا ولا كوريا .. و نيجي للحق .. إلنترا الشكل ده يعتبر من أفضل إصدارات الفئة دي من هيونداي ..

أرجع لكلامي بقى ... بتسألني حضرتك ليه انتشرت ؟؟
طيب انت إيه رأيك في الموبيلات الصيني ؟؟
مافيش 2 يختلفوا على إن الموبيلات الصيني مقارنة بالموبيلات الماركات ( زبالة ) و مع ذلك مستحيل أي ماركة في مصر تقدر تحقق مبيعات الموبيلات الصيني !!! مش صح كلامي برضه ؟؟
هل معنى كده إن الموبيلات الصيني علشان مبيعاتها عالية يبقى مالهاش حل ؟؟
طيب هل معنى كده إن كل اللي بيشتروا الموبيلات الصيني مابيفهموش ؟؟
لا خالص أبدا ... الموبيلات الصيني بالنسبة لغيرها أي كلام .. لكن بيعرفوا يعملوا شكل حلو و إمكانيات ( على الورق ) زي الماركات التانية .. و تسويق جامد .. و سعر رخيص .. و قطع غيار رخيصة .... و بيييييييييييع يا معلم
و فيه ناس كتير بيكونوا شارينها و فاهمين إنها حاجة أي كلام .. لكن عادي ماعندوش مشكلة ده مناسب لظروفه الحالية ...

موضوع إن المبيعات الكتير مالوش أي علاقة بتقييم كفائة المنتج ده ممكن أعملك بيه إسقاط على منتجات كتير جدا و في كل دول العالم لإن كده كده كل البشر بيفكروا زي بعض ، هنا أو في اوروبا ....

ماتجيش تكلمني عن المبيعات دي لعبة تسويق ...
أنا سألت .. هل فيه مواتير gdi في مصر ؟؟
طيب مش حضرتك معاك إلنترا المفروض إنها بتطلع أكتر من 130 حصان .... ممكن من فضلك تقيس الهورس باور بتاعها على الكاوتش عند أي حد و تقولنا جابت معاك فعلا 130 ولا لأ ؟

أنا لما اتكلمت ماكانش قصدي أشوه إلنترا .. والله أنا لو شايف حاجة حلوة أو وحشه هقولها و مش هكون متضرر لإن لا اللي عمل الياباني ابن عمي ولا اللي عمل الكوري قتل أبويا !!!

أنا قولت إن الأرقام المكتوبة في الكتالوج مش صح و الكلام ده شوفناه كتير في المنتدى هنا إننا لما بنيجي نقيس الهورس بنلاقي كلام تاني خالص .. مافيش مصداقية الأوروبيين أو اليابانيين ..
و حتى لو هو الموتور بشحمه و لحمه .. أوكاي .. شيء جميل جدا .. لكن مش طفرة ولا حاجة لإن بقى هو ده الجيل الجديد من المواتير في أغلب الشركات .. الفرق إن هيونداي بتحبنا أوي .. أقصد الناس الشعبيين اللي زي حالاتي اللي فلوسهم على قدهم .. فدي الشريحة اللي هي مركزة معاهم .. الشريحة المتوسطه الشعبية دي بيعحبها أوي الشكل و الكماليات .. و هي كمان بتحطلهم كل حاجة عندها .. و علشان كده لازم تبيع كتير ...

وبعدين أنا اتكلمت عن تقرير كان محطوط هنا في الموضوع و لما قريته لاقيت إنه بيتكلم عن فئات تانية من العربيات غير اللي عندنا في مصر .... حضرتك زعلان مني ليه بقى ؟

عموما .. برضه في الآخر هيكون لكل واحد رأيه اللي هو مقتنع بيه .. بس أنا ولا أقصد أهين هيونداي ولا أعلي غيرها.. كل عربية و ليها سوقها و كل واحد و ليه العربية اللي تناسبه و تعجبه .. فماتزعلش من كلامي لو كانت وجهة نظري بعيدة شوية عن وجهة نظرك ..

**Samir Elshahawy** · 14-08-2012 03:24 PM

أخي الكريم Dawns_Mist

حضرتك ذكرت الموبايلات الصيني للمقارنة بالسيارات الكوري في المبيعات و ده مش مظبوط
لأني لما ذكرت مبيعات الالنترا لم أقف عند مصر فقط و لكني ذكرت دول الخليج اللي هما بيعبدوا الياباني و ذكرت الولايات المتحدة بلد الفورد و جنرال موتورز و ذكرت أنجلترا اللي من الصعب أن أي عربية تتباع فيها الا بمواصفات معينة فهل معني كده أن المبايلات الصيني أنتشرت برضه في البلاد دي ؟

الألنترا فيها عيوب حتي في التصميم اللي الناس منبهرة به زيها زي أي عربية و لكنها تفوقت في نقاط علي السيارات المنافسة لها مما جعلها منافس قوي لدرجة ان يصرح رئيس شركة تويوتا أن هيونداي هي التحدي و الخطر الذي يواجه شركته كما صرح رئيس شركة فولكس فاجن أن هيونداي (أي 40) خطر علي سيارتهم الجولف هؤلاء هم رؤساء أكبر شركتين

نرجع بقي للكلام عن الموبايلات الصيني و المنتجات الصيني :
الكلام ده فيه تجني كبير جدا علي الصيني بكل منتجاته لأن المشكلة في مواصفات السوق المصري (اللي مالوش مواصفات أصلا) لكني بصراحة بأرفض التعليق علي منتج ما أنه (زبالة) علشان أحنا في مصر ماعرفناش نعمل حتي أبرة بابور الجاز و لا سجادة الصلاة

نيجي بقي لموضوع القدرة الحصانية :
- فيه في مصر عربيات ألنترا جي دي أي .... صحيح هما يتعدوا علي أصابع اليد الواحدة و أقدر أقولك أماكنهم فين و كان فيه موضوع بقسم هيونداي عن معرض بيستورد العربيات دي فعلا
الحاجة الثانية قدرة المحرك قد تكون 130 حصان علي البنش تست لكن نفس المحرك بيركب علي كذا عربية و بالتالي هايختلف أدائه حسب حجم ووزن العربية و نوع الفتيس اللي راكب عليه لكن مش معني كده أن الكوريين كذابين و بيضحكوا علينا علشان كده مش هتلاقي في كتالوج أي عربية رقم صريح للقدرة الحصانية للمحرك و لكن هتلاقي موديل المحرك فقط

سيدي الفاضل ..
شرق اسيا و كوريا و الصين اثبتوا أنهم عمالقة قادمين بقوة ليس فقط للمنافسة في صناعة معينة و لكن للتربع علي القمة في كل الصناعات و التكنولوجيا و الشركات الاوروبية صاحية الخبرة و التاريخ بتعمل لهم الف حساب يبقي ازاي أحنا نستهين بيهم ؟

صدقني المشكلة هنا في مصر أننا ماعندناش مواصفات لأي حاجة حتي الاكل و الشرب و وقت مانطبق مواصفات صحيحة هتلاقي المنتجات الصيني و الكوري أختلفت تماما

مشاهدة نتائج الإستطلاع: النترا 2012 ولا كرووووووز

الموضوع: النترا 2012 ولا كروز ؟

LinkBack

أدوات الموضوع

عرض

-

-

-

-

المواضيع المتشابهه

هيونداى النترا 2012 ولا شيفروليه كروز 2012

محتار النترا 2012 الجديدة ولا شيفروليه كروز 2012

النترا 2012 ولا كروز 2011

كروز 2012 ولا النترا 2012

ارجو الافاده شيفروليه كروز 2012 ولا هيونداى النترا 2012

الكلمات الدلالية لهذا الموضوع

المفضلات

المفضلات

ضوابط المشاركة