الموضوع: الي سيداتنا وانساتنا الحلوين ..عدم المعرفه يكلف فلوس

المشاركة الأصلية كتبت بواسطة SaLM!Na

الميكانيكا دي اهم حاجة

دي حتى اهم من السواقة نفسها ف بعض الاحيان
يعني ساعات الواحد بيتحط ف مواقف صعب انه يلاقي فيها حد يساعده بسرعة و حصلت معايا كتييييير
انا من رأيي ان كل واحد سواء ولد او بنت ياخد كورس ميكانيكا هي تعتبر منفعة شخصية و ممكن تتحول لعامة لو حد اتحط ف موقف صعب و انت طلعتوا منه
انا بإذن الله ناوية اخد كورس ميكانيكا اول ما ابتدي الاجازة

و طبعا مش هلاقي اغلى منكوا عشان انقلوا المعلومة اللي اخدتها

انا مستعد افرتك عربيه و اجمعها من جديد بس بجد ... الميكانيكا مش علي طول بتنفع ... و الواحد بيضطر ساعات يتبع الاولد سكوول .... ترررررن .. الحقوني انا عطلان :D
الميكانيكا و الكهرباء مهمه طبعاُ .. يعني انا مثلاُ حصل معايا موقف و انا مسافر ..كنت ماشي من بني سويف و رايح بورسعيد .. و العربيه جت عند المطار في القاهره و لقيت شيااااااااااط طالع من تحت التابلوه ... اخدتها و نزلت الحرفيين و علشان كان الجو بالليل محدش رضي يشتغل فيها .. رحت شاري قصافه و شريط لحام و عملت ريواير للعربيه :D لغيت كل حاجه كهرباء من علي البطاريه ما عدا الانجكشن و النور :D مكانش عندي حتي زجاج ارفعه و انزله :D و اول ما دخل بورسعيد الفجر .. نمت علي الشاطيء و رميت العربيه للكهربائي و رحت لمصلحتي .. و اول ما رجعتله لقيته بيمسك في خناقي :D:D
بس انا واخد كورسات مكثفه في العربيات :D ربنا يخليلنا المعلم الكبير و ايام الوركشوب و الكسر :D:D

اختي في يوم ما كانت ركبت تيل فرامل جديد .. والله العظيم ده حصل وفي شارع البطل احمد عبدالعزيز حبت الأخت العزيزه ان تجرب الفرامل .. كده هفه جات لها ... وفي وسط الشارع وبعزم ما فيها داست علي الفرامل مره واحده والبس انا في التابلوه واسمع ازعرينه ورانا ودربكه وزعيق فرملات والاقي سواق تاكسي وسائقي ملاكي ملمومين حوالينا ومفيش غير سؤال واحد .. فيه ايه يا مدام ...ده مكانش فيه حد قدامك .. فرملتي ليه كنت هتضيعينا .. انا قلتلهم جالها دوخه وانا اللي هاسوق .. وهي تزعق فيهم وتقولهم ماشيين ورايا ليه ؟ كأنها عايزه الشارع لوحدها