الموضوع: هيونداي فيلوستر ولا فيات برافو ؟!!

المشاركة الأصلية كتبت بواسطة semsem kane

معلش ياجماعة انا لية وجهة نظر اخرى

بالنسبة للفرق مابين السيارتين فاكيد طبعا 99% من الاعضاء اللى هيشاركوا فى الموضوع دة مايعرفوش حاجة عن الفوليستر غير بس من ناحية التقفيل او الخامات او الراحة وانا واحد منهم يعنى ولا هقدر اكلمك على ماتور ولا نعومة ولا راحة ولا اى حاجة فنية كل كلامى هيبقى على العربية وهية واقفة يعنى من الاخر زى مانت طلبت عايز عربية فيها اوبشن , وشكلها حلو

نيجى للبرافو طبعا العربية دية جميلة جدا انا ركبتها وسوقتها حلوة اوى وماتورها سريع جدا وواسعة مش ضيقة وتابلوها رياضى جدا + الخطوط الحمراء اللى فى التابلوة مديالة منظر شيك اوى , ثابتة بس عيبها فيها سنة حدفة يمين او شمال من ورا مع اى غرزة , غلاء قطع الغيار , توكيل تعبان اوى

نيجى بقى للفوليستر : العربية دية شكلها مش حلو خالص وانا عن نفسى شوفتها مرتين ماشية قدامى حسيت انها حاجة غريبة ماشية يعنى مش عارف هل هية عربية ولا ضفدعة بتفكرنى بالظبط بشنطة ميجان الهاتشباك كنت مسميها الضفدعة , فمتهيالى كتير من اصحابى بيشاركونى رأى دة العربية بما بنبصلها مش انبهار بالتصميم لأ بالعكس احنا بنبصلها كغرابة التصميم وحاجة جديدة عليك

زى بالظبط الالنترا 2012 الوان بتبقى العربية جميلة والوان تانية بيبقى شكلها غبى , وبردة نفس الكلام تصميمها غريب شوية بس مقبول عن الفوليستر , وخلى بالكوا بردة كل الناس كانت بتقول على السيراتو كدة فى الاول لحد مانتشرت محدش بقى بيعبرها ونفس الكلام هيحصل مع الالنترا بالظبط لانها انشترت بسرعة البرق انا بقيت بشوف كل يوم اكتر من 100 عربية النترا لو مشيت 3 ساعات بس كتروا جدا جداااااااااا

عموما من الاخر البرافو متجربة محدش اشتكى منها شكوا تقلق ولا حتى فيها عيوب صناعة

لكن الفوليستر محدش يعرف عنها حاجة غير اللى جابها وانا من وجهة نظرى اذا ماكنتش العربية مشيت على الاقل سنة ونصف مش هيعرف يتحكم عليها لان من البديهى ان عربية جديدة لازم تبقى ناعمة وماتورها هادى , زى ماتكون عامل تجديد كامل فى العفشة بتلاقى العربية بعديها عاملة ازاى بتختلف اختلاف كلى

شوفلك جولف جامدة جدا وسيارة العام والتوب فى الفئة دية

كلامك معظمه صح فعلا يا باشا بس العربية لازم ناس تخاطر فى الاول و تجيبها يعنى لو كله قال هستنى لما تتجرب يبقى عمر ما حد هيجربها و المخاطرة هنا محسوبة بنسبة كبيرة اوى عربية تقفيلها باين و هى واقفة , اوبشنز جامدة جدا , هيونداى شركة محترمة برضه مش بتشترى عربية ماركة اى كلام و على فكرة انا مش بدافع عن الهيونداى عشان معايا هيونداى, انا اصلا معنديش اى عربية كورى بس انا شايف كله بيشتم فيها و العربية متستحقش ده يعنى :b4_556:
بالنسبة للجولف فالـ 160 يتزود عليهم حوالى 10 الاف و يجيب جولف 1600 بيزلاين و ديه عربية بصراحة لا تستحق تمنها بأى شكل من الاشكال , لا موتور و لا اوبشنز , مفيش بس الا اسم الجولف حتى شكلها هاتشباك كلاسيكى جدا مفهوش اى لمحة ابهار , يمكن يكون ادائها كويس بس انا مش هضحى بموتور و شكل و اوبشنز و اشترى عربية بـ 170+ عشان اسمها جولف بس

المشاركة الأصلية كتبت بواسطة semsem kane

كويس جدا الكلام نيجى بقى نوضح نقطة نقطة

اولا : انا دلوقتى ماليش دعوة بكورى ولا بيابانى انا هتكلم عن الصح

هل ينفع تغامر بمبلغ 165 الف فى عربية من غير حتى ماتعرف العربية دية كويسة ولا لأ انا عن نفسى لأ , على الاقل اطلب تيست درايف من التوكيل فى العربيات ذات الثمن العالى نسبيا

شوف ياباشا هو عيب فى الشعب المصرى عمرة مايتغير يحب يجيب العربية عشان حاجتين
1- الشكل 2 - الاوبشن ومالوش دعوة بمواصفات الامان ولا بثبات
اخر اى واحد مصرى هيقولك العربية دية اوبشنها اية وفيها كماليات اية , والدليل ان واحد يدفع 120 الف جنية فى عربية مافيهاش حتى ايموبليزر طيب ازاى , وياريتها عدلة دية ولافيها ولافيها ولافيها امال دافع المبلغ دة على اية بودى وشكل بس وحبة اوبشن ضاحكين بيهم علينا لانهم عارفينا كويس

لكن معلش مع احترامى لرأى حضرتك الجولف سيارة اكثر من ممتازة فى الثبات وكل حاجة

انت عارف ان عيب الالمانى اية انة بينزل هنا فى السوق المهبب دة بمواتير اضعف من حجم السيارة ودة بسبب ارتفاع الضريبة الجمركية على السيارة حسب المحرك يعنى عشان ينزلها 2000 سى سى يبقى كدة هو خرج برة المنافسة فى الفئة دية ووصلها الى 280 الف جنية وهو عارف ومتاكد ان الشعب المصرى مايهموش الكلام دة عشان كدة بينزل عربيات فاضية من غير حتى مسند تريح ايدك علية شايفين وصلت لحد فين

ملعش انا بجد بستغرب على الناس دية انة يبقى قدامة عربية ب95 الف فاضية خالص ومافيهاش اى مواصفات امان بس شكلها جاااااااااااااامد جدا وابشنها كتير مع انة مش هيستخدمة اصلا , ويسيب عربية تانية اغلى 5000 الاف جنية بس مافيهاش اوبشن كتير وشكلها عادى بس فيها عوامل امان , صدقنى نادرا محد هيفكر فيها

هقولك سؤال : لسة السيراتو والالنترا قبل مابينزلوا السوق بيكونوا محجوزين وبمجرد مابينزلوا المعارض بتلاقيهم غرقوا السوق ؟؟؟؟ فى اعتقادى سر نجاح الكورى سببين :

1- شكلة المتناسب مع العصر

2- اوبشن كتير

بس كدة مش اكتر

يا باشا هو المبلغ كبير فعلا و رأيك صح فى موضوع التست درايف ده بس اعتقد غبور مبيعملش تست درايف مش متأكد بصراحة بس انا عمرى ما شفت اعلان لأى هيونداى تست درايف

انا بحترم جدا اى حد بيفكر فى اساسيات العربية قبل ما يشتريها عشان ده فعلا الصح

بس ده ميمنعش ان الاوبشنز و الشكل يعتبروا من العوامل المهمة فى الاختيار و ان كانوا مش هما الاهم يعنى الاساسيات و الامان اولا كلام حضرتك سليم 100%

انا مشككتش فى الجولف كعربية كويسة بس فعلا سعر مبالغ جدا 175 الف على عربية اساسياتها كويسة بس لا الموتور كويس على عربية هاتشباك بالسعر ده متوقع منها اداء معين و لا الاوبشنز متوفرة انا مش بتكلم عامة انا بتكلم على انك تشترى عربية هاتشباك فى الفئة السعرية ديه يعنى العربية فى الاغلب مش هتبقى اسرية هتبقى اسرة صغيرة او شاب لوحده فمطلوب درجة اوبشنز و اداء معين و حضرتك قلت جزء من المشكلة فى كلامك انا لما بشترى ماليش علاقة ليه هو نزلها فاضية او كده المهم انها فى الاخر فاضية و موتورها غير مرضى على سعرها و شكل الجولف 6 فعلا من رأيى شكل مش مميز خالص يعنى الجولف 5 اجمل كثير من الـ 6 , و حضرتك قولت اهو يعنى اشترى عربية هاتشباك بـ 175 الف و ملاقيش ابسط الاوبشنز اللى تريحنى , اكيد وقتها مش هفكر ان العربية فولكس و اساسياتها تمام و الكلام ده .. المهم انى مش لاقى فى ايدى و لا اداء و لا اوبشنز

الجولف سعرها مبالغ فيه جدا يعنى الجولف البيزلاين بتمن البرافو 150 اللى مبتنزلش خلاص بس كانت بتنزل بنفس السعر ده تقريبا , لو حضرتك قارنت بين الاثنين كموتور او اوبشنز او شكل او او هتلاقى فرق كبير جدا , و احنا بنتكلم فى فيات برضه يعنى عربية ليها اسمها مش عربية اى كلام

عموما يا باشا انا شايف فعلا ان الكورى مكتسح السوق للاسباب اللى ذكرتها بس ده لأن معظم الناس دلوقتى بتغير العربيات كل سنة او سنتين فأساس العربية مش مهم اوى فى الحالة ديه قصاد الاوبشنز و الشكل الجميل .. مش فارقة مع الناس ان العربية معمرة قد ما فارقة معاه انه يستمتع اكثر بالعربية اللى فى اول سنة او سنتين مش هتبان عيوبها فى اغلب الاوقات

اعتقد حضرتك بتقصد الاكسنت ار بى او السيراتو مثلا و العربية اللى فيها عوامل امان هى الصنى
عشان مفيش عربيات اوروبى فى الفئة ديه خالص الا الايفو و عربية متنفعش اسرية خالص متهيألى , الصنى عربية جميلة و اصيلة بس فعلا انا شايف انها متصلحش لشاب خالص ..

فى الاخر اتمنى ان حضرتك متضايقش من كلامى , و انا بتعلم من خبراتكوا هنا فى نايل موتورز

المشاركة الأصلية كتبت بواسطة mido_soliman

الله يمسيك بالخير يا formulator كان زمانك هايص فى التوبيكات دى وكنت بردة حتتوقف :):):):)
اكتر واحد زعلان علية انة مش موجود معانا بجد كنت بستفيد منة جدا رغم تعصبة للاوروبى بس راجل بيفهم

فعلا انا برضه مفتقد formulator جدا , ماشاء الله موسوعة عن العربيات و كلامه كله ناجم عن فهمه الشديد

بس هو كان متعصب للاوروبى شويتين ثلاثة

هو ممكن زى ما الاستاذ CryptonX قال قبل كده مش فاكر فين ان فيه فعلا فروق فى السواقة بين الاوروبى و المدارس الثانية بس ديه ميلاحظهاش الا اللى بيسوق بطريقة معينة تخلى الفرق دا يبان واضح ليه .. يعنى اعتقد اللى بيسوق مجرد انه بيستخدم العربية كوصيلة مواصلات مش هيحس بالفرق دا ابدا