-
ميكروباص تويوتا
ازيكم يا شباب اخباركم ايه :M_yes[1]:
في الحقيقة بفكر في مشروع اعمله يزود ليا دخلي ويكون كويس
فكرت في موضوع الميكروباصات التويوتا اللي شغالة محافظات دي
فكنت حابب اجمع عنه معلومات عن الحكاية دي
هل التويوتا احسن واللا النيسان واللا الميتسوبيشي واللا الصيني ؟!
وايه نظامها من حيث التقديمة والقسط وعلى كام شهر وقطع الغيار وكدة
واحسن خط تشتغل عليه ايه ؟!
محافظات واللا جوا القاهرة ؟!
وبتشتغل بايه اساسا بنزين واللا جاز ؟!
معلش معلوماتي ضعيفة في الموضوع دا
ولو حد عنده اقتراح مشروع تاني يا ريت يقول :Y_hi_3[1]:
-
هو حضرتك اللي حتسوق ولا حتجيب سواق
-
الصيني اللي شبه التويوتا ده فاشل نقلا عن سواقين الميكروباص و انهم بيرموا الموتور و العفشة و بيركبوا حاجة تويوتا مكانها .
طبعا التويوتا الطيارة 17 راكب الهاي ديك ده اعلى حاجة و سعره تقريبا 220 الف
بعده ال 15 راكب
بعده العادي ال 14 راكب
النيسان كويس جدا و انا ركبته كتير و مش شايف ان فيه فرق كبير عن التويوتا و سعره 120 لل 14 راكب و منتشر جدا في سينا ( برضه مش عارف ليه منتشر كده هناك )
ده مشروع كويس جدا لو انت قدرت تدخله شركة و بالدات شركات الأسمنت و بتدفع في المتوسط 7500 شهريا .
و لو انت هتركبه يبقى هتكسب كويس جدا ............. المصيبة ان السواقين بتحشش و بتسرق و بتبهدل العربيات لكن لو انت معاك سواق ابن حلال و امين هتاكلوا عيش كويس منه .
-
طبعا الأفضل يكون جاز لأنه ارخص و اكتر انتشارا من البنزين و لكن صيانته او عمرته مكلفة اكتر
باقي النقط مفدرش افيدك فيها .... منتظر معاك ردود الاعضاء الاكثر خبرة
-
باشا فكر في انك ترخصها اوتوبيس رحلات وتشغلها مصر اسكندرية عالصحراوي .دورين او تلاتة فاليوم وكدة شكرا اوووووووووووي. شغل نضيف ومتهنش العربية وعائد ممتاز لانها بتتعامل زي قطر درجة تانية وبيركبو فيها دي في دي وتكييف فبتوصل 17 جنيه للفرد.
لو حابب معلومات. في رمسيس جنب مطعم ( علي بركة الله بتاع السجق والكبدة ) هتلاقي جراح العربيات اللي شغالة بالنظام ده روح واسال واقرر.
ولو الموضوع عجبك متنساش تجيبلي 10 كبدة وزيهم سجق وتعالي قولي شكرا يافامبير. ( طبعا مفيش بنا شكر بس اي حجة عشان اخد منك الشيلة ده عشان الحرج السياسي بس ).
-
طبعا التويوتا لان قطع غياراها موجوده ومش غاليه زي الباقي
وميكانيكية الجاز كلهم حافظينها وفاههمينها كويس عكس الماركات التانيه
ونصيحه شغلها محافظات بلاش جوه القاهره ل 1. مفيش مخالفات كتير هاتيجي عليك
2.طريق سريع الموتور هايبقا مرتاح عن جوه البلد وخلي بالك الموتور بيتصلح غالي جدا وحراق اوووي مش زي البنزين نهائي
3. الاجره عاليه شويتين عن جوه البلد
ولو عايز خط كويس القاهره المنصوره بيبقا فيه عجز شوية في العربيات وساعات الناس بتستني عربيه تيجي
بالنسبه لنظام التقسيط معنديش فكره :d
-
بص يا أستاذنا ,, مع احترامى لكل الناس اللى شاركت فى الموضوع والى قلك هات كذا واللى قلك هات كذا وكذا واللى قلك ترخصه كذا ,, قبل الكلام ده كله لازم تبقى بتبص للموضوع من كذا جانب ,, يعنى سيادتك هتدفع فلوس ,, فمينفعش ترميها ع الارض ,, طب هتقولى ازاى ,,, ع رأى المثل ادى العيش لخبازه ,, والشغلانة دى مش سهلة يعنى لو أنتا اشتغلت عليه ,, سيادتك كراجل محترم أو موضف أو أى كان مهنة حضرتك مش هتعرف تتعامل مع بتوع الميكروباص لأند دول بيبقوا ليهم معاملة خاصة يعنى هتلاقى اللى بيقل أدبه وهتلاقى اللى بيقولك انتا بتحمل عليا وحوارات وموال تانى خالص ,, طب لو قلت هجيب سواق يشتغل عليه ,,, هقولك يبقى كل سنة وانتا طيب فى فلوسك وده لعدة أسباب ومنها أول حاجة أنه هيخنسر جامد فى الأجرة وهياكل فى الفلوس غير ان سواقتهم بسم الله ما شاء الله يعنى هيطلعلك عين ام العربية وكل شوية هيقولك دى عايزة مش عارف ايه وايه وايه ,, وهيخليك تكره حياتك ,, غير انه ممكن يخبطهالك لقدر الله ويقولك مليش دعوة ,, وممكن سواق يجيلك يوم وعشرة لأ ,, يعنى العملية متعبة ,,, انا حبيت اوضحلك الموضوع شوية قبل ما الفاس تقع فى الراس ,,, أرجو ان تتقبل كلامى ,,, تحياتى ,,,,
-
علي لسان واحد اعرفة كويس بيقول ان الميكروباص النيسان مشاكلة كتير
-
الاحسن تخليك في حاجة بتفهم فيها لان السواقين هينصبو عليك كتير جدا ومش هتعرف تاخد معاهم حق من باطل زي مبيقولو.
-
جوز اختي عنده تويوتا وكان مركب عليه واحد ومكنتش بيعمل حاجه غير انه يتابع معاه طول اليوم والسواقين بيحرقو الموتور حرق لدرجة انه عمل عمرتين كل 200 الف كيلو - مش متخيل ازاي مع موتور ديزل
العربيه امبيرها 180 ومع ذلك معظم مشيهم 140 شوف انت بقي لما تبقي العربيه محمله وماشيه بالسرعه دي وشغل حرق كله الموتور بيحصله ايه
موضوع التعامل برده مع الفئه دي محتاج خبرات خاصه ده غير انك متضمنش انه ميخنصرش من الأجره يعني الأجره بتبقي 17 جنيه تلاقيه يجي يوم ومفيش عربيات يقوم محمل ب 25 جنيه يعني فرق 8 جنيه في الراكب يعني مش اقل من 120 جنيه في الدور وطبعا يضربهم في جيبه
بصراحه الموضوع مربح جدا وانا فكرت فيه كذا مره بس بتراجع بسبب المشاكل والقرف اللي ممكن اشوفه وساعات بفكر اجيبه بدل الشقه وهو يبقي يجيب الشقه بس لازم زي ماالكل قال حد مضمون
جوز اختي السواق خبطهاله مرتين كل مره مش اقل من 10 الاف تصليح وطبعا السواق مدفعش مليم
يكفي اني اقولك ان السمكري عشان يستعدل باب الشنطه اللي ورا خد 3000 جنيه وده يعتبر علي قده
الصنايعيه بيعاملوهم كانهم راكبين مرسيدس عشان عارفين ان العربيه بتجيب فلوس
احلي حاجه لو تعرف تشغلها في شركه بس مش كل الشركات بتدي فلوس كويسه
بتروجيت كانت عارضه علي جوز اختي 4500 في الشهر وطبعا بالنسبه للي ممكن العربيه تعمله قليل جدا فرفض
Content Relevant URLs by
vBSEO 3.6.0 PL2