هو صحيح الكارينز الخليجى طلاؤها مش ضد الصدأ مفيش فية عازل صدأ

السلام عليكم ورحمة الله


فى رحلة بحثى التفصيلية لشراء الكارينز

وفى قمة حيرتى بين الخليجى السعودى هاى لاين و الوكيل هاى لاين

اتقالى الأتى عن الخليجى

الطلاء بتاعة تقيل عشان مش واخد برايمر Primer ودى المادة العازلة للصدأ عشان الدول الخليجية دول جافة مش ذى مصر

واتقالى ان التكييف بتاع الخليجى السعودى مختلف تماما عن المصرى وأكفا بمراحل

والأدهى اتقالى ان الازاز بتاع العربية معالج حراريا أفضل من المصرى عشان جو الخليج !!!

واتقالى ان الفرش ومستوى التقفيل الخليجى اعلى من الوكيل


وفى نفس الوقت من المعرض اللى بعدة على طوووووووووووول

اتقالى

الوكيل عفشة خدمة شاقة مناسبة للطرق المصرية غير الخليجى

واتقالى الوكيل اعلى عن الأرض عشان مطبات مصرنا العزيزة

وكمان اتقالى ان الوكيل معالجة ضد الصدأ وان مفيش فرق فى التكييف ...
واتقالى ان الخليجى حتى لو دفعت الفين ونص عشان تشترى ضمان لو حصل حاجة اساسية عيب يعنى جير بوكس او محرك مش حتطول حاجة ؟!!


طب انا اصدق مييييييين واعمل ايييييية


بالنسبة للكماليات

السعودى تزيد فقط تكييف تاتش ومرايات فى الاشارة وتقل عن الوكيل فى ابرباج الراكب الأمامى


اية رأيكم فى الكلام دة واعمل اية بجد محتار

مش عارف اقولك ايه بصراحة بس هو كلام الناس دى صح ماعدا موضوع البرايمير دة لان مستحيل الشركة مش هتنزل العربية من غير عازل للصدأ حتى لو فى جنوب افريقيا وبعدين الناس بتاعت الخليج ناس تنكة اووى فمستحيل يعدو عربية من غير برايمير وموضوع مفيش فرق فى التكييف دة اكيد فى فرق فى التكييف لان فى الخليخ جو حر فاكيد عاملين حاجة فى التكييف.

طب و العفشة و الباقى بجد التكييف مختلف؟

أعتقد كله كلام بياعين وفتاوى
الجو فى الخليج على حد علمى رطب زى مصر ويمكن أكثر

التكييف ممكن يكونوا شايلين الفلتر عشان يسبب تأثير أقوى

ارتفاع العربية هو هو فى الوكيل والخليجى

اهم حاجة فى الموضوع ده هو لو ظهر عيب صناعة فى الموتور لاقدر الله بعد سنتين أو 3 سنين .... ويمكن دى اللى ترجح كفة التوكيل بصرف النظر عن الكماليات

خالد بية تخيرا ظهرت .... طب انت قوللى انا أعمل اية ؟

الجو في الخليج في الصيف بتبقى ماشي في مية مش في هوا "الرطوبة بتبقى عالية جدا جدا جدا"

الشيء المتاكد منه
انه لايوجد مواصفات مصريه عند تصدير العربيات لنا من منشا ئها
والاكثر تاكيدا هو وجود المواصفات الخليجيه عن خروج العربيه من بلد المنشاء
حسب كلام البائع ان العفشه مناسبه للطرق المصريه علشان الطرق عندنا زفت
طب يقولك التعديل المعمول في العفشه علشان يكون مناسب للطرق المصريه
الغير معترف بيها اصلا كبلد له مواصفات عند دخول اي منتج الي مصر
ثم موضوع الدهان
جميع مصانع السيارت يتم طلاء السيارت بها ضد المياه عن طريق غمرها استاتيكا في حوض مليء بالفوسفات وليس البرايمر
لمنع الصداء
والطلاء التقيل ميزم اكثر من رائعه لتحمل درجه الحراره المرتفعه وشده سخونه الشمس

ولو لاحظت ان كل او معظم السيارات المجمعه محليا
الدهان بتاعها عامل زي ورقه السيجاره
بيتخدش من اقل حاجه
وده طبعا لتوفير ثمن البويه
علشان تتاكد من جوده الخليجي عن المصري
ملا حظه بسيطه انا لا حظتها
الشبكه الاماميه في الكارينز
في الخليجي نيكل
وفي الوكيل بلاستيك من ام 3 شلن
لو مكانك اجيب خليجي
وموضوع الضمان شيء بتاع ربنا
والوكيل اظن بياخد اكتر من حق قطع الغيا ر
في الصيانات الفرديه اللي ما فيهاش تغييير ولا زيت ولا قطع غيار
مجرد فحص السياره

يعنى اتكل على الله وأجيب السعودى ؟ أصل تقريبا مسمعتش عن كارينز فيها عيب تصنيع صح الكلام ؟ لو على كلامكم مفيش حاجة اسمها مواصفات مصرى اصلا! طب مواصفات اية كورى مثلا؟

اقتباس:

---

المشاركة الأصلية كتبت بواسطة ashouhdy

يعنى اتكل على الله وأجيب السعودى ؟ أصل تقريبا مسمعتش عن كارينز فيها عيب تصنيع صح الكلام ؟ لو على كلامكم مفيش حاجة اسمها مواصفات مصرى اصلا! طب مواصفات اية كورى مثلا؟

---

ياباشا اللي انا اعرفه من زمن
المواصفات الخليجيه من ايام العربيات اللي كانت بتيجي مع المصريين ا لعاملين في الخليج ايام السبعينات والثمانينات
وكانت بتكون مكتوبه علي القايم
مطابق للمواصفات الخليجيه
طبعا المواصفات الاوربيه والامريكيه
ودي مش علي العربيات بس انما علي كل حاجه لحد الحلبه اللي بنشربها مع اللبن
انما عمرك سمعت عن مواصفات مصريه
التجار بيروحو الصين ويجيبو زباله مصانع الصين ويبعوها لنا
ولا في حد قالهم عيب كده المصريين اجدع ناس ولازم يدخل لهم افضل منتج
قيس الكلام ده علي كل حاجه
عربيات
لحمه
فراخ
شاي
ملابس
انتظر يمكن ملاك الوكيل يفيدوك اكتر

عندك حق والله فى كل كلمة قلتها .... ياريت حد يفيدنا من ملاك الوكيل....

توكل على الله وهات الخليجى ومتفكرش ..

بتفكرنى بنفسى لما كنت عاوز اشترى السيراتو كنت فى نفس الحيرة كده

طبعا كل الكلام اللى اتقالك اسمه كلام مرسل بدون اى دليل واحد عليه الكل بيفتى
وكل واحد عاوز يبيع وخلاص
كل العربيات اللى بتحمل ماركة كيا واحدة تختلف فقط فى الكماليات من عربية للتانية سواء خليجى او وكيل ...اسمع بقى اللى جى
فى حاجه فى دول الخليجى اسمها مجلس التعاون الخليجى تقريبا الاعضاء هم :
السعودية - الكويت - عمان - قطر - الامارات

يعنى اللى بتروح السعودية هى اللى بتروح باقى الدول اللى معاها
طيب الكلام ده انا عرفته من السايت اللى من خلاله بنعرف العربية مصدرة الى انهى دولة
http://www.nilemotors.net/Nile/186717-vin.html (سايت الكشف على الvin و أكونت خاص لنايل موتورز - لمن يهمه الامر)

وخد بالك من النقطة دى اوى قبل ما تستلم ممكن يقلك العربية سعودى وتطلع عراقى
اردنى مع ان مكتوب على القايم طبقا للمواصفات السعودية بس المعارض بتضرب
الصفيحة دى وتقلك دى سعودى .....وحصلت معانا هنا فى السيراتو

راى الشخصى اشترى وكيل انا شايف الفروق مش كتير فى الكماليات اللى قصدها معاك ميزة مهمة جدا وهى الضمان فى السيراتو كانت الفروق كتير جدا فى صالح الخليجى
انما فى الكارينز شايف ان الفروق بقت اقل حتى فى السعر .

انوى وصلى صلاة استخارة واللى فيه الخير اكد ربنا هيكتبهولك .

خلاص يبقى توكلنا ع الله حصلى أستخارة وبأذن الله قريب اوى انضم لعيلة الكارينزاوية

اقتباس:

---

المشاركة الأصلية كتبت بواسطة hugan

الشيء المتاكد منه
انه لايوجد مواصفات مصريه عند تصدير العربيات لنا من منشا ئها
والاكثر تاكيدا هو وجود المواصفات الخليجيه عن خروج العربيه من بلد المنشاء
حسب كلام البائع ان العفشه مناسبه للطرق المصريه علشان الطرق عندنا زفت
طب يقولك التعديل المعمول في العفشه علشان يكون مناسب للطرق المصريه
الغير معترف بيها اصلا كبلد له مواصفات عند دخول اي منتج الي مصر
ثم موضوع الدهان
جميع مصانع السيارت يتم طلاء السيارت بها ضد المياه عن طريق غمرها استاتيكا في حوض مليء بالفوسفات وليس البرايمر
لمنع الصداء
والطلاء التقيل ميزم اكثر من رائعه لتحمل درجه الحراره المرتفعه وشده سخونه الشمس

ولو لاحظت ان كل او معظم السيارات المجمعه محليا
الدهان بتاعها عامل زي ورقه السيجاره
بيتخدش من اقل حاجه
وده طبعا لتوفير ثمن البويه
علشان تتاكد من جوده الخليجي عن المصري
ملا حظه بسيطه انا لا حظتها
الشبكه الاماميه في الكارينز
في الخليجي نيكل
وفي الوكيل بلاستيك من ام 3 شلن
لو مكانك اجيب خليجي
وموضوع الضمان شيء بتاع ربنا
والوكيل اظن بياخد اكتر من حق قطع الغيا ر
في الصيانات الفرديه اللي ما فيهاش تغييير ولا زيت ولا قطع غيار
مجرد فحص السياره

---

اكيد مركبلها عفشة كونى بجد كلام بائعين مستفز جدا

والله انا احترت أكتر .... وصليت استخارة ومش عارف .... مش مهم عندى فرق ال 4 الاف جنية ... المهم الجودة و التقفيل النضيف وطبعا لو التكييف اقوى يبقى خير و بركة

بعد تجربتي لعربيات كتير خليجي لانسر و المصري... مش ملاحظ اي فرق في موضوع الخليجي ده خالص لا في تكييف و لا سحب و لا دهان!!!

كل اللي ملاحظه ان الأوبشنز بتكون مختلفة شوية و منطقياً الأوبشنز و سعة المحرك بس هما اللي بيتعملهم customization على حسب السوق

لكن مفيش حاجة اسمها تكييف اكبر/اقوى و العربية هي هي بنفس الموتور... انا شايف ان ده كلام تجار بصراحة و بعدين موضوع الدهان ده بيستفزني

يقولك بتاع الخليجي احسن اصله معمول عشان يستحمل الحر... طب و مصر يعني مفيهاش حر في الصعيد ؟ ولا الصعيد بينزلوا مواصفات خليجي ؟؟

يافندم والله العظيم انا كنت زيك قبل مااشترى السول وعمرى ماجبت سيارة الا ووكيل مع العلم ان الوكيل بيضحك علينا بمبالغ الصيانات
فاستخرت ربنا وتوكلت وجبت خليجى مش عاوز اقولك اكن الخليج دول ناس واحنا ناس تانية فرق الامان والاوبشنز وحاجات كتير الوكيل هنا شيلها معرفش لية توكل على الله وتجيب من معرض معروف فى الخليجى ومحترم
غير كدة اول ماتجيب العربية مترخصهاش على طول على الاقل اقعد اسبوعين لية ؟
علشان لو ظهر اى عيب حتى لو صغير تقدر ترجعها للمعرض وتاخد واحدة مكنها
يارب اقدر اكون وضحت وجهت نظرى

بص ياباشا احنا عندنا كيا كارينز زى متقول كدة لعمى ولبابا مع بعض فى الشغل العربية قوية جدا واللة احنا هالكينا وعاملين بيها 90000كيلو وشغالة زى الفل مفيهاش مشاكل هى وكيل بص احنا حصل كما حاجة بسيطة فى العربية يعنى فلتر التكيف كان فية مشكلة اتظبط على حساب الوكيل والكمبوريسور اتغير برضة على حسابهم وعايز اقولك احسن حاجة فى الوكيل ان صيانتك عليهم ولو فى حاجة طلع عينهم دى ميزة الوكيل اما من ناحية الوكيل الدهان انا معاك جايز بس ماعتقدش التوكيل هيبقى عبيط وينسى النقطة دى وان الضما ن 5سنين او 100000كيلو ايهما اقرب وعلى فكرة كل بلد بتنزلها العربية بتبقى متكيفة معاها يعنى مصر اكد هتنزلها عربية ضد علو المطبات عالية ودة الى انا شايفة اما الخليجى كماليات اكتر وارخص من التوكيل بس من ناحية التكيف والله تلاجة انا عندى فى عز الحرارة تلاجة فى نقطة ان الخليج الطرق بتعتها تحفة جايز تكون مصممة ليهم بس فى الاخر الشركة هتنزل حاجة جودة محترمة مش هتضرب اسمها وعلى العموم ربنا يوفقك

فى نقطة لو انت من الناس الى هتدعكها شغل هات الوكيل ليك ضمان اما لوانت عايزكماليات هات خليجى وبالفرق الى حضرتك قولت علية اشترى ضمان للخليجى اقصد

متشكر ياجماعة بجد .... مشكلة الخليجى الوحبدة انك بتعمل صيانات لكن كضمان فى عيب تصنيع او حاجة تانية محدش حيعملى حاجة ..... ياريت لو انا غلطان تصححولى

اه عاوز اصححكلك حاجة لقدر اللله عندك عيب صناعة فى حاجة واثبت ذلك من المهندسين
الشركة كفيلة انها تغير الحاجة المعيبة حتى لو انت فى الهند مش جيبها مصرى ولا خليجى دية حاجة معروفة فى العالم

صديق معرفة معاه باسات خليجى غسل العربية جى يطلع العربية الفتيس مدى مرشدير هية اوتو بس متتحركش
كلم التوكيل هنا قلولوا البوق المعتداد خليجى ولا وكيل قال خليجى

قالة لا خليجى ملناش دعوة بية
فتح الاب ضرب رسالة صغيرة لفولكس المانيا وبعديها بنص ساعة اتصل التوكيل بية هنا وقالولوا ساعة زمن ونجبلك ونش يرفعها للتوكيل ونعملهالك فى الضمان
يعنى الفكرة بترجع للمستهلك المصرى فاهم هياخد حقة مش فاهم هيقولك اشترى وكيل احسن

متشكر لييك جدا يافندم :)))) وربنا يقدم اللى فية الخير

اقتباس:

---

المشاركة الأصلية كتبت بواسطة ashouhdy

خالد بية تخيرا ظهرت .... طب انت قوللى انا أعمل اية ؟

---

أنا تحت أمر حضرتك
عيب الصناعة مش قاعدة ... دى شركة كبيرة برضه وعندهم QC عالى

على حد علمى ان التوكيل يقبل يدخل الخليجى الضمان بس بعد ما تدفع كتير ... وتقريباً الشركة الآم فى كوريا تساند الوكيل فى امتناعه عن ضمان الخليجى

أنا شايف انك ميال للخليجى أكثر ... وبصراحة عندك حق ... الكماليات وال finish فى الخليجى يكسب بمراحل

من الآخر ... أنا لو مكانك هاحسبها على ال worst case ولو معايا ميزانية تغطى تكاليف الاصلاح ها شترى الخليجى
غير كده يبقى توكيل وهو مازال من التوكيلات المحترمة بالمقارنة بتوكيلات أخرى

وحضرت تنوى على واحدة وتصلى صلاة الاستخارة وتروح على طول تنقذ
لو مالكش خير فيها ربنا مش ها يتممها أبداَ
وتوكل على الله

لا انا معيش ميزانية هو يدوبك المقدم و الاقساط ومش عايز اى مصاريف اضافية غير التأمين غير كدة 90% من الناس هنا بتؤيد الخليجى ... لو الخليجى لية ضمان ضد عيوب الصناعة انا حنفذ على طول .... غير كدة كتر لفى على المعارض ابتدا بأمانة يقفلنى من الكارينز

الوكيل حتى لو كمالياته اقل فهو احسن لاقدر الله و حصل اى مشكلة هتلاقى حد
و بعدين ضمان ال كيا 100.000 او خمس سنوات وده اكبر ضمان فى مصر لسياره
وفى حاجة تانية انا مشترى وكيل و مشفتش و عامل 12000 ك وعملت الصيانه 10000 و زى الفل الحمد لله
كمان علشان تعمل الصيانه عند الوكيل للخليجى لازم تدفع 4000 او 5000 مش متاكد من الرقم بالظبط
والكماليات ممكن تستغنى عنها
والفرق بين العربية الخليجى و الوكيل كمليات فقط و سعر
لو العربية تجميع مصرى لازم تفكر
الكارينز لا تجمع فى مصر

اقتباس:

---

المشاركة الأصلية كتبت بواسطة gamalm10

كمان علشان تعمل الصيانه عند الوكيل للخليجى لازم تدفع 4000 او 5000 مش متاكد من الرقم بالظبط

---

على فكرة الموضوع ده انتهى خلاص اى حد دلوقتى معاه خليجى بيروح يعمل صيانته فى التوكيل عادى

د / شهدى خلاص اشترى وكيل ربنا يباركله فيها .

كل سنة وانتم طيبيييييييييييين ياجماعة :)))

قصة المواصفات الخليجى او الاوروبى او الامريكى
لان كل مكان من دول لية طبيعة جغرافية يعنى فى الخليج درجة حرارة عالية جدا ودة بياثر على حاجات ككتير فى العربية من اول الكاوتش و عازل الاسلاك الكهربية و خامة الزجاج و خامة بلاستيك الفوانيس ونظام تبريد الماتور ونوعية الزيوت وخامات الصالون الجلد والبلاستيك وكدة

الاوروبى هتلاقى الكاوتش معمول عشان يتحمل شوية المياة وكدة البلاستيك ميتحملش درجات حرارة عالية
نظام تبريد الموتور اقل او اصغر ومختلف عن اللى فى الخليج

ودة اللى يقصدوة بالمواصفات الفلانية


لكن عندنا فى مصر الجو معتدل يعنى اقصى درجة حراة انا عاصرتها السنين اللى فاتت كانت كام 47 او 48 من سنتين
وكنت مش قادر اخد نفسى

لكن فى الخليج لو بقت درجة الحرارة 39 او 40 يبقى الجو كويس

عشان كدة مش بيقولوا مطابق للمواصفات المصرية او كدة لان مصر فى جوها معتدل غالبا مش قاسى فى الحرارة او البرودة يعنى ال default مش ظروف خاصة